لەژێر فشاری خۆپیشاندەران، شێخ حەسینە، سەرۆک وەزیرانی بەنگلادیش دەستیلەکارکێشایەوە و وڵاتەکەی بەجێهێشت و خۆپیشاندەران چوونەتە ناو کۆشکەکەیەوە.
ئاوێنە: ئاژانسى رۆیتەرز بڵاویکردووەتەوە، ئەمڕۆ دووشەممە 5ـى ئابى 2024، شێخ حەسینە، سەرۆک وەزیرانى بەنگلادیش پۆستەکەى جێهێشتووە و بەرەو وڵاتى هیندستان هەڵاتووە.
روونیشکراوەتەوە، هاوکات خۆپیشاندەران هەڵیانکوتاوەتە سەر بارەگاى سەرەکى سەرۆکوەزیران لە دەکاى پایتەخت.
میدیاى ناوخۆی بەنگلادیش ئەوەیان ئاشکراکردووە، شێخ حەسینە بەرەو وڵاتى هیندستان هەڵاتووە، ئەوەش دواى ئەوەى خۆپیشاندانەکانى بەنگلادیش کە داواى دەستلەکارکێشانەوەى دەکەن توندوتیژى زیاترى بەخۆوە بینیوە.
هاوکات، ئاژانسى فرانس پرێس ئاشکرایکردووە، بەهۆى خۆپیشاندانەکانى بەنگلادیشەوە تاوەکو ئێستا 300 کەس کوژراون، تەنیا رۆژى یەکشەممە زیاتر لە 100 کەس کوژراون کە 13یان ئەندامانى هێزە ئەمنییەکانن.
خۆپیشاندانەکانى بەنگلادیش لە مانگى تەممووزى رابردووەوە دەستیانپێکرد، ئەوەش بۆ داواکردنى مافى یەکسانی لە دابەشکردنى هەلى کار لە کەرتى گشتیدا.