ئه‌ندامێکی کوردی لیژنه‌ی دارایی په‌رله‌مانی عێراق رایگەیاند، وه‌زیری ته‌ندروستی عێراق ره‌زامه‌ندی داوە بە كردنه‌وه‌ی سه‌نته‌رێكی پشكنینی شێرپه‌نجه‌ی مه‌مك له پارێزگای سلێمانی.
د.نه‌رمین مه‌عروف، ئه‌ندامی لیژنه‌ی دارایی په‌رله‌مانی عێراق ئاماژەی بەوەکردووە:" له‌چه‌ند رۆژی رابردوو به نووسراوێك داوام له وه‌زیری ته‌ندروستی كرد میكانیزمی خه‌رجكردنی ئه‌و پاره‌یه رونبكاته‌وه، ئامانجیشم ئه‌وه‌بوو پشكی نه‌خۆشخانه‌كانی تایبه‌ت به شێرپه‌نجه له هه‌رێمی كوردستان له‌و بڕه پاره‌یه بزانم ".
. د.نه‌رمین مه‌عروف، باسی لەوەشکردووە:" بە وتەی وه‌زیری ته‌ندروستی عێراق نه‌خۆشخانه‌كاتی تایبه‌ت به شێرپه‌نجه له هه‌رێمی كوردستان ده‌توانن داوای پێداویستییه‌كانی خۆیان بكه‌ن و ئەوانیش له‌چوارچێوه‌ی ئه‌و بودجەیەی له یاساكه‌دا دیاریكراوه بۆیان دابین ده‌كەن، منیش به‌نووسراوێك داوام له نه‌خۆشخانه‌ی هیوا كرد پێداویستییه‌كانی خۆیان بنووسن ".
ئەو پەرلەمانتارە دەشڵێت:" نه‌خۆشخانه‌ی هیوا وه‌ڵامی نووسراوه‌كه‌میان دایه‌وه و داوای كردنه‌وه‌ی سه‌نته‌رێكی پشكنینی پێشوه‌خته‌ی شێرپه‌نجه‌ی مه‌مكیان كردووه، له نووسراوه‌كه‌شیاندا ئه‌وه‌یان رونكردووەته‌وه كه 20%ی توشبووانی شێرپه‌نجه ئه‌و ژنانه‌ن كه تووشی شێرپه‌نجه‌ی مه‌مك بوون، وەزیری تەندروستیش بە داواکە رازی بووە بەمزووانە ئەو سەنتەرە لە نەخۆشخانەی هیوا دەکرێتەوە".
روونیشیکردووەتەوە:" توانرا له یاسای ئاسایشی خۆراك 150 ملیار دینار تەرخان بکرێت بۆ دابینكردنی ده‌رمانی نه‌خۆشی شێرپه‌نجه بۆ نه‌خۆشخانه‌كانی تایبه‌ت به شێرپه‌نجه له سه‌رجه‌م پارێزگاكانی عێراق به هه‌رێمی كوردستانیشه‌وه ".
