مەڵبەندی سێی هەولێری یەكێتیی نیشتمانیی كوردستان دەڵێت، نەدانی موچەی موچەخۆران، تاوانێكی دیكەی ئاشكرای كابینەكانی پارتییە. دەشڵێت، ئێمە لەگەڵ تەوتینی موچەین و هەژماری من رەتدەكەینەوە.

ئاوێنە: مەڵبەندی سێی هەولێری یەكێتیی نیشتمانیی كوردستان، ئەمڕۆ پێنجشەممە، لە پەیامێكدا بۆ موچەخۆران رایگەیاند"نەدانی موچەی فەرمانبەران و مامۆستا و پۆلیس و ئاسایش و پێشمەرگە و خانەنشینان، تاوانێکی دیکەی ئاشکرای کابینەکانی پارتییە."

وتوشیەتی"ئەوەی بەرامبەر ئێوە کرا لە ساڵی 2014 تاکو ئێستا لە دواکەوتنی موچە، لە پاشەکەوتی زۆرەملێ، لە لێبڕینی موچە، لە راگرتنی پلەبەرزکردنەوە دەچێتە خانەی توندوتیژی ئابوری، بێگومان ئەوە لە دنیای پیشکەوتوودا بەتاوان سەیر دەکرێت."

جەختیشی كردۆتەوە "ئێمە لەگەڵ تەوتینی موچەین لە بانکە حکومییەکانی عێراق و هەژماری من رەتدەکەینەوە."

ئاماژەی بەوەشداوە كە"ئێمە لەگەڵ پلەبەرزکردنەوەی فەرمانبەرانین لەبەر ئەوەی بە یاسا دیاریکراوە و مافە. پاشەکەوت و لێبڕین دەکەینە یاسایەك و دەیکەین بە قەرز لەسەر کابینەی 10ی حکومەتی هەرێم."

هێمای بۆ ئەوەش كردوە "لەگەڵ هاوتاکردنی موچەین بۆ خانەنشینان و فەرمانبەران لەگەڵ هاوپیشەکانیان لە عێراق."