باژێڕوانەكانی بزوتنەوەی گۆڕان، ئەمڕۆ شەممە، كۆبونەوەیەكی نائاساییان ئەنجامداو دەڵێن، پێویستە بەزوترین كات هەڵبژاردنی خانەو رێكخەری گشتی بزوتنەوەكە لە یەك كاتدا بكرێت و جەختیش دەكەنەوە كە هەر كەسێك بە دانان یان پێشێلكردنی دەستور بۆ هەر ئەركێك دانرابێت یان دابنرێت، جڤاتی نیشتمانی رەتیدەكاتەوە.

ئاوێنە: باژێڕوانەكانی بزوتنەوەی گۆڕان، ئەمڕۆ شەممە، کۆبونەوەیەکی نائاساییان لە مەکۆی سەرەکی بزوتنەوەی گۆڕان ئەنجامداوەو لە راگەیەندراوێكدا ئەنجامی كۆبونەوەكەیان خستۆتەڕو.

باژێڕوانەكانی بزوتنەوەی گۆڕان لە راگەیەندراوەكەدا جەخت دەكەنەوە كە "دەستوری ناوخۆی بزوتنەوەی گۆڕان بنەمای کاری یاسایی و ڕێکخراوەییمانە... پێشێلکردنی دەستور ڕەتدەکەینەوە، هەمو ڕێکارێکی یاسایی و سیاسی دەگرینەبەر بۆ جێبەجێکردنی."

دەشڵێن"پاڵپشت بە بڕیاری دوەمین کۆنفرنسی نیشتمانی و دەستوری ناوخۆی بزوتنەوەی گۆڕان، پێویستە هەڵبژاردنە ناوخۆییەکانی بزوتنەوەی گۆڕان بەزوترین کات تەواو بکرێن، هەڵبژاردنی خانەو ڕێکخەر لە یەک کاتداو بە یەک پاکێج ئەنجام بدرێ، هەرکەسێک بە دانان یان پێشێلکردنی دەستور بۆ هەر کارو ئەرکێک دانرابێ یان دابندرێ جڤاتی نیشتیمانی ڕەتیدەکاتەوە."

ئاماژە بەوەشدەدەن كە لە كۆبونەوەكەیاندا ژوری هەڵبژاردنی بزوتنەوەكە ڕاسپێردراوە بە دیاریکردنی ڕۆژێک بۆ هەڵبژاردنی ئەندامانی خانەی راپەڕاندن و ڕێکخەری گشتی.

هێمای بۆ ئەوەش دەكەن كە "دوای هەڵبژاردنی ئەندامانی خانەی راپەڕاندن و ڕێکخەری گشتی، جڤاتی نیشتمانی نوێ بڕیاری پێویست دەدات بە بەشداریکردن یان بەشداری نەکردنی بزوتنەوەی گۆڕان لە هەڵبژاردنی پەرلەمانی کوردستان، بڕیاری کۆتایی لەوبارەیەوە دەدرێت."

دەقی راگەیەندراوەكە:

ڕاگەیەندراوێک بۆ ڕای گشتی

‎ڕۆژی شەممە 21/9/2024 باژێڕوانەکانی بزوتنەوەی گۆڕان کۆبونەوەیەکی نائاساییان لە مەکۆی سەرەکی بزوتنەوەی گۆڕان ئەنجامدا، دوای تاوتوێکردنی دۆخی سیاسی و کاری ڕێکخراوەییمان، کۆبونەوەی باژێڕوانە هەڵبژێڕدراوەکان کە زۆرینەی جڤاتی نیشتیمانی پێکدەهێنن جەختی کردەوە لەسەر ئەم خاڵانە:

‎یەکەم: دەستوری ناوخۆی بزوتنەوەی گۆڕان بنەمای کاری یاسایی و ڕێکخراوەییمانە، کە ڕەوانشاد نەوشیروان مستەفا دای ناوەو پەسەندکراوی دوەمین کۆنفرانسی نیشتمانی بزوتنەوەی گۆڕانە. پاراستنی بە ئەرکی ڕێکخراوەیی، یاسایی، سیاسی، ئەخلاقی و نیشتیمانی خۆمان دەزانین، لەم ڕوانگەیەوە پێشێلکردنی دەستور ڕەتدەکەینەوە، هەمو ڕێکارێکی یاسایی و سیاسی دەگرینەبەر بۆ جێبەجێکردنی دەستور.

‎دوەم: پاڵپشت بە بڕیاری دوەمین کۆنفرنسی نیشتمانی و دەستوری ناوخۆی بزوتنەوەی گۆڕان، پێویستە هەڵبژاردنە ناوخۆییەکانی بزوتنەوەی گۆڕان بەزوترین کات تەواو بکرێ، هەڵبژاردنی خانەو ڕێکخەر لە یەک کاتداو بە یەک پاکێج ئەنجام بدرێ، هەرکەسێک بە دانان یان پێشێلکردنی دەستور بۆ هەر کارو ئەرکێک دانرابێ یان دابندرێ جڤاتی نیشتیمانی ڕەتیدەکاتەوە.

‎سێیەم: لەم کۆبونەوەیەداو بە گوێرەی دەستوری ناوخۆی بزوتنەوەی گۆڕان، کە پەسەندکراوی دوەمین کۆنفرانسی نیشتمانییە، ژوری هەڵبژاردن ڕاسپێردرا بە دیاریکردنی ڕۆژێک بۆ هەڵبژاردنی ئەندامانی خانەی راپەڕاندن و ڕێکخەری گشتی، بۆ ئەو مەبەستە ڕێکاری پێویست بگرنە بەر.

‎چوارەم: دوای هەڵبژاردنی ئەندامانی خانەی راپەڕاندن و ڕێکخەری گشتی، جڤاتی نیشتمانی نوێ بڕیاری پێویست دەدات بە بەشداریکردن یان بەشداری نەکردنی بزوتنەوەی گۆڕان لە هەڵبژاردنی پەرلەمانی کوردستان، بڕیاری کۆتایی لەوبارەیەوە دەدرێت.