رێباز حەملان، یاریدەدەری سەرۆك وەزیرانی هەرێم رایگەیاند، ئەمڕۆ دوشەممە، بەغدا بڕی 329 ملیار دیناری دیكەی بۆ موچەی مانگی نۆی موچەخۆرانی هەرێم ناردوە، بەڵام چاوەرێی ئەوەن كە بەغدا 243 ملیار دیناری كورتهێنانی مانگی حەوت بنێرێت بۆ ئەوەی دەست بە دابەشكردنی موچەی مانگی نۆ بكەن.

ئاوێنە: رێباز حەملان، یاریدەدەری سەرۆك وەزیرانی هەرێم لە لێدوانێكدا بۆ میدیای پارتی وتی، سبەی سێشەممە دابەشكردنی موچەی مانگی هەشت كۆتایی دێت، لەدوای ئەوەش وەزارەتی دارایی هەرێم بەزوترین كات دەست دەكات بە دابەشكردنی موچەی مانگی نۆ.

یاریدەدەری سەرۆك وەزیران وتیشی، تاوەكو ئێستا بەغدا دو گوژمە پارەی بۆ موچەی مانگی نۆ ناردوە، گوژمەیەكییان 598 ملیار دینار بوە، گوژمەكەی دیكەش ئەمڕۆ لەلایەن بەغداوە نێردراوەو گەیشتۆتە هەولێر كە بڕی 329 ملیار دینارە.

رێباز حەملان وتیشی، بەڵام هێشتا ئێمە پارەی تەواوكاریی موچەی مانگی حەوتمان بۆ نەهاتوە كە 243 ملیار دینارە، بڕیارە ئەو 243 ملیار دینارەش بەزوترین كات لەلایەن بەغداوە بنێردرێت، لەگەڵ هاتنی ئەو پارەیە موچەی مانگی نۆ دابەش دەكرێت.