( to be, or not to be )* چەند پەیڤێک بۆ ساڵیادی نەوشیروان مستەفا ....

عەبدولرەزاق شەریف
  2021-05-18   
  چوار ساڵ پێش ئێستا و لەرۆژی یەکەمی مردن و ناشتنیەوە، گفتوگۆ و ململانێ و شەڕ، بۆ پاراستن و مانەوە و بەرز راگرتنی مێژوی پەنجا ساڵەی خەبات و پرەنسیپەکانی فکر و کار و ئاکاری سیاسی نەوشیروان مستەفا لەگەڵ کوڕەکانی و خانەوادەکەی لە لایەک، لە لایەکیتریش لەگەڵ هەردو گروپی هاوڕێ دێرینەکانی خۆی و هاوڕێ تازەکانی کوڕەکانی ( چیا ونما ) دەستیپێکرد .
( لەم وڵاتەدا گەندەڵی وەک خۆڵبارین وایە ! چەند خۆتی لێبپارێزی لە کونی ژورەوەش بیت لەگەڵ هەواوهەناسەدا، کەمێکت بەرئەکەوێ )، ئەو کە خاوەنی ئەم قسەیە بو ...  لە دوای ناشتنی بەو خۆڵەی کە هەمو تەمەنی خۆی لێ پاراست، دایانپۆشی . 
هێشتا چلەی نەچوبو بێ گوێدانە هیچ عورف و عادەتێکی کۆمەڵایەتی هەمو موڵک و ماڵی بزوتنەوەکەیان بۆ سەر دو کوڕەکەی گواستەوە و بە ئاشکرا وتیان لە پاداشتی بەشداریکردنی لە خەباتی رزگاری گەلی کوردستاندا، ئەویش وەک سەرکردەکانیتر ئەوەی بەرئەکەوێ !! زیاتر لەوەش وتیان کەسمان ئاگاداری نەبوین و ویست و وەسیەتی خۆی بوە .
بۆ یار و نەیار، باشترین وێستگەی ژیانی سیاسی بۆ دیراسە وناسینی نەوشیروان مستەفا ئەو سێ مانگەی بەهاری دوهەزاروشانزە و سەرەتای هاوینەکەیەتی کە ئیتر بە دوایدا، رۆیشت و جگە لە چەند دێڕێکی ناو کۆبونەوەیەکی لەندەن، بۆ هەتایە لای خەڵک دەنگی نەما .
لەو سێ مانگەدا : 
- رێکەوتنێکی سیاسی بە بیستوپێنج خاڵ لەگەڵ( ی ن ک )دا ئیمزا کرد، وەک بنەما و نەخشە ڕێگەیەک و دوا هەوڵی خۆی بۆ چارەسەری کۆی قەیران و کێشەکانی هەرێمی کوردستان . 
- بە تۆمەتی تیرۆر ( لەدادگا و دەزگاکانی ئەو حکومەتەی کە خەون وخەیاڵ و ئەنجامی خەباتی تەمەنی سیاسی خۆی بو ، بە چنگەکڕێ دروستیکردبو، هەرواش پارێزگاری لێکردبو ) فەرمانی گرتنی بۆ دەرچو ... وەک گرنگترین روداو لە مێژوی ژیانی سیاسی و کۆمەڵایەتی خۆیدا، پێیان راگەیاند، گەورەترین کاریگەری هەمەلایەنەی لەسەر بیرکردنەوە و ڕوانینەکانی جێهێشت .
- بارتەقای هەمو ژیانی سیاسی خۆی وەفد و نوێنەرانی وڵاتان و دیبلۆماتکاری بە نهێنی و ئاشکرا بینی .
- فکرەی بە (مەسکەن و قەبر ) کردنی گوندێکی بناری قەندیل، پرۆژەیەکی جدی بو لە مێشکیدا، بەو مەبەستە پەیوەندی بە چەند هاوڕێیەکیەوە کرد کە شوێنی بۆ چێ بکەن، ئامادەییان دەربڕی و بەداخەوە بە بیانوی مەوعید و عیلاجی نەخۆشیەکەی کوڕەکانی لێیان تێکدا .
هەر لەو سەروەختەدا، لە دیدارێکی نوێنەرەکانی سەفارەت و سوپا و دیبلۆماتە بەریتانیەکاندا، وەفدی میوان کتێبی ( هاملێتی شکسپیر ) یان پێشکەشکرد، لەمیانی گفتوگۆکانیشیاندا، پرسیاری پەیوەندیەکانی نێوانی خۆی و مەسعود بارزانی و ( ب گ و پ د ک )یان بە ئاراستەی پێکهاتن لێکرد . هێشتا کتێبەکەی بەدەستەوە بو بە ئاماژەیەک بۆ ناوەکەی شکسپیر، لە وەڵامدا وتی :
پرسیاری جەوهەری ئەوەی شکسپیرە ( to be, or not to be ) .
بەم وەڵامە کورت و پوخت و فەلسەفیە، کاک نەوشیروان وەفدی میوانی تێگەیاند، ئەوانیش بەسەرسامیەوە تێگەیشتنی خۆیان نیشاندا و پرسیاریتریان لەو بارەیەوە نەکردەوە .
هەمو ئەو رۆژانە، وەک دوا تیری کەوان لای نەیار و دوژمنەکانیەوە ئاراستەی ئەکرا، ئەویش وەک خاڵی روبەروبونەوە و بەرگری هەمو ساڵەکانی تەمەنی سیاسی خۆی تەماشای ئەکرد . 
( هەبم یان ئەبێ نەبم ) ئەو پرسیارەی شکسپیر بو هەمو چرکەیەک بەمێشکیدا، گوزەری ئەکرد، ( ئەبێ نەمێنێ )ش ئەو بریارە بو کە پارتی و حکومەت و دادگای هەرێمی کوردستان بەرنامەیان بۆ داڕشتبو کاریان بۆ ئەکرد ... 
کاک نەوشیروان لە نێوان کەوتن و مردن یان بەپێوە وەستان و جاویدانی، دوەمیانی هەڵبژارد .
بەڵام ئەفسوس لە دوای خۆی، چفاتی حیزبەکەی و کوڕەکانی لەمانای ئەو پرسیارە و لە مانای نەمریی تێنەگەیشتبون.

وتاری زیاتر

زۆرترین بینراو
سەرچاوەیەکی ئاگادار بۆ ئاوێنە: کۆبوونەوەی یەکێتی‌و پارتی بێ ئەنجام بووەو یەکێتی دوو داواکاری ھەیە
کۆبونەوەکەی یەکێتی و پارتی کۆتایی هات
یانه‌ی هه‌ولێر: له‌لایه‌ن به‌شێك له‌ هێزه‌ ئه‌منییه‌كانی یاریگای دهۆك هێرشی دڕندانه‌مان كرایه‌ سه‌ر
ترەمپ: ئێستا رووبەڕووی سەرکردەی سێیەم بوینەتەوە و دوای ئەو کۆتایی ریژێمە
زەیدی بانکی تی بی ئای ڕاسپارد 100 دۆلار بە 152 هەزار دینار بفرۆشێت
عراقچی: یۆرانیۆمی پیتێندراوی ئێران نابرێته‌ ده‌ره‌وه‌ی وڵات به‌ڵام ده‌كرێت له‌باره‌یه‌وه‌ بگه‌ینه‌ رێگه‌چاره‌یه‌ك
وه‌زیری ده‌وڵه‌تی عێراق و وه‌زیری وزه‌ی توركیا تاوتوێی پشكی توركیا له‌ كێڵگه‌ نه‌وتییه‌كانی كه‌ركوك ده‌كه‌ن
مه‌سعود بارزانی و فالح فه‌یاز: كێشه‌كانی نێوان هەرێم و عێراق لە چوارچێوەی دەستور قابیلی چارەسەرن
ره‌حمان غه‌ریب بۆ میدیاكانی پارتی و یه‌كێتی: شەڕی تۆخكردنی زۆنچێتی و كۆنەقین بوەستێنن
سوپای پاسداران: درۆنێكی ئه‌مریكیمان له‌ ئاسمانی گه‌روی هورمز تێكشكاند
© 2026 Awene Online, Inc. All Rights Reserved.
×