ئا: ئاوێنە

شێخ نەهرۆ، رابەری تەریقەتی كەسنەزانی ئاماژە بەوە دەكات " ئەوەی عەلی نەوێ‌ ئێمە نامانەوێ‌"،  ئەو دەڵێت "نەعلەت لەمەعاویەو لەو كەسەش باسی دەكات ".

ئەم قسانەی شێخ نەهرۆ، كە لەكاتی كۆبونەوەیەكی تایبەت‌و قسەكردن بۆ كۆمەڵێك دەروێشدا تۆمار كراوەو لەفایلێكی دەنگیدا لەتۆڕە کۆمەڵایەتییەکاندا بڵاوبوەتەوە، لەناو حیزب‌و لایەن‌و كەسایەتییە ئیسلامیەكانی كوردستاندا هەرای ناوەتەوەو جێی نارەزاییانە، بەسەرنجدان لەوەی "معاویەی كوڕی ئەبی سفیان"، تا ئێستاش بەیەكێك لەو كەسایەتییانە دادەنرێ‌ كە زۆرترین مشتومڕی لەمێژووی ئیسلامدا لەسەر كراوەو کاریگەرییەکی گەورەی لەسەر مێژوی ئیسلام هەبوە. مەزهەب‌و رێبازە ئایینییەكانی ئیسلام لەهەڵسەنگاندنی معاویەدا سەبارەت بەكەسایەتی ئەو زۆر ناكۆكن، بەشێكیان "کە سەر بەئایینزای سونەن" بەئەندازەیەك خۆشەویستی خۆیانی بۆ دەردەبڕن كە دەیگەیەننە ئاستی "هاوەڵانی پێغەمبەر"و  بەشێكیشیان "کە سەر بەئاینزای شیعەو تەسەوفن" بەئەندازەیەك رق‌و قینینیان لێئەبێتەوە كە حوكمی "كافر" بونی بەسەردا دەسەپێنن.

شێخ نەهرۆ کەسنەزانی، کە تەمەنی 53 ساڵەو بڕوانامەی دكتۆرای هەیە لە"مێژو"دا‌و لەدوای كۆچیدوایی شێخ محەمەدی باوكی دەروێشەكانی تەریقەتی كەسنەزان بەیعەتیان پێكردو بوە رابەری تەریقەتەکە، لەم تۆمارە دەنگییەدا كە لەتۆڕە كۆمەڵایەتییەكاندا بڵاوبوەتەوە بەدەروێشەكانی دەڵێت "بەهیچ شێوەیەك دەروێش ناچێ‌ بەدەوری باسی معاویەو ئەو شتانەدا، دەروێش حەزرەتی محەمەدی هەیەو حەزرەتی عەلی هەیە، بێتە خوارەوە سەید عەبدولقادری گەیلانییە، یەك سەحابەی تر هی ئێمە نییە، من لەبەر ئێوە ئەو ناوە (مەبەستی معاویەیە) ئەهێنم ئەگینا ئەوانە رەبتیان نییە بەدینەكەی ئێمەوەو بەعەقیدەكەی ئێمەوە، هەركەسێ‌ شوێن ئەوانە ئەكەوێ‌ بڕوا لای ئێمە ون بێت‌و لای ئێمە نەمێنێ‌".

دەشڵێت "ئەوەی عەلی نەوێ‌ ئێمە نامانەوێ‌، عەبدولقاردی گەیلانی‌و شای كەسنەزانەو ئەوانە سوڵتانی ئێمەن، ئەم نیقاشە جارێكیتر لەدەروێشی كەسنەزانی نامەوێ‌ بیبیستم تا رۆژی قیامەت، ئەوەی بیكات خۆی تەحەمولی مەسئولیەتە روحییەكەی ئەكات، وەڵاهی وای تێهەڵئەدەم تا رۆژی قیامەت خۆی نەگرێتەوە، دە كێ‌ خۆی بەپیاو دەزانێ‌ با بچێت تەحەدای ئەوە بكات. دەروێش عەلاقەی بەئوستادەكەیەوە هەیە، مەجالی فیتنە نەدەن، مەجالی ئەو خوێڕیانە نەدەن بەهیچ جۆرێ‌ بێنە دەورتان، ئەوانە دوژمنی ئیسلامن، قەد ئیسلام نەبون، ئێمە عەقیدەكەمان پەیوەندی نییە بەو شتە پیسانەوە، نەعلەت لەمەعاویەو لەو كەسەش باسی دەكات".

ئەم قسانەی شێخ نەهرۆ، جێی ناڕەزایی بەشێكی بەرچاو لەبەكارهێنەرانی سۆشیال میدیا‌و حیزب‌و لایەن‌و كەسایەتییە ئیسلامییەكانە لەكوردستان‌و داواکاری گشتیش سکاڵایەکی یاسایی دژی شێخ نەهرۆ جوڵاندوە، بەو پێیەی "بێڕێزی بەیارانی پێغەمبەرمان (د.خ) - (صحابه‌كان) دەکات، کە ئاشکرایە (صحابه) لای ئێمەی کوردی موسڵمان، جێگەی ڕێزو بەرزڕاگرتنن".

تەریقەتی كەسنەزانی لقێكە لەتەریقەتی قادری، كە بەناوی شێخ عەبدولكەریمی باپیرە گەورەی شێخ نەهرۆوە ناونراوە، كە رەچەڵەكی خۆیان دەبەنەوە سەر ساداتی بەرزنجەو لەوێشەوە سەر "عەلی كوڕی ئەبی تالیب".

تەریقەتی كەسنەزانی خاوەنی چەندین تەكیەیە لەژمارەیەك وڵاتانی جیهان، بەڵام ئێستا شێخ نەهرۆ زۆربەی كات‌و كۆبونەوەو بۆنەكانی لەو تەكیەدا دەكات كە دەكەوێتە ناو شاری سلێمانی‌و شێخ محەمەدی باوكیشی تیادا بەخاك سپێردراوە.