بومەلەرزەیەک بەهێزی 5.1 پلەی ڕێختەر شارۆچکەی قەسری شیرینی سنوری پارێزگای کرماشانی ڕۆژهەڵاتی کوردستان‌و شارۆچکەی کەلاری ناوەندی ئیدارەی سەربەخۆی گەرمیانی لەهەرێمی کوردستان هەژاند.
ئاوێنە: بەگوێرەی ڕاپۆرتی سەرەتایی ناوەندی بومەلەرزەزانیی کۆماری ئیسلامی ئێران، هێزی بومەلەرزەکە 5.1 پلەی ڕێختەر بوەو کاتژمێر پێنجی بەرەبەیانی ئەمڕۆ دوشەممە، شارۆچکەی قەسری شیرینی لەپارێزگای کرماشان هەژاندوە.
ئاماژە به‌وه‌شكراوه، چەقی بومەلەرزەکە لەقوڵایی هەشت کیلۆمەتری ناخی زەویی لەنێوان ڕۆژهەڵات‌و باشوری کوردستان بوە.
ئه‌وه‌ش ڕونكراوه‌ته‌وه، شوێنی بومەلەرزەکە بەدوری 21 کیلۆمەتر لەقەسری شیرین، دوری 22 کیلۆمەتر لەخانەقین‌و دوری 39 کیلۆمەتر لەسەرپێلی زەهاو تۆمارکراوە، بەڵام تائێستا هیچ زانیارییەک لەبارەی زیانی گیانی‌و ماڵیی بومەلەرزەکە بڵاونەکراوەتەوە.