شەوی ڕابردوو لایەنەكانی چوارچێوەی هەماهەنگیی لە بەغدا كۆبوونەوەیەكی بەپەلەى لەبارەى هێرشەكانی ئیسرائیل بۆ سەر لوبنان و غەزە ئەنجامدا، لە كۆبوونەوەكەدا پابەندبوونی خۆیان بە ڕێنماییەكانی دەسەڵاتی باڵای ئایینی لە پێدانی یارمەتی فریاگوزاری بۆ گەلی لوبنان دووپاتکردەوە.
ئاوێنه: بەشی ڕاگەیاندنی چوارچێوەی هەماهەنگی سەبارەت بە ناوەڕۆكی كۆبوونەوەكەی شەوی ڕابردووی لایەنەكانی چوارچێوەكە، ڕاگەیاندراوێكی بڵاوكردەوە كه تیایدا هاتووە، شەوی ڕابردوو لایەنەكانی چوارچێوەی هەماهەنگیی لە دیوانی سەرۆكایەتی ئەنجوومەنی وەزیرانی عێراق كۆبوونەوەیەكى بەپەلەى لەبارەى هێرشەكانی ئیسرائیل بۆ سەر لوبنان و غەزە ئەنجامدا، لە كۆبوونەوەكەدا پێشهاتە گشتییەكانی دوای كوژرانی حەسەن نەسروڵا تاوتوێكرا.
ئاماژە بەوەشكراوە، چوارچێوەی هەماهەنگی پابەندبوونی خۆی بە ڕێنماییەكانی دەسەڵاتی باڵای ئایینی نوێكردەوە بۆ پێدانی یارمەتی فریاگوزاری بۆ گەلی لوبنان و دابینكردنی هەموو شتێك كە ئازارەكانیان كەم بكاتەوە.
ئەوەش خراوەتەڕوو، چوارچێوەی هەماهەنگی سوپاسی هەوڵە گەورەكانی حكومەتی لوبنان دەكات لە تێپەڕاندنی ئەو سەختییانەی كە ڕووبەڕووی ئاوارەكانی لوبنان دەبێتەوە.
رۆژی ٢٧ـی ئەم مانگە ئیسرائیل هێرشێكی بۆ سەر چەند بارەگایەكی حزبوڵا لە شاری بەیروتی پایتەختی لوبنان ئەنجامدا، توانیان لەو هێرشەدا حەسەن نەسروڵا ئەمینداری گشتی حزبوڵای لوبنان و چەند سەركردەیەكی دیكەی ئەو گرووپە بكوژن.