لیژنەی باڵای پارتی راگەیەندراوێك لەسەر پلانی ساختەكردنی 100 هەزار دەنگ بۆ یەكێتی لە پارێزگای سلێمانی بڵاودەكاتەوە.

ئاوێنە: میدیاكانی پارتی دەڵێن بە پشتیوانی ڕەیان کلدانی، ئەمینداری گشتیی بزووتنەوەی بابیلوون و قەیس خەزعەلی، ئەمینداری گشتی عەسائیبی ئەهلی حەق، 100 هەزار کەسی سەر بە حەشدی شەعبی کارتی ساختەیان بۆ دەرکراوە و لە ڕۆژی دەنگدان بەکاریان دەهێنن دەنگ بە یەکێتی بدەن، لە شوێنی ئەو کەسانەی کە ناچن بۆ دەنگدان".

ده‌قی‌ ڕاگه‌یه‌ندراوه‌كه‌:

ڕاگەیەندراوێک لەلیژنەی باڵای پارتی دیموکراتی کوردستان بۆ سەرپەرشتیی هەڵبژاردنی خولی شەشەمی پەرلەمانی کوردستان

٨ی ئۆکتۆبەری ٢٠٢٤

هاوڵاتیانی بەڕێز

دەنگدەرانی خۆشەویست

وەک دەزانن ئێمە وەک پارتی دیموکراتی کوردستان لە دوای بڕیارەکانی دادگای فیدڕاڵیی عێراق  لە چەندین شوێن لەبارەی ڕێکارەکانی ئەنجامدانی پرۆسەی هەڵبژاردن  نیگەرانیمان  دەربڕیوە، بێگومان  نیگەرانییەکانمان بەرمەبنای زانیاری بوو، بەڵام ئەوکات بەڵگەمان لەبەردەست نەبوو، ئێستا بە بەڵگەوە نیگەرانی و زانیارییەکانمان پشت ڕاست دەکەینەوە،  پشت ڕاستکردنەوەیەک، کە ئەمڕۆ لە ڕێگەی بەڵگەیەکەوە ڕووی ڕاسەتەقینەی سەرکردایەتیی تازەی یەکێتی، تایبەت (بافڵ و قوباد) دەخەینەڕوو، کە چۆن لە ڕێگەی گفتوگۆیەکی نێوانیاندا پیلانە شوومەکانیان دژ بە کوردستان، دیموکراسی، خانەوادەی شەهیدان و پێشمەرگە قارەمانەکان باس دەکەن و، لە هەوڵی تەزوویر و دیزاین کردنێکی ساختەن بۆ خۆیان و، بەوپەڕیی بێ شەرمییەوە بێ ڕێزیی بە شەهیدە نەمرەکان، بنەماڵە سەربەرزەکانیان، پێشمەرگە قارەمانەکان و دەنگدەرانی ئازیز دەکەن، تا بشێن بە پیلان و تەزوویر پرۆسەیەکی دیموکراسیی وەک هەڵبژاردن بەلاڕێدا ببەن و ناشیرینی بکەن.

هاوڵاتیانی خۆشەویستی کوردستان
ئەمڕۆ لە خستنەڕووی ئەم بەڵگەیەدا، ڕوو لە دەولەتی فیدڕاڵیی عێراق، هاوڵاتیانی کوردستان، حزب و لایەنە سیاسییەکان، تێکۆشەران، چاودێران، ڕای گشتی و کۆمەڵگەی نێودەوڵەتی دەکەین و ئەم ڕاستییەیان دەخەینە بەردەست،  ڕاستییەک کە ڕووی ڕاستەقینەی (بافڵ و قوباد) بۆ هەمووان ئاشکرا دەکات، بەڵێ ئەمەیە هەقیقەتی (بافڵ و قوباد)، ئەو دوو تازە هەڵتۆقیوەی دونیای سیاسەت، کە ڕۆژێک بۆ کوردایەتی زەحمەتیان نەکێشاوە و، هەرچی تێکۆشەری نێو حزبەکەیانە، یا سووکایەتییان پێکردوون، یا بێزار و تەریک و پەراوێز و دەریان کردوون، تا لە ڕێی ئەم جۆرە پیلان و سەفقە دوژمنکارانەیان دژ بە هەرێمی کوردستان کار بکەن و ناوبانگی دیموکراسیی ئەزموونی هەرێمی کوردستان ناشیرین بکەن.