کشتوکاڵی هەولێر ڕایگەیاند: بەهۆی کەمبوونەوەی بەروبوومی خۆماڵی لە کاتەدا، بەمەبستی هەرزانبوونی نرخی تەماتە ڕێگە بە هاوردەکردنی درا.

ئاوێنە:  ئەمڕۆ سێشەممە، ١٩ی تشرینی دووەمی ٢٠٢٤، هێمن سەید موراد، بەڕێوەبەری گشتیی کشتوکاڵی هەولێر ئاشکرایکرد، لەم وەرزەدا بەرهەمهێنانی تەماتە لە ناوچەکە کەم دەبێتەوە. ئێمە تاوەکوو 5ـی 11، پشتمان بەبەرهەمی تەماتەی ناوخۆ دەبەست، بەڵام دوای ئەوە کە بەرهەمی ناوخۆ کەمبووەوە، ڕێگە بە هاوردەکردنی تەماتە درا، ئەمەش بۆ ڕەچاوکردنی بەرژەوەندی گشتی و بەرزنەبوونەوەی نرخی تەماتە بووە.

وتیشی: دوای ئەوەی ڕێگە بە هاوردەکردنی تەماتە درا، نرخەکەی دابەزی، بەرهەمی تەماتەی پایزەمان هەیە کە لەژێر خانووە پلاستیکەکان بەرهەم دەهێنرێت، پێشبینی دەکەم سەرەتای هەفتەی داهاتوو پێڕابگات، بەمەش زیاتر نرخی تەماتە دادەبەزێت.

بەڕێوەبەری کشتوکاڵی هەولێر ئاماژەی بەوەشدا، بەگوێرەی چاودێرییەکانمان، لە عەلوەی هەولێر نرخی تەماتە لە نێوان ٧٠٠ تا ١٠٠ دینارە ئەمەش بەپێی جۆرەکەیەتی، هەروەها لە ڕۆژانی داهاتووشدا نرخەکە زیاتر دادەبەزێت و هیچ جێی نیگەرانیی نییە.