عەلی رەئوف، نوێنەرێكی گشتی مامۆستایانی وانەبێژ رایگەیاند، دوای ئەوەی هەڕەشەی هەڵوێست وەرگرتنیان كردوە، ئەنجومەنی وەزیران و وەزارەتی پەروەردەو وەزارەتی دارایی هەرێم بۆ خەرجكردنی شایستە داراییەكانی مانگی 6، 7، 8ی 2024 هاتونە سەر هێڵ و بۆ مانگی نۆش وەك یەكەم موچەی مامۆستای گرێبەست، موچەكانیان لەگەڵ وەزارەتی پەروەردە دابەشدەكرێت.

ئاوێنە: عەلی رەئوف، ئەمشەو پێنجشەممە، لە راگەیەندراوێكدا وتی، دوای ئەوەی دوێنێ هەڕەشەی هەڵوێست وەگرتنیان كردوە لەبارەی شایستە داراییەكانی وانەبێژان بۆ مانگەكانی 6 و 7 و 8ی 2024 و یەكەم موچەیان وەك مامۆستای گرێبەست، ئەمڕۆ پێنجشەممە، ئەنجومەنی وەزیران و وەزارەتی پەروەردەو وەزارەتی دارایی هەرێم هاتنە سەر هێڵ.

وتوشیەتی، وەزارەتی پەروەردە راستەخۆ هاتنە سەر هێڵ بەرنامەیان ئەنجام دا بۆ سەرفکردنی شایستە داراییەکانی مامۆستایانی وانەبێژ مانگەكانی 8،7،6ی 2024 ، ئەمڕۆ نوسراویان بۆ وەزارەتی دارایی کردوە.

وتوشیەتی، ئەی ئەو پێنج مانگە لەکوێ بون بۆ نوسراوی فەرمیتان نەدەکرد بۆ شایستە داراییەكانی ئەو مانگانە، "تاوەکو ئێمە وتمان هەڵویستمان دەبێت ئەنجا نوسراوتان کرد بۆ وەزارەتی دارایی."

جەختیشی كردۆتەوە كە نابێت لەبەرامبەر ناحەقیدا بێدەنگ بیت."

وتوشیەتی، شایستەی دارایی مانگی 6ی 2024ی وانەبێژان سەرەتای هەفتەی داهاتو دابەش دەکرێت و شایستەی مانگەكانی 7 و 8یش دوای وەرگرتنی موچەی مانگی 9 دابەش دەکرێت.

ئاماژەی بەوەشداوە كە مامۆستایانی وانەبێژ كە لە مانگی نۆوە كراونەتە گرێبەست، بڕیارە یەکەم موچەی گرێبەستی مامۆستایان موچەی مانگی نۆ لەگەڵ وەزارەتی پەروەردە وەربگرن.

هەروەها عەلی رەئوف جەختی كردۆتەوە كە "هیچ مامۆستایەکی گرێبەست دور ناخرێتەوە و لانادرێت."