شەوی ڕابردوو سەرۆك وەزیرانی عێراق لەگەڵ پێكهاتەی عەرەب و توركمانی كەركووك كۆبوویەوە، سوودانی جەختی كردەوە لە كاركردنی بەیەك تیم و پەراوێز نەخستنی هیچ هێزێك و پێكهاتەیەكی كەركووك لە پێكهێنانی حكومەتی خۆجێی شارەكەدا.
ئاوێنه: میدیاكان بڵاویانكردەوە، شەوی ڕابردوو محەمەد شیاع سوودانی سەرۆك وەزیرانی عێراق لەگەڵ پێكهاتەی عەرەب و توركمانی كەركووك كۆبووەتەوە، سوودانی جەخت لەسەر گرنگی بەرژەوەندی هاوڵاتییانی كەركووك كردەوە، وتی: یەكەم كۆبوونەوەی ئەنجوومەنی پارێزگای كەركووك سەركەوتنی گەورە بوو.
سوودانی ئاماژەی بەوەشكرد، هەر ڕێككەوتنێكی نێوان ئەو هێزە سیاسییانەی كە لە هەڵبژاردنەكاندا سەركەوتوو بوون، نابێت دوورخستنەوە یان پەراوێزخستن هەبێت، پێویستە هەموو هێزە نیشتیمانی و كۆمەڵایەتییەكانی كەركووك یەك تیم كار بكەن.
سەرۆك وەزیرانی عێراق داوای خۆی بۆ ئەندامانی ئەنجوومەنی پارێزگای كەركووك نوێ دەكاتەوە، بۆ هەڵبژاردنی حكومەتی خۆجێی و ڕێككەوتن لەسەر هەڵبژاردنی پۆستی پارێزگاری كەركووك بە شێوەیەك كە لەگەڵ خواستەكانی خەڵكی پارێزگاكەدا بگونجێت.
لە كۆتایدا سوودانی پاڵپشتی خۆی بۆ كارەكانی ئەنجوومەن و دابینكردنی هەموو شتێك پشتڕاست دەكاتەوە، كە واقیعی ئابووری باشتر بكات و بنیاتنانەوەی ژێرخانی و خزمەتگوزارییەكانی تێدا بەرز بكاتەوە.
سەرچاوەیەك بە میدیا عێراقییەكانی ڕایگەیاند، سەرۆك وەزیرانی عێراق لەگەڵ پێكهاتەی عەرەب و توركمانی كەركووك، ڕۆژی ۱۱ـی ئابی، بۆ دووەم كۆبوونەوەی ئەنجوومەنی پارێزگاكە دیاری كردووە.
جێگەی سەرنجە، لە ئێستادا دوو ڕێگا لە بەردەستە بۆ پێكهێنانی حكومەتی خۆجێی كەركووك، یەكەمیان ڕێككەوتنی لایەنە سیاسییەكان، بەپێی سەرچاوەكان، پەدەكە و توركمان و بەشێك لە عەرەب هەوڵی ڕێككەوتن دەدەن، لێرەدا یەنەكە پەراوێز دەخرێت، كە سوودانی بەهیچ شێوەیە لەگەڵ ئەم كارە نییە، دووەمیش، لە ئەگەری ڕێكنەكەوتنی لایەنەكان خۆی ڕاستەخۆ دەستوەردان دەكات و پارێزگارێك دیاری دەكات.