جێگری سەرۆکی پەرلەمانی عێراق، رایگەیاند، دیدگایه‌ك هه‌یه كه ناردنی پشكی هه‌رێم و موچه‌ی فه‌رمانبه‌ران به‌مشێوه‌یه‌ی ئێستا به‌رده‌وام بێت، تا ئه‌و كاته‌ی دیوانی چاودێری دارایی به‌ته‌واوی وردبینییه‌كانی ته‌واو دەکات. دەشڵێت: لەو باوەڕەدا نیم بەغدا هەفتەی داهاتو دو موچە بنێرێت.
ئاوێنە: شاخەوان عەبدوڵا، جێگری سەرۆکی پەرلەمانی عێراق، بە میدیای پارتی وتوە، لە دوای جێبەجێکردنی یاسای بودجە هیچ بیانوویەک نەماوە بۆ نەناردنی شایستە داراییەکانی هەرێمی کوردستان، لە ئێستادا بەغدا داتای سەرجەم داهاتی نەوتی و نانەوتی هەرێمی کوردستانیان لەلایە تەنیا ماوە وردبینی تەواوی خۆیان بکەن، دیدگایه‌ك هه‌یه كه ناردنی پشكی هه‌رێم و مووچه‌ی فه‌رمانبه‌ران به‌مشێوه‌یه‌ی ئێستا به‌رده‌وام بێت، تا ئه‌و كاته‌ی دیوانی چاودێری دارایی به‌ته‌واوی وردبینییه‌كانی ته‌واو دەکات.
هاوکات راشیگەیاند، لە کۆبونەوەی سێشەممەی رابردویان لەگەڵ لایەنەکانی هاوپەیمانی ئیدارەی دەوڵەت ئاماژەیان بەوەدا، سه‌رجه‌م لایه‌نه‌كانی ناو هاوپه‌یمانێتییه‌كه جه‌ختیان له ره‌وانه‌كردنی پشكی هه‌رێم له بودجه كردوه‌ته‌وه و بۆ ئه‌و مه‌به‌سته گڵۆپی سه‌وزیان بۆ سه‌رۆك وه‌زیران هەڵكردوە.
ئاماژەی بەوەشدا، لە چەند رۆژی داهاتودا، شاندی هەرێمی کوردستان بۆ پرسی پارەدارکردنی حکومەتی هەرێمی کوردستان سەردانی بەغدا دەکەن.
سەبارەت بەوەی هەفتەی داهاتو کە بەغدا دو مووچە رەوانە بکات، جێگری سەرۆکی پەرلەمانی عێراق، باسی لەوەکرد، "لەو بڕوایە دانیم هەفتەی داهاتو دو موچە دابەش بکرێت".
لەبارەی یاسای نەوت و گاز، شاخەوان عەبدوڵا، وتی: لە پڕۆژە یاسای نەوت و گازدا، دەستەیەک دادەمەزرێندرێت کە کار لەسەر ئەوە دەکرێت پارێزگا نەوتییەکان و ئەوانەشی لە ئایندەدا کە دەکرێت وەک ناوچەیەکی نەوتی یان غازی بناسرێن، رۆڵیان هەبێت لەو دەستەیە، هەروەها پارێزگای بەسرەش هاوشێوەی هەرێمی کوردستان ئامادەی خۆی نیشانداوە بۆ ئەوەی بابەتەکە بەرەو مەرکەزییەت نەڕواو سندوقێک هەبێت، سندوقێکی نەوتی، بۆ ئەوەی داهاتی نەوتەکە بەسەر تەواوی پارێزگاکانی عێراقدا دابەش بکرێت، ئەمە رای پارێزگا نەوتییەکانە.
وتیشی: "حکومەتی عێراق هەوڵدەدات داهاتەکان زیاتر مەرکەزی بێت، بەڵام هەمو لایەنەکان پشتگیری ئەوە دەکەن کە دەبێت رۆڵی ناوچەکانی هەرێمی نەوتی بە هەرێمی کوردستانیشەوە لە یاسەکەدا لەبەرچاو بگیرێت و مافی دەستورییان بپارێزرێت، بۆیەوە بڕیارە هەفتەی داهاتو لیژنەی نەوت و گاز کۆبننەوە بە ئامادەبونی فوئاد وسین، وەزیری دەرەوە و جێگری سەرۆکوەزیرانی عێراق و وەزیری نەوتی عێراق، لەگەڵ لایەنەکان بۆ ئەوەی هەنگاوی دوو\ەم بۆ ئەو پڕۆژەیە یاساییە دەستپێبکەن، داواشمانکرد یاسای نەوت و گاز نەنێردرێتەوە پەرلەمان، چونکە بەهۆی ئەوەی پێویستە کۆدەنگی لەنێوان لایەنەکان دروستبێت و هیچ یاساییەک کۆدەنگی سیاسی لەسەرنەبێت لە پەرلەمانی عێراق وەرناگیرێت".