وەزارەتی سامانە سروشتییەكانی هەرێم رایگەیاند، پشتگیری لە رێکارەکانی پارێزگاكان و ئیدارە سەربەخۆكان بۆ داخستنی پاڵاوگە نایاساییەکان دەکەن و جەختیش دەكاتەوە كە جگە لە هەر سێ پاڵاوگەی كارو لاناز و قەیوان مۆڵەتمان بە هیچ پاڵاوگەیەكی دیكە نەداوە.
ئاوێنە: وەزارەتی سامانە سروشتییەكان، ئەمڕۆ دوشەممە، لە راگەیەندراوێكدا وتی، "وەزارەتی سامانە سروشتییەكان بۆ پاراستنی ژینگە و تەندروستیی هاوڵاتییان پشتگیری لە رێکارەکانی پارێزگاكان و ئیدارە سەربەخۆكان بۆ داخستنی پاڵاوگە نایاساییەکان دەکات، کە بە بێ مۆڵەتی وەزارەت و لە دەرەوەی رێنماییەکان دامەزراون."
جەختیشی كردۆتەوە "جگە لە هەر سێ پاڵاوگەی كارو لاناز و قەیوان مۆڵەتمان بە هیچ پاڵاوتگەیەكی دیكە نەداوە، ئەوانیش بەپێی مەرج و رێنماییەكانی وەزارەت كار دەكەن."
ئاماژەی بەوەشداوە، پێدانی مۆڵەت بە پاڵاوگەکان لە ڕێگەی وەزارەت و پابەندبون بە رێنماییەکان دەبێت، یەکێک لەوانە پێوەرەکانی پاراستنی ژینگەیە کە لایەنی ژینگەیی بەشی هەرە گرنگی رێنماییەكانە.
وتوشیەتی، وەزارەتی سامانە سروشتییەکان بۆ پاراستنی ژینگەی کوردستان بە نوسراوی فەرمی پارێزگاكان و ئیدارە سەربەخۆكانی ئاگادار کردوەتەوە پێویستە رێکاری یاسایی بۆ پابەندکردنی موەلیدەكانی كارەبا و بەكارهێنانی گازی كوالێتی باش بە پێی خەسڵەتەكانی پەسەندكراوی وەزارەت بگیرێتە بەر و، بۆ رێگری لە ساغكردنەوەی بەرهەمی نایاسایی و خراپی پاڵاوتگەكانیش داوا لە پارێزگا و ئیدارە سەربەخۆكان کراوە تاقیگە نایاساییەکان دابخەن.
هێمای بۆ ئەوەش كردوە كە وەزارەتی سامانە سروشتییەكان بۆ داخستنی سەرجەم پاڵاوتگە نایاساییەکان ئامادەی هەماهەنگی و هاوکاری لەگەڵ پارێزگا و ئیدارە سەربەخۆکانە.