‏‎
                   هاوژین زیبا

یاداشتی مرۆڤێکی ئەم سەردەمە کە رەگەزی (مێ)یە.
‏‎لە ناوچەیەکی سەر زەمین کە سرووشتی تا بڵێی جوان و حاڵی مرۆڤەکانی تابڵێی وێرانە، ئەم چەند دێڕە تاڵە لە راستی دەنووسم:
‏‎
تا ئەم ساتە لە پێشکەوتنی زانست، شارستانیی، هەست و بیر و ئەقڵی مرۆڤایەتیی، لەگەڵ سەرجەم بیرو باوەڕ و تێگەیشتنە جیاوازەکانی کە لە دنیادا هەن و مرۆڤ بۆ رێکخستنی ژیانی خۆی و دەوروبەری هانایان بۆ دەبات، هێشتا ئێمە (ژنان) ئەو مرۆڤانەین کە بوونمان لەپشتی دیواری "نەبینراوی" شووشەیی کەلتوور، نەریت، باوەڕ و ئایینەکان و سیستەمی سیاسیی بەرێوەبردنی ژیانی گشتیی شار، شارۆچکە، گوند و هەر ئاوەدانییەکی کە مرۆڤی لێ دەژی دەڕووانین و بۆمان نییە میچ و دیوارە شووشەکان بشکێنین و راستییەکان ئاشکرا بکەین، چونکە بەتێگەیشتنی باوی ئێستای ئێرە

‏‎ئێمە
- کەم ئەقڵین
- زەعیفەین
- کێڵگەین، عەورەتین
- بە دووان یەکین
- چوار بۆ یەکین
- ‏‎تاوانین
- تاوانباری تاوانی ئەویترین
- ‏‎پێ لەسەر بە هەشتین
- دەرکراوی بەهەشتین
- ‏‎سوتاوی ناو دۆزەخین
‏‎ئێمە
- بلووری شەرەفین
- ‏‎ترسنۆکین
- ‏‎چاو قایمین
- ‏‎پۆڵاین
- ‏شووشەین
- ‏‎وەفادارین
- ‏‎خیانەت کارین
- ‏‎ناتوانین
- ‏‎پاڵەوانین
- رەگەزی لاوازین
‏‎ئێمە
- ‏‎بە هەستین
- ‏‎بێ هەستین
- ‏‎حەرام و بڤە و بێ ئارامین
- ‏‎میهرەبانین
- جادووکارین
- ‏‎کۆڵەکەی ماڵین
- ‏‎بێ ماڵین‏
‏‎ئێمە
- “مودیر عامین”
- فەرمانبەری ناچارین
- ‏‎تایبەت بە ماڵەوەین
- ‏‎بەرپرسیارین
- ‏‎خزمەتکارین/ چێشت لێنەرین، خاوێنکەرەوەین، میوان بەڕێکەرین
- ‏‎ بێکارین
- ‏‎نابەرپرسیارین
- بەرپەرسی پەروەردەین
- ‏‎کۆڵنەدەرین
- ‏‎نمایش کارین
‏‎ئێمە
- موڵکین
- ‏‎بێخاوەنین
- ‏‎مایەی شەرمین
- عەیبەین
- شەرەفی هەمووانین
- ‏‎هەڵدەبژێردرێین
- ‏‎بێ ناسنامەین
- ‏‎بێ شوناسین
- ‏‎نازانین
‏‎ئێمە
- ماف نە ناسین
- ‏‎بە داواکارین
- ‏‎مرۆڤ نین
- ‏‎یەکگرتوونین
- ‏‎بێ رێکخراوین
- ‏‎بێ ناوەڕۆکین
- ‏‎هەر جەستەین
- ‏‎رووکەشین
- ‏‎هەڵە کارین
‏‎ئێمە
- هۆی تاوان بارین
- ‏‎مایەی سەرلێشێوان و شوورەیین
- ‏‎پرچمان درێژە
- قژ کورتین کوڕانیین
- ‏‎مەمکمان هەیە
- ‏‎سوڕی مانگانەمان هەیە
- ‏‎دایکین
- ‏‎پەرەوەردەکارین
- ‏‎بێ دەسەڵاتین
- ‏‎نەزۆکین
- ‏‎جوانین، لیمۆی ئاڵین
- ‏‎قەیرەین، گەڕاوەین، جوان نین، کۆنین نوێ نین
‏‎ئێمە
- هۆشیارین
- ‏‎هۆشیار نین، شەیتان زەفەرمان پێ دەبات
- ‏‎شەرەفی ئەوانین
- ‏‎ناموسین
- ‏‎داپۆشراوین
- ‏‎لە درزی پەچەشەوە رووتین
- ‏‎فریشتەین
- ‏‎دەستی ئەهریمەن و کانگای جادووگەرین
- ‏‎گەورەین
- بچووکین
‏‎ئێمە
- ‏‎نیشتیمانین
- ‏‎بێ نیشتیمانین
- ‏‎پارێزەری کەلتورین
- ‏‎تێکدەری کەلتورین
- ‏‎بێ زمانین
- ‏‎دەم بە هاوارین
- ‏‎پیرۆزین
- ‏‎بێزراوین
ئێمە
- بەڵاین
- ‏‎هەوێنی شیعرین، چواردە ساڵین، کارمامزین
- ‏‎هۆکاری جەنگین، شاخ لێڕوواوین
- ‏‎نەفرەتلێکراوین
- هۆی رژانی خوێن و چارەسەری خوێنین
- ‏‎منداڵی کەم ئەقڵین، گاه لیمۆی کاڵ و گاه لیمۆی کرچین
- ‏‎گەنجین
- ‏‎پیرین
- ‏‎بوکین
- ‏‎مێرد دارین
- ‏‎بێوەژنین
- ‏‎ خراپەکارین
ئێمە
- ‏‎ژنین، پێچەوانەی مەرد و نەبەردین
- نەزانین
- ‏‎ئافرەتین
- ‏‎خانمین
- بەنازین
- بە مەکر و دەمەوەر و ناشکورین
- خوشکانین
- پارێزراوین
- تاجی سەرین
- گوللەی ناو تفەنگین
- گۆڕی بێ ناوین
- خەیاڵی تێک شکاوین
- جنێوین، هۆی توڕەبوون و ئارامیین
- گڕی عەشقین
- بە کەڵهاتووین
- سوتووی ئاگری ناموسین
‏‎ئێمە
- خوێندەوارین
- ‏‎نەخوێندەوارین
- ‏‎ژیانین
- ژانین
- ‏‎مەرگین
- ‏‎ئاشووب و ئاگری بن کا و بەڵای ئاسمانین
- ‏‎هەموو شتین، شادی ماڵ و کلیلی بەهەشتین
- ‏‎هیچ نین، سفرین

‏‎ئێمە هەموو کەسین جگە لە خۆمان، ئێمە زۆر شتین جگە لە مرۆڤ.

‏‎ئێمە بە هۆکار و بە بێ هۆکار تاوانباری یەکەمین و کۆتایی ئەم ژیانەین.

‏‎ئەم هەموو پارادۆکس و گاڵتە جاڕییە، مووری ملوانکەی گەردنی ژیانی پڕ مەینەتی رۆژانەی ژنن لەم هەرێمەدا. کاتێک ژن قبوڵی نەکات ئەوا "دەم درێژ، بێ ئابڕوو، لادەر، بێخاوەن، فێمێنیست، حاشالێکراو، بێ دەروو و بێ کەسوکار و هتدە".
و سەرئەنجام لە پاش زنجیرەیەک ئەشکەنجەی سیستەماتیکی دەروونیی و فیزیکیی بێئەژمار کە بە نەریت قبوڵکراوە، دوور نییە بە کوشتن کۆتایی بێت!)

لە کاتێکدا هەموو ئەو ناوهێنان و تۆمەتانە جگە لە وەهمی پیرۆزکراو، قوڕاوی دواکەوتوویی، زەلکاوی دەبەنگیی، بێ بەهایی و پوچی ژیانیان، بێمانایی ئەقڵیەتی ژەنگ گرتووی باو هیچی دیکە نین.

‏‎زۆر بە سادەیی ژن مرۆڤە. پێویستە وەکو مرۆڤ مامەڵەی لەگەڵدا بکرێت و قبوڵ بکرێت.

٨ مارس سیمبولی تێکۆشان و خەباتی نەبڕاوەی ژنانی تێکۆشەر و قوربانیدانە بۆ رێگای رزگاری ژن لە کۆت و بەندی هەزاران ساڵەی پیاوسالاریی.
٨ی مارس جەژنی نوقڵ بەخشینەوە و جلوبەرگی ئاڵوواڵا و هەڵپەڕکێ نییە لە ناو زەلکاوی خوێنی شەرەف و نەریتی ژەنگگرتوودا.

چەند کیلۆ مەترێک لەو دیوی سنوری باشوور، رۆژئاوای کوردستانە لەوێندەر، ژن ژیانە چاند وهونەر و دیرۆکە.
، رەگی رۆچووی درەختی زەیتوونە.
ژن سیمبولی تێکۆشانە، خەبات و کۆڵنەدانە.
ژن پارێزەری ژیانە، کار دەکات، خاوەن ماف و ئەرکە.
ژن هاوسەرۆک و بڕیاردەرەی ژیانە، بە یاسا و دەستوور پارێزراوە.
لە بری گۆڕی بێناو، ژن شەهیدی ئازادیی و رۆحی ژیانە…

ئەم دووبەشە لە هەمان نەتەوە و خاک و زمان، ئایا بۆ وایە، بۆچی دەبێت هێندە جیاواز بن؟!