هێمن هەورامی ڕایده‌گه‌یه‌نێت كه‌ پارتی لەدەنگدانی تایبەت 86 هەزارو 775 دەنگی بەدەستهێناوە،  یەکێتی 50 هەزارو 776 دەنگی هێناوە، به‌و پێیه‌ "پارتی بە 36 هەزار دەنگ لەپێش یەکێتییەوەیە".

ئاوێنه‌: هێمن هەورامی، سەرپەرشتیاری لیژنەی باڵای هەڵبژاردنی پارتی لەبارەی ئەنجامی دەنگدانی تایبەت لەکۆنگرەیەکی ڕۆژنامەوانیدا ڕایگەیاند، لەهەموو بنکەکان بریکاریان هەبووە کە ژمارەیان 165 بنکە بوو، بەکۆی گشتی لەدەنگدانی تایبەت 179 هەزار و 326 دەنگی دروست دراوە.

ئه‌وه‌شی‌ خسته‌ڕوكه‌ حیزبه‌كه‌ی‌ لەدەنگدانی تایبەت 86 هەزارو 775 دەنگی بەدەستهێناوە،  یەکێتی 50 هەزارو 776 دەنگی هێناوەو "پارتی بە 36 هەزار دەنگ لەپێش یەکێتییەوەیە".

ئه‌وه‌ش له‌كاتێكدایه‌ كه‌ ئەمڕۆ یەکشەممە کاروان گەزنەیی، وتەبێژی لیستی یەکێتی لەکۆنگرەیەکی ڕۆژنامەوانیدا ئەنجامی دەنگدانی تایبەتی بڵاوکردەوە، بەپێی داتاکەی ئەوان پارتی:  74 هەزارو 513 دەنگ، یەکێتی: 70 هەزارو 10 دەنگ، نەوەی نوێ:  5 هەزارو 329 دەنگ،  یەکگرتوو: سێ هەزارو 5 دەنگ، هەڵوێست: دو هەزارو 516 دەنگ، کۆمەڵ: دو هەزارو نۆ دەنگ، بەرەی گەل: هەزارو 598 دەنگ، گۆران: 706 دەنگیان هێناوە.

هه‌ر ئه‌مرۆ عیماد جەمیل، سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق له‌لێدوانێكی‌ ڕۆژنامه‌وانیدا ڕایگه‌یاند، ئەو ئەنجامانەی بڵاوده‌كرێتەوە پەیوەندی بەئه‌وانه‌وە نییە،  "ئێمە ڕۆژی دوشەممە 24 کاتژمێر دوای دەنگدانی گشتی، ئەنجامی بەرایی و هەموو زانیارییەکی پەیوەست بەهەردو دەنگدانی تایبەت و گشتیی بڵاودەکەینەوە".