کتێبی "نەورۆزو بەهاری کورد" کەوتە بازاڕەوە، کە یەکەمین بەرهەمی نوێی ئەمساڵی نوسەر دوکتۆر (حوسێن موحەممەد عەزیز)ە.

ئەم بەرهەمە نوێیەی نووسەر، لە دووتوێی (282) لاپەڕە دایە. شایانی باسە، نووسەر تا ئێستە بە گشتی، (51) بەرهەمی لە بوارە جیاجیاکانی (زمانەوانی، وێژەیی، ڕۆژنامەوانی، یاد و بیرەوەری، ساتیر، مێژوو، جوگرافیا و جیۆپۆلێتیک، کۆمەڵایەتی، ڕامیاریی و نەتەوەیی)دا بڵاوکردووەتەوە، بە هەمووشی (894. 11) لاپەڕەی نووسیوە.

لە پێشەکی بەرهەمەکەدا هاتووە: (چیرۆکی "زوحاک" و "کاوە"، بڕوامان پێی بێ، یا نەبێ، بمانەوێ و نەمانەوێ، چ لە بیر و ژیانی ڕۆڵەکانی نەتەوەی کورد، چ لە مێژووی دێرینی نەتەوەکەمدا، جێی شیاوی خۆی کردووەتەوە. بۆیە ساڵانە یادی "کاوە" و جێژنی "نەورۆز"، لە سەرتاسەری "کوردستان"ی مەزندا دەکرێتەوە. ئەم بەرهەمەش، کۆڵینەوەیەکی ئەکادێمی، مێژوویی و وێژەیی دێکۆمێنتارانەیە، لە سەرەتای پەیدابوونی داستانی "کاوە"ی ئاسنگەر و جێژنی "نەورۆز"ەوە دەسپێدەکا. هەوڵێکی زانستانەیە، بۆئەوەی هێندێ لایەنی تەمومژاویی و ئەفسانەیی جێژنی نەورۆز بە گشتی، "کاوە" و "زوحاک" بەتایبەتی ڕوونکەینەوە. بۆ ئەم کارە سەختەش، نووسەر پەنای بۆ "200" سەرچاوەی کوردی، عەرەبی، فارسی و ئینگلیزی بردووە،)

ناوەڕۆکی پەرتووکەکە  

سرووشتی کوردستان، کورد و خاک،  ئەفسانە، ئەفسانە چییە؟، هێندێ زانیاری سەبارەت بە مێژووی کورد، گۆتییەکان، فیردەوسی، شانامەی فیردەوسی و شێواندنی مێژوو، زەردەشت، پاڵەوانەکانی داستانی نەورۆز: (جەمشید، فەرەیدوون، زوحاک، ئەژدیها لە شارستانییە دیرینەکانی خۆرهەڵاتدا، کاوە). نەورۆز وەک بنەمای ساڵنامە و ڕۆژژمێر، ڕۆژژمێر و مانگەکانی ساڵ، جۆرەکانی ساڵژمێر، جێژن و عید، نەورۆز چییە؟! ناونانی نەورۆز. هێندێ ڕوونکردنەوە، مێژووی جێژنی نەورۆز و داستانی کاوە، نەورۆز لە ئێرانی کۆندا، نەورۆز لە سەردەمە جیاوازەکاندا: (لەسەرەتای بڵاوبوونەوەی ئایینی ئیسلامدا، سەردەمی جێنشینەکان، سەردەمی ئەمەوییەکان، سەردەمی عەباسییەکان، سەردەمی عوسمانییەکان). یادی نەورۆز و هێندێ لایەنی دیکە، ئەژدەهاک و داستانی کاوە، هێندێ جیاوازی لە باسکردنی ڕووداوەکاندا، کێشەی کورد و نەورۆز: (دیدی گەڕیدە بیانییەکان، دیدی ئایینی ئیسلام، دیدی هێندێ ڕابەری ئایینی ئیسلام، دیدی هێندێ کەسایەتی کورد.) ئاڵاکەی کاوە، خۆڕاگری نەورۆز، خەسڵەتەکانی نەورۆز، پیرەمێرد و نەورۆز، پیرەمێرد چی لەبارەی نەورۆزەوە نووسیوە؟، چەن دیدێکی دیکە سەبارەت بە نەورۆز، نەورۆز و جەنگی نەهاوەند، دواوشە، نەورۆز و مێژوو، پێوەندی نێوان نەورۆز و سۆمەرییەکان، نەورۆز و جێژنی دارودرەخت، نەورۆز و بەهار، نەورۆز و نەتەوە یەکگرتووەکان، نەورۆز و شەم ئەلنەسیم، نەورۆز و هۆنەرانی کورد: (خانی، پیرەمێرد). نەورۆز و بۆنەی جیاواز، نەورۆز لە باخە ڕازاوەکەی هۆنراوەی کوردیدا: (برایم ئەحمەد، کامیل ژیر، گۆران، شێخ نوری شێخ ساڵح، ع. ع. شەونم، کامەران موکری. خالید دلێر، دوکتۆر ئیحسان فوواد، شێرکۆ بێکەس، عەبدوڵڵا پەشێو، قوبادی جەلیزادە.) مانگێکی پڕ لە ئازار و خۆشی، ڕۆژە غەمگین و ناخۆشەکان، ڕۆژە گەش و خۆشەکان، بەهاری گوڵ و جوانی کوردەواری، ئەم ساڵیش نەورۆز ناکەم، ئیمپراتۆریای ئاشووری پێشکەوتووترین شارستانی، دێکۆمێنت، وێنە، سەرچاوەکان.