سەرۆكی لیژنەی دارایی پەرلەمانی عێراق جەخت لە سوربونی لیژنەكەیان دەكاتەوە لەسەر پەسەندكردنی هەمواری بودجە بەر لە دەستپێكردنی پشوی پەرلەمان و دەشڵێت، لیژنەكەیان بڕیاریداوە سەرەتای هەفتەی داهاتو میوانداری وەزیری دارایی بكات بۆ دیراسەكردنی هۆكارەكانی زیادبونی خەرجییەكانی بەگەڕخستن لە بوجەدا.
ئاوێنە: ئەمڕۆ پێنجشەممە، لیژنەی دارایی بە سەرۆكایەتی عەتوان عەتوانی، سەرۆكی لیژنەكە، دوەم كۆبونەوەی خۆی تایبەت بە خشتەكانی بودجەی 2024ی عێراق ئەنجامدا.
بەپێی راگەیەندراوێكی نوسینگەكەی، سەرۆكی لیژنەی دارایی لەوبارەیەوە وتویەتی، ئێمە لەئێستادا خەریكی شیكردنەوەوی داتاكانی نێو خشتەكانی بودجەو گفتوگۆی وردین لەبارەی ناوەڕۆكی خشتەكان بۆ ئەوەی بەباشترین شێوەو لەماوەیەكی پێوانەییدا بودجە تێپەڕێنرێت و هەروەها كاریش لەسەر دانانی رێڕەوێكی دارایی دروست دەكەین كە هەموان كۆك بن لەسەری.
بەپێی قسەی عەتوان عەتوانی، لە كۆبونەوەكەدا بەراوردی ژمارەو تەرخانكراوە داراییەكانی نێوان هەردو ساڵی 2023 و 2024 خراوەتەڕو.
سەرۆكی لیژنەی دارایی جەختی لەوە كردۆتەوە كە پێویستە خەرجییەكان زیاد نەكرێن بەشێوەیەك ببنەهۆی زیادكردنی باری سەر شانی حكومەت.
عەتوان عەتوانی وتوشیەتی، لە كۆبونەوەكەدا لیژنەكەیان رێككەوتوە لەسەر ئەوەی كە لە سەرەتای هەفتەی داهاتو وەزیری دارایی عێراق میوانداری بكەن بۆ دیراسەكردنی هۆكارەكانی زیادبونی خەرجییەكانی بەگەڕخستن و دۆسەی پارەداركردن و پاش ئەوەش میوانداری وەزیری پلاندانان دەكەن.
سەرۆكی لیژنەی دارایی پەرلەمانی عێراق جەختی كردۆتەوە كە سورن لەسەر ئەوەی بەر لە دەستپێكردنی پشوی وەرزی یاسادانانی پەرلەمان، خشتەكانی بودجە تێدەپەڕێنن و پەسەندبكرێن.
ئەوەش لەكاتێكدایە كە رۆژی 9ی ئەم مانگە پەرلەمانی عێراق بڕیاریدا وەرزی یاسادانانی خۆی بۆ ماوەی 30 رۆژ درێژبكاتەوە.