تیمی كوردستانی رێكخراوی سی پی تی ئەمریكی، لەراپۆرتێكدا ئاماری قوربانییانی مەدەنی ئۆپەراسیۆنەکانی تورکیاو ئێرانی لەخاكی هەرێمی كوردستان لەنێوان 1ی کانونی دوەمی 1991 بۆ 30ی حوزەیرانی 2024 بڵاوكردەوەو دەڵێت "845 هاوڵاتی بوون بەقوربانی".

ئاوێنە: بەپێی راپۆرتەكە، بەگشتی لە ساڵی 1991ەوە، ئۆپەراسیۆنەکانی سوپای تورکیاو سوپای پاسدارانی ئێران بونەتە هۆی گیانلەدەستدانی لانیکەم 425 هاوڵاتی مەدەنی و برینداربونی 420 هاوڵاتی تری مەدەنی، کە سەرجەمیان 845 قوربانین.

رێكخراوەكە وتوشیەتی، هەروەها بەهۆی ئەو ئۆپەراسیۆنانەوە، 15 هاوڵاتی تر 10 شەهیدو 5 بریندار کە لەکاتی ئەرکی سەربازی پێشمەرگایەتی یاخود پاسەوانی سنوردا بون و بەشێک نەبون لە جەنگ و ململانێکانی سەر سنور بونەتە قوربانی. هەروەها 8 کەسی تر کە لەکاتی گیانلەدەستدانیاندا، دیلی جەنگ بون و لە زینداندا بون، بەهۆی بۆردومانی سوپای تورکیا بۆ سەر شوێنی زیندانییەکە بونەتە قوربانی و گیانیان سپاردوە.

سی پی تی هێمای بۆ ئەوەش كردوە، هەندێکجار، سوپای تورکیا و سوپای پاسدارانی ئێران، لە بۆردومان و لەشکرکێشییەکانیاندا، شوێنی مەدەنینشینیان بە ئامانجگرتوە کە بوەتە هۆی زیانگەیاندن و وێرانکردنی ماڵ، قوتابخانە، بنکەی تەندروستی، پڕۆژەی دابەشکردنی ئاو، وێستگەو تاوەری کارەبا، مزگەوت و پەرستگاو شوێنەکانی خوداپەرستی.

رێكخراوەكە وتوشیەتی، ئەو هاوڵاتییە مەدەنییانەی کە لەو ناوچانەدا دەژین یاخود دۆڵ و زەوییە کشتوکاڵییەکان بۆ کاری جوتیاری بەکاردەهێنن یان بۆ کۆکردنەوەی گژوگیای خۆڕسک ڕودەکەنە ئەو چیاو زنارانەی کە نزیکن یاخود لە سنوری دەسەڵاتی ئۆپەراسیۆنە سەربازییەکانی تورکیا و ئێراندان لە خاکی هەرێمدا، ڕوبەڕوی هێرشی بەردەوامی فڕۆکەی جەنگی، فڕۆکەی بێفڕۆکەوان و تۆپباران دەبنەوە. زۆربەی کات، سوتانی زەوی کشتوکاڵی، کوشتنی مەڕوماڵات، زیانگەیاندن بە ژێرخانی ئابوری و کاریگەری ژینگەیی ئۆپەراسیۆنەکانی هەر دو دەوڵەت، باسیان لێوە نەکراوەو قسەیان لە بارەوە نەکراوە.

بۆ خوێندنەوەی دەقی راپۆرتەكە بە زمانی كوردی لێرە كلیك بكە