شەوی رابردو سوپای تورکیا زنجیرەیەک بۆردومانی بۆ سەر سنوری ناحیەی قەسرێ لە قەزای چۆمان و کوێستانەکانی قەزای سیدەکان و گوندی گەڵاڵەی قەزای ماوەت ئەنجامدا.

ئاوێنە: كامەران عوسمان، ئەندامی تیمی كوردستانی عێراقی رێكخراوی سی پی تی ئەمریكی لە راگەیەندراوێكدا وتی، لەکاتژمێر 10:57 خولەکی شەوی رابردو، فڕۆکە جەنگییەکانی سوپای تورکیا بۆردومانی شاخی کۆخەو چیای شێخ ناسڕیان کرد لە ناحیەی قەسرێ لەسنوری قەزای چۆمان.

ئاماژەی بەوەشداوە، بۆردومانەکەی سنوری قەسرێ، زۆر نزیک بوە لە ناحیەی قەسرێ، بەشێوەیەک کە تەواوی دانیشتوانی ناحیەکە هەستیان بە بۆردومانەکە کرووە. لەماوەی یەک مانگدا، ئەمە دوەمین جارە کە دەوروبەری چیای شێخ ناسڕ بۆردوماندەکرێت.

هاوكات لەگەڵ ئەوە بەپێی قسەی كامەران عوسمان، فڕۆکە جەنگییەکانی سوپای تورکیا گوندی گەڵاڵە لە قەزای ماوەت و کوێستانەکانی لۆلان و خنێرەیان لە قەزای سیدەکان بۆردومانکرد.

هێمای بۆ ئەوەش كردوە، هیچ هاوڵاتییەکی مەدەنی نەبونەتە قوربانی بۆردومانەکانی شەوی رابردو.