یادەوەرییەکانی مەزنەژنێک
  2023-12-21     

پشکۆ نەجمەدین

 

دادە مەلەکە، مەلەکەی مستەفای سوڵتانی، مەلەکەی خوشکی پێنج شەهید و هاوسەری شەهید دکتۆر جەعفەری شەفیعی، پاش نزیکەی چل و پێنج ساڵان، حیکایەتە خوێنلێتکاوەکان و مەینەتی و تاڵییەکانی (تاڵەسوار) و ڕۆژهەڵاتی کوردستان، لە سێبەری (قەلەبەرد)دا، دەنووسێتەوە!

 

تۆ مەگەر کێودڵێک بیت، تا بتوانیت هەگبەی بە خوێنئاخنراوی ئەو زامانە بکەیتەوە و چەپک چەپک، لێیان ڕامێنیت و لەسەر تەونی هزرینی خۆت، ڕایانخەیت و سواڵە سواڵە، بیانهێنیت و لەبەر تیشکی هەڵلەرزیوی خۆری خوێندنەوەیان بنێیت.

من لە خوێندنەوەی ئەو ڕووداوانەدا، چەندین جاران، تەمتومانی مێژوو، سۆمای بینینی ڕەش کردم و بە ناچاری، دەرکەکانم پێوەدان و هەر لە باڵای تاڵەسوار و مەریوان و سنەم ڕوانی.

کتێبێک، بە زمانێکی سادە و ڕستەسازییەکی لە دڵنیشتوو، مێژووی بنەماڵەیەکی لەخوێندانغرۆبوو، مەریوانێکی ڕاپەڕیو، کاک فوادێکی هزرقووڵ، یەکێتیی جووتیاران، خەباتی ژنان، کۆڕەوی مەریوان، هێرشی ڕژێمی ئێران بۆ کوردستان و تیربارانکردن و ڕەشەکوژیی گەنجەکان، کۆمەڵەی زەحمەتکێشان و خەباتی سیاسی و چەکداریی ئەو لە کوردستان، شەهید و قوربانییەکانی بنەمەڵەی سوڵتانی و هەموو خەڵکی ستەمدیدەی کوردستان، ئاوارەبوون و ئۆردووگاکان، بنج و بنەمای ناکۆکییە فیکری، سیاسی و کەسەکەییەکان، بەڵا و گورزەکانی "مەنسووری حیکمەت" و هاوەڵەکانی بۆ سەر گیان و جەستەی کۆمەڵە، خەمساردی و بێوەفاییی سەرکردەکانی کۆمەڵە، لەهەمبەر قوربانیدانەکانی ئەم بنەماڵەیە و هەموو ئەم ڕووداوانە و گەلێکی دیکەش، بۆ ئێمە و نەوەی ئێستا دەگێڕێتەوە.

چاوی یادەوەرییەکانی ئەو، چ کامێرایەکی ورد و بەدیققەتە، بۆ زیندووکردنەوەی وێنەی تراژیدییەکان و چۆن ساتەوەختی شهیدبوونی کاک فواد و چوار براکەی و مەزنیی دایکە بەهییەی پێنج ڕۆڵە شەهید، وێنە دەگرێت و زیندوویان دەکاتەوە.

دایکە بەهییە، ژنێکی ناوازە و بێوینە، کە لە لەشکرگەکانی پاسدارانەوە، لە تەورێز و مەریوانەوە، تەرمی خوێناویی ڕۆڵەکانی، دەهێنێتەوە "ئەڵمانە" و بە دەستی خۆی، لە تاڵەسوار، دەیاننێژێت و ئیدی گۆڕستانیش، بۆ ئەبەد، سوور دەچێتەوە.

ئەگەر ئێمە، لە خوێندنەوەی یادەوەرییەکاندا، بتوانین بازنەی سۆز و نۆستالگیا ببەزێنین و ڕووداوە ڕێکخراوەیی و سیاسییەکانی دەروونی کۆمەڵەی زەحمەتکێشان و ئاڵوگۆڕەکانی، قووڵ و ورد، بخوێنینەوە، گەلەک شتان فێردەبین و لەو حەقیقەتانە دەگەین، کە تیور و واقیعی سیاسی و کۆمەڵایەتی و کەلتووری، زۆر لێک دوورن.

کۆمەڵە، ئەگەر لە خەباتی سیاسی و کۆمەڵایەتیدا، هەندەک داهێنانی ناوازەی کردبێت، دیسانیش هەڵگری کۆمەڵێک خەسڵەت و ئیدەی نەرێنی بووە کە سەرئەنجام، خۆی وێران کرد.

خوێندنەوەی ئەم کتێبە، لێڕامان و کۆڵینەوەی فرە و قووڵتری گەرەکە و شایەتێکی زیندووە لەسەر خەبات و تێکۆشانی چەپ و چەپخوازەکانی ڕۆژهەڵاتی کوردستان و کارەسات و مەینەتییەکانی ئەو بەشەی میللەتەکەمان، لە بزووتنەوەی ڕەوای کورددا.

دادە مەلەکە!

ئێمە دەزانین، تۆ هەڵگری چ زامانێکی خۆێنلێچۆڕاویت... زامی کاک فوادی ڕابەر و چوار براکەی دیکەت، زامی شەهید جەعفەر و مەرگی ناوادەی "بەیان"ی تاقانەتان!

تۆ ژنێکی ناوازە و مەزنیت!

تەنێکی دروست و تەمەنێکی درێژت، بۆ دەخوازم.

زۆرترین بینراو
وتەبێژی ئیدارەی بوش بۆ ڤانس: ئەوە خەتای شەڕی ئێران نییە، خەتای ئەوەیە ئێمە کۆتاییمان پێنەهێنا
بنه‌ماڵه‌ی كه‌ریم خان: به‌شداریكردنی محه‌مه‌د فه‌یسه‌ڵ له‌ كۆبونه‌وه‌ی په‌رله‌مان گوزارشت له‌ رای ئێمه‌ ناكات‌
په‌یامی توندی بافڵ تاڵه‌بانی بۆ پارتی: له‌م ده‌قه‌یه‌وه‌ له‌م حكومه‌ته‌ فاشیله‌ی هه‌رێم ده‌كشێینه‌وه‌
حەمە سوور دوشیوانی: کاردانەوەی ئەمجارەی یەکێتی زۆر توندو یەکلاکەرەوەو پشتشکێن دەبێت
بەدەل بەرواری داوا دەکات مووچەی پەرلەمانتار بکرێت بەکەمتر لە ٢ ملیۆن دینارو خانەنشینیشیان نەهێڵرێت
یەکێتی بڕیاری دا لەحکومەتی هەرێم بکشێتەوە
میدیای نزیک لە یەکێتی هۆشداری لە ئەگەری ڕاگەیاندنی "دوو ئیدارەیی" دەدات لە حاڵەتی پێکهێنانی حکومەت بەبێ یەکێتی و نەوەی نوێ
نیگەرانی لە ئەنقەرە دوای شکستی ترەمپ
به‌رپرسێكی پێشوی ئه‌مریكا: ناكۆكییه‌كانی نێوخۆی هه‌رێم ده‌رفه‌تی زیاتر ده‌ده‌نه‌ به‌غدا بۆ به‌هێزكردنی ده‌سه‌ڵاتی ناوه‌ندی
داواکاریی کوردانی ڕۆژئاوا: لەبەڕێوەبردنی ناوچەکەوە بۆ داواکردنی خوێندنی کوردی
© 2026 Awene Online, Inc. All Rights Reserved.
×