وتەبێژی وەزارەتی ناوخۆی عێراق ڕایگەیاند، بەهۆی هێرش و بۆردوومانەكانی ئیسرائیل بۆ سەر لوبنان زیاتر لە پێنج هەزار لوبنانی ئاوارەی عێراق بوون، پێشتریش سەرۆكوەزیرانی عێراق ڕێنمایی بۆ ئامادەكاریی بۆ پێشوازیكردن لە ئاوارەكان لوبنان دەركردبوو.
ئاوێنه: میقداد میری وتەبێژی وەزارەتی ناوخۆی عێراق سەبارەت بە ژمارەی ئەو هاوڵاتییانەی لە لوبنانەوە ئاوارەی عێراق بوون، هەروەها كۆنترۆڵكردنی بازرگانی كردنی بە ماددە هۆشبەرەكان، لە كۆنگرەیەكی ڕۆژنامەوانیدا زانیاریی نوێی خستەڕوو.
میقداد میری ڕایگەیاند، تا ئێستا عێراق لە ڕێگەی فڕۆكەخانەكانی بەغدا و نەجەف و دەروازەی قائیمەوە پێنج هەزار و ٦٩٣ پەنابەری لوبنانی وەرگرتووە، هەروەها هەموو پێداویستییەكیان بۆ دابینكرداوە.
پێشتر محەممەد شیاع سوودانی، سەرۆكوەزیرانی عێراق ڕێنمایی بۆ ئامادەكاریی بۆ پێشوازیكردن لە پەنابەرانی لوبنان و ئاسانكاریی بۆ چوونە ناو خاكی عێراق دەركردبوو.
لەلایەكی دیكەوە وتی: لە ساڵانی ٢٠٢٣-٢٠٢٤ـدا بە ڕێژەی ٢١٠% دەستبەسەرداگرتن و كۆنترۆڵكردنی ماددە هۆشبەرەكاندا تۆماركراوە، زیاتر لە شەش تۆن و ٦٠٠ كیلۆگرام ماددەی هۆشبەر دەستی بەسەردا گیراوە، هەروەها ٥٦٩ تۆڕی ماددە هۆشبەرەكان هەڵوەشاوەتەوە، لەنێویاندا ٣٩ تۆڕی نێودەوڵەتی.
دەشڵێت: لە ماوەی ساڵانی ٢٠٢٣ـدا، ١٣٨ سزای لەسێدارەدان و زیاتر لە ٥٠٠ سزای هەتاهەتایی لە دژی بازرگانانی ماددەی هۆشبەر دەرچووە.
میقداد مێری ڕوونیشیكردەوە، ٢٠٠كم دیواری سنووری لەگەڵ سووریا درووستكراوە، سیستمی كامێرای چاودێری بەدرێژایی سنوور تەواو بوو، قولەكانیش تەواو بوون، ئەمە جگە لەوەی زیاتر لە هەزار كامێرای گەرمیی لەسەر سنوورەكە دانرا.
جێگەی ئاماژەیە، بەڕێوەبەری نووسینگەی ڕێكخراوی كۆچی نێودەوڵەتی ڕایگەیاند بوو: بەهۆی هێرشە بەردەوامەكانی ئیسرائیل بۆ سەر لوبنان، نزیكەی ٢٣٥ هەزار كەسی دانیشتووانی لوبنان ئاوارەی سووریا بوونە و ڕۆژانەش ڕێژەكە لە بەرزبوونەوەدایە.