وەزارەتی دەرەوەی ئەمریكا داوا لە هاوڵاتیانی وڵاتەكەی دەكات گەشت بۆ عێراق نەكەن. باڵیۆزخانەی وڵاتەكەش لە بەغدا دەڵێت، لەنزیکەوە چاودێریی ئەو راپۆرتانە دەکەن کە باس لە هێرشکردنە سەر ئەو شوێنە بازرگانی و دامەزراوە پەروەردەییانە دەکەن، کە پێیانوایە ئەمریکین.
ئاوێنە: باڵیۆزخانەی ئەمریکا لە بەغدا، ئەمڕۆ سێشەممە، لەرێگەی ئاگادارینامەیەکی ئەلیکترۆنییەوە داوای لە هاوڵاتیانی کردوە ئاگاداری خۆیان بن لە ئەگەری هێرشکردن و هەڕەشەکردن بۆ سەر ناوەندە بازرگانی و دامەزراوە پەروەردەییەکان لە عێراق.
لەو ئاگادارینامەیەدا، باڵیۆزخانەی ئەمریکا لە عێراق رایگەیاندوە: "باڵیۆزخانەی ئەمریکا لە بەغدا چاودێری ئەو راپۆرتانە دەکات کە باس لە ئەگەری هێرش و هەڕەشەکردن دەکەن بۆ سەر شوێنە بازرگانی و دامەزراوە پەروەردەییەکان کە پێیانوایە ئەمریکی بن."
لە درێژەی ئاگادارینامەکەی باڵیۆزخانەدا هاتوە: "دەبێت هاووڵاتییانی ئەمریکی ئاگاداری ئەم ئەگەرە بن و چاودێری میدیای نێوخۆ بکەن بۆ هەر پێشهاتێک و بە ئاگاوە مامەڵە بکەن لە نزیک ئەو شوێنانەی وا دەبینرێت کە ئەمریکی بن."
وەزارەتی دەرەوەی ئەمریکا لە رێگەی ئاگادارینامەکەی باڵیۆزخانەكەوە، داوای لە هاوڵاتییانی کردوە گەشت بۆ عێراق نەکەن و هۆکارەکانی ئەو داواکارییەشی بۆ "هەڕەشەی گروپە تیرۆرستییەکان، رفاندن، شەڕی چەکداری، گرژی و ئاڵۆزییەکان" گەڕاندوەتەوە.
ئەوەش لەكاتێكدایە كە سەرەتای هەفتەی رابردو، لە بەغدا هێرشکرایە سەر چەند خواردنگەو کۆمپانیایەکی ئەمریکی لەوانە؛ زنجیرە خواردنگەی کەی ئێف سی، چیللی هاوس و کۆمپانیای کاتەرپێلەر.