بۆ بەشداریی لە 79یەمین کۆبوونەوەی گشتی نەتەوەیەکگرتووەکان، مەسعود پزیشکیان، سەرۆک کۆمارى ئێران و شاندی یاوەری گەیشتنە نیویۆرکی ئەمریکا.

ئاوێنه‌: دوای گەیشتنی بە نیویۆرک، پزیشکیان لە فڕۆکەخانەی جۆن ئێف کەنەدی لە وەڵامی پرسیاری رۆژنامەنووسان سەبارەت بە ئامانجی گەشتەکەى رایگەیاند، ئێمە هەڵگری پەیامی ئاشتیین و هاتووین بۆ بەدیهێنانی دروشمی ئەمساڵی نەتەوەیەکگرتووەکان کە بریتیە لە ئاشتی و پێکەوە ژیان، ئێمە وەستاوین لێرە وەستاوین بۆ ئاشتی و ئایندەیەک لەگەڵ ئاسایش و گەشەپێدان بۆ هەموو مرۆڤەکان.

لە کارنامەی سەردانەکەیدا هاتووە، پزیشکیان لە کۆبوونەوەی گشتی نەتەوەیەکگرتووەکاندا وتاری ئێران دەخوێنێتەوە، پاشان لەگەڵ رەوەندى ئێرانى لە ئەمریکا کۆدەبێتەوە، جگە لە دیدار و کۆبوونەوە لەگەڵ سەرکردە و نوێنەرانی وڵاتانی بەشدار لە کۆبوونەوەى گشتى نەتەوەیەکگرتووەکان.

لە دوای دەستبەکاربوونی وەکو سەرۆککۆماری ئێران، ئەمە دووەم سەردانی پزیشکیانە بۆ دەرەوەى ئێران، ئەویش دواى ئەوەی 10ـی ئەیلوولی 2024 لەگەڵ شاندێکی باڵای وڵاتەکەی لە سەردانێکی سێ رۆژەدا سەردانی عێراق و هەرێمی کوردستانیان کرد.