ئاسایشی گشتی هەولێر رایگەیاند، باندێكی مەترسیداری ماددەی هۆشبەر دەستگیركران كە لە چوار تۆمەتباری بیانی پێكهاتون و دەستیش بەسەر 14 كیلۆگرام ماددەی هۆشبەر لە جۆری كریستاڵدا گیرا.
ئاوێنە: بەڕێوەبەرایەتی نەهێشتنی ماددە هۆشبەرەكان سەربە ئاسایشی گشتی هەولێر، ئەمڕۆ پێنجشەممە، لە راگەیەندراوێكدا وتی" لە پڕۆسەیەکی بەدواداچون و کۆکردنەوەی زانیاری ورد کە چەند رۆژێکی خایاند لەلایەن تیمەکانی بەدواداچوونی بەڕێوەبەرایەتیەکەمان دواتر وەرگرتنی ڕەزامەندی دادوەری لێکۆڵینەوەی ئاساییش لە ڕێکەوتی 4ـی 9ـی 2024 لە چالاکییەکدا توانرا باندێکی مەترسیداری بازرگانی کردن بە ماددەی هۆشبەر دەستگیربکرێن کە پێکهاتبون لە چوار تۆمەتباری بیانی، بەنیازبوون بڕی 14 کیلۆ گرام ماددەی هۆشبەر لە جۆری کریستاڵ بهێننە ناو هەرێم و لەنێو تایەی بارهەڵگر بە شێوازێکی زۆر ورد حەشاریان دابو."
ئەوەشی خستۆتەڕو"تۆمەتبارەکان ڕادەستی یاسا کراون و بەپێی یاسای بەرەنگاربونەوەی ماددەهۆشبەرەکان و کارتێکەرە ئەقڵییەکان پەڕاوی لێکۆڵینەوەیان بۆ کراوەتەوە مامەڵەیان لەگەڵ دەکرێت."