دۆناڵد ترەمپ، سەرۆکی ویلایەتە یەکگرتووەکانی ئەمریکا ڕایگەیاند، تاران خوازیارە لە ڕێگەی ڕێککەوتنەوە کۆتایی بە دۆخی شەڕ بهێنێت، بەڵام جەختی کردەوە کە واشنتن بەدوای «ڕێککەوتنێکی ڕاستەقینەوەیە» و تا سەری ساڵی نوێ پەلە لە بڕیاردان ناکات. ئەم لێدوانەی ترەمپ هاوکاتە لەگەڵ زانیارییەکان لەبارەی فشارە بەردەوامەکانی بنیامین نەتەنیاهۆ، سەرۆکوەزیرانی ئیسرائیل بۆ هێرشکردنە سەر ئێران.
ئاوێنە: لە میانی کۆنگرەیەکی ڕۆژنامەوانیدا، سەرۆکی ئەمریکا ئاشکرای کرد کە سەرەڕای هەوڵەکانی تاران بۆ گەیشتن بە سازان، لایەنی ئێرانی ئامادە نییە سازش بۆ ئەو مەرجانە بکات کە لای واشنتن پەسەندکراون. ترەمپ گۆڕانکاری و دابەزینی نرخی جیهانیی نەوتی بە شێوازی یەکلابوونەوەی دۆسیەی ئێرانەوە گرێ دا و پێشبینی کرد نرخی سووتەمەنی زیاتریش داببەزێت. هاوکات دووپاتی کردەوە کە لە یەکلاکردنەوەی بژاردە سەربازییەکاندا هیچ پەلەیەکی نییە.
سەبارەت بە هەڵوێستی ئیدارەکەی بەرامبەر تاران، دۆناڵد ترەمپ گوتی: «ئێرانییەکان دەیانەوێت ڕێککەوتن بکەن، بەڵام نایانەوێت بێنە سەر ئەو ڕێککەوتنەی کە بۆ من قبوڵکراو بێت؛ واشنتن بەدوای ڕێککەوتنێکی ڕاستەقینەدایە نەک ساختە، و من پەلەم نییە لە بڕیاردان و دەبینین دوای سەری ساڵ چی ڕوودەدات.»
لە لایەکی دیکەوە، کەناڵی ١٢ـی ئیسرائیلی بڵاوی کردەوە کە سەرۆکی ئەمریکا لە کاتی گەڕانەوەیدا لە گەشتەکەی بۆ چین، دووبارە جەختی لەوە کردووەتەوە کە هەر بڕیارێکی پەیوەست بە ئێران دەخاتە دوای سەری ساڵی نوێ. لە بەرامبەردا، سەرچاوەکان ئاماژەیان بەوە کردووە کە بنیامین نەتەنیاهۆ، سەرۆکوەزیرانی ئیسرائیل بە بەردەوامی فشار دەخاتە سەر کۆشکی سپی بۆ ئەنجامدانی هێرشی سەربازیی هاوبەش دژی تاران، ئەوەش وای کردووە ترەمپ سەرلەنوێ پێداچوونەوە بە بژاردەی هێرشە سەربازییەکاندا بکاتەوە.
ئەم پێشهاتانە لە کاتێکدان کە ململانێی سەربازی و دیپلۆماسیی نێوان واشنتن و تاران، بەهۆی گەمارۆی دەریایی و گرژییەکانی گەرووی هورمزەوە، بە دۆخێکی ئاڵۆزدا تێپەڕ دەبێت. لە کاتێکدا ئیدارەی ترەمپ پشت بە ستراتیژیی گوشاری ئابووری دەبەستێت بۆ ناچارکردنی ئێران بە گەیشتن بە ڕێککەوتن، سەرۆکوەزیرانی ئیسرائیل بەردەوام هۆشداری لە پەرەپێدانی پرۆگرامی ئەتۆمیی تاران دەدات و داوای وەشاندنی گورزێکی سەربازیی بەپەلە دەکات.