ئەحمەد شەرع، فەرماندەی دەستەی تەحریری شام ناسراو بە ئەبو محەمەد جۆلانی رایگەیاند، سوریا ببوە سەكۆیەك بۆ ئێران كە لێیەوە ئیدارەی 4 پایتەختی عەرەبی دەكرا، ئەوەی بە كەمترین زیان لە سوریا بەدەستمان هێنا، پڕۆژەی ئێرانی لە ناوچەكە 40 ساڵ بردە دواوە.
ئاوێنە: جۆلانی لە چاوپێكەوتنێكدا لەگەڵ رۆژنامەی "الشرق الاوسط" رایگەیاند، شۆڕشی سوریا لەگەڵ كەوتنی رژێمەكەی ئەسەد كۆتایی هات و رێگە بە هەناردەكردنی بۆ هیچ شوێنێكی دیكە نادەین.
وتیشی، سوریا نابێتە شوێنێك بۆ هێرشكردن یان نیگەرانكردنی هیچ وڵاتێكی عەرەبی و كەنداو.
ئاماژەی بەوەشداوە، سوریا ببوە سەكۆیەك بۆ ئێران كە لێیەوە چوار پایتەختی سەرەكی عەرەبی ئیدارە دەدراو ئەو ولاتانەی ئێرانیان چۆتە ناو، شەڕو گەندەڵیان تێدا بڵاوبۆتەوە، ئێران ببوە مایەی ناسەقامگیری كەنداو و ناوچەكەی پڕكردبو لە ماددەی هۆشبەر و كەپتاگۆن.
ئاماژەی بەوەشداوە، بۆیە ئەوەی ئێمە بە كەمترین زیان كردمان و بەدەستمان هێنا بۆ دەركردنی میلیشیا ئێرانییەكان و داخستنی سوریا بەتەواوەتی وەك سەكۆیەكی ئێرانی، بەرژەوەندییەكی گەورەیە بۆ تەواوی ناوچەكە كە بە كەناڵی دیپلۆماسی و تەنانەت بە گوشاریش بەدەست نەهێنرا.
ئەوەشی خستۆتەڕو، بەوەش ئەمڕۆ ئاسایشی ستراتیژی وڵاتانی كەنداو زۆر زیاتر پارێزراو و سەقامگیرە چونكە بەوە پڕۆژەی ئێران لە ناوچەكە 40 ساڵ برایە دواوە.
لەبارەی پەیوەندییەكانیشیان لەگەڵ لوبنان، جۆلانی وتوشیەتی، نیگەرانی زۆرمان پێدەگات لە برایانی لوبنانیمانەوە بەهۆی ئەوەی ئێمە گەیشتوینەتە دیمەشق بەوەی گوایە گەیشتنی ئێمە بە دیمەشق لایەنێك لەدژی لایەنێكی دیكە بەهێز دەكات لە لوبنان، بەڵام لە راستیدا هەوڵی هیچ پەیوەندییەكی باڵادەستانە لەگەڵ لوبنان نادەین و ... نامانەوێت دەستوەردان لە ناوخۆی لوبناندا بكەین چونكە لە وڵاتەكەی خۆمان بەشی خۆمان كارمان هەیە.