ئەزانم زۆرێک لە کورد دژی ئەم بابەتەم دەبن چونکە ئێستا زۆرێک لە ڕۆژنامەنوسانی نەتەوەکەم لە ژێر کاریگەری بڵاوکردنەوەی پڕوپاگەندەی ئیتلاعات و میتن. بەڵام با نەفەس درێژ بین، دوای چەند ساڵیکی تر ڕون دەبێتەوە کە ئەم بابەتەشم، بە هەمان شێوەی بابەتی: "نەخێر بۆ پرۆژەکەی مام جەلال" کە لە دژی پرۆژەی لە سەدا سیی و دوی مام جەلال نوسیم، تێفکرینەکانی ئەم بابەتەشم سەد لە سەد بۆ تاکەکانی نەتەوەکەم دەسەلمێ!
فەرمانی حکومەتی تورک، لە ڕێی بەکارهێنانی ئۆجەلانەوە، بۆ کۆتاییپێهێنانی ڕۆڵی پەکەکە لە شاخەکانی باشوری کوردستان داو، بردنیان بۆ وڵاتی سێیەم و، ئینجا گەڕاندنەوەیان بۆ ناو تورکیا، پرسێکە، نەک تەنیا بەم بابەتە خێرایە، بگرە مشتومڕی زیاتری دەوێ! ئامانجەکە وەک لە بابەتی پێشوم کە لە ئاوێنە بڵاوکرایەوە ئاماژەم پێدا: بەتایبەت بۆ فرۆشتنی خۆراوای کوردستانە!
عەقڵی زۆر کەس نەیدەبڕی، کە پەکەکە بە گوێی فەرمانی ئۆجەلان-دەوڵەتی تورک بکات و، بێمەرج ڕایبگەیەنێت کە ئامادەیە هەم چەکدابنێ و، هەمیش خۆی هەڵوەشێنێتەوە! واتە: عەقڵی زۆر کەس نەیدەبڕی کە میت ناڕاستەوخۆ توانای ئاڕاستەکردنی پەکەکەی هەبێ!
لێرەدا پرسیارێک دێتە پێشەوە: ئایا ئایدۆلۆژیای چەپی-یۆتۆپیی پەکەکە مەترسیدارترە نییە لە ئایدۆلۆژیای گروپە ئیسلامییە سیاسییە کوردییەکان بەرانبەر [ناسیۆنالیزمی کوردی]ی کە ئامانجی ڕزگاریی نیشتیمان [خاک]ی کوردستانە؟
ئەگەر مەترسیدارتر نییە، چۆن و بۆچیی پەکەکە دژی دروستبونی دەوڵەتی کوردستانە لە هەر پارچەیەک داو، چۆن بەردەوام ڕایدەگەیەنێت دژی سیستەمی دەوڵەت-نەتەوەیە! ئەمەشی تەنیا بۆ دژایەتی ناسیۆنالیزمی کوردییە. نەک دژایەتی دەوڵەت-فاشیستی ئەسەد کە دروستکەری پەکەکە بو، نەک دژایەتی دەوڵەت-ڕەیسیستی فارس و تورک کە هەڵسوڕێنەرانی پەکەکەن!
زیاتر لەوانەش، بەپێی دەستوری تورکیا، دانیشتوانی تورکیا: تورکن. کەوابو، پرسیار ئەوەیە: چۆن پەکەکە بەبێ گۆڕانکاری لە مادەکانی دەستوری تورکیا، دان دەنێت بەوەی کە تورکیا ئیتر بەرەو کۆمەڵگەیەکی دیموکراسیی ڕاستەقینە هەنگاو دەنێت و خۆی هەڵدەوەشێنێتەوە؟ ئایا ئەم کۆمەڵگەی دیموکراسیی-ڕاستەقینەیەشی هەر پڕوپاگەندەو هەوڵێکی تری نییە بۆ جوانکردنی ڕوخساری دەوڵەتی تورک و تەنانەت محەمەد جۆلانیش لە ئاستی جیهان دا!؟ ئەڵبەتە من لەو دیدەوە ئەو پرسیارە دەکەم کە پەکەکە بڕوای بە مەسەلەی کورد کە ئامانجی ڕزگاریی نیشتیمانیی کوردستانە نییە! بەڵکو بڕوای بە عەشقی-خەیاڵیی برایەتی گەلانە. چونکە هەر حیزب یان ڕێکخراوێک کە بڕوای بە پرسی کورد هەبێت، دەبێت داوای مافی تایبەتمەندێتیی خاک [جوگرافیا]ی هەر بەشێکی کوردستان بکات. چونکە مەسەلەی کورد: پرسی نیشتیمانە (پرسی خاک)ە، نەک پرسێکی دیموکراسیی و عەشقی برایەتیی گەلان.
دەگونجێت دیموکراسیی کاریگەریی هەبێ. بۆ نمونە؛ ڕۆژگارێک حکومەتێک لە ئەنقەرە، تاران، بەغدا یان دیمەشق بێتەسەرکار کە تۆزقاڵێک بڕوای بە دیموکراسیی هەبێ. وەلێ، دەکرێ دوای ئەوە حکومەتێکی دژە دیموکراسیی لە شوێنی حکومەتەکەی پێشو بێتەوە سەر حوکم. زۆر نمونەش لەم بارەیەوە هەن و، ساغی دەکەنەوە کە وڵاتانی خۆراوای [دیموکراسیی!!]ش نەیانتوانیوە [بەتەواویی!!] مافی ڕزگاریی نیشتیمانیی و ناسیۆنالیزمی گەلان فەراهەم بکەن. بۆ نمونە: پرسی هەرێمی بەرشەلۆنە لە ئیسپانیا و هتد.
بۆیەشە گرنگە سەرکردەکانی کورد زیاتر خاکفرۆشیی نەکەن و، مکوڕ بن کە پرسی ناسیۆنالیزمی کوردی: مەسەلەی ڕزگاریی نیشتیمان [خاک]ی کوردستانە، نەک پرسی بە دیموکراسییکردنی دەوڵەتی ناوەند. چونکە پرسی دیموکراسیی لە دەوڵەتە ناوەندەکانی ئەنقەرە، تاران، بەغداو دیمەشق پرۆسەیەکە سەدان ساڵی تری دەوێت و، هیچ گەرەنتیش نییە کە سەدەیەکی تریش مەیسەر ببێت و، گەرەنتیش نییە و بەو مانایەش نییە کە دیموکراسیبونی ناوەندیش یەکسان بێت بە: ڕزگاریی نیشتیمانی کوردستان.
ئینجا، لەگەڵ ئەوەی هێزە ئیسلامییە سیاسییەکانی کوردستان، سۆز و سیخوڕییان بۆ ڕژێمە داگیرکەرە ئیمپریالیستەکانی تورک، فارس و عەرەب هەمیشە هەبوەو هەیە: بەڵام کەی هێزێکی ئیسلامی-سیاسیی کوردیی هێندە بێشەرمبون، بە هەمان ئاستی بێشەرمیی پەکەکە و یەکێتیی و کۆمەڵەکانی ئێران، ڕایگەیەنن کە دژی دروستبونی دەوڵەتی کوردیین، چونکە پەکەکە بەردەوام ڕایدەگەیەنن، کە: باوی دەوڵەت-نەتەوە و دەوڵەتی کوردیی نەماوە.
بەڵام بۆ تورک، فارس، عەرەب، چینیی، ڕوسیی، ئەڵمانیی، ئینگلیز، ئیسپانیی، ئیتالیی، سویدیی، نەرویجیی و، ئەرز و ئاسمان، دەوڵەت-نەتەوە هەیەو، هەر دەشمێنێ! ئایا لە هەر یەکێک لەم دەوڵەتانەدا، هەمو شتێک بە زمانی ئەو نەتەوانە نییە؟ مەگەر زمان سەرەکیترین تایبەتمەندی دەوڵەت-نەتەوە نییە؟ مەگەر سنوری نیشتیمانیی تایبەت بە خۆیان نییە؟ مەگەر تازە بە تازە بیریی [ناسیۆنالیزمی ئەمریکاییبون] بە فۆرمێکی ترسناکتردا گەشەی نەسەندوە؟
لە کوێ باوی دەوڵەت-نەتەوە نەماوە: تەنیا لە عیشق و غەراماتی ئاپۆ، بایک، قەرەیلان، عەبدی، یەکێتیی و کۆمەڵەکانی ئێران بۆ مانەوەی ئیمپریالیزمەکانی ئەنقەرەو بەغداو تاران لەسەر نیشتیمانی کوردستان؟ ئایا ئەم عیشقە یۆتۆپییەیان لە هزری ئیمپریالیستانەی داگیرکەرانی کوردستانەوە بۆیان هاوردە نەکراوە بە ئامانجی شۆردنەوەی بیری ناسیۆنالیزمی کوردیی؟ ئایا پەکەکە بە کام پێوەر و ڕەوشتی نەتەوەیی بونەتە هۆی شتنەوەو بەکارنەهێنانی وشەی "کوردستان"؟
چونکە هەم پەیامی ئۆجەلان و هەمیش ڕێکەوتنی عەبدی لەگەڵ جۆلانیی، وشەی "کوردستانی تورکیا" یان "کوردستانی سوریا"ی تێدا نەهاتوە. تەنیا دەستەواژەی "کۆمەڵگەی کوردی"ی تێدا هاتوە. ئێ کۆمەڵگەی کوردی لە ئەمریکا، بەریتانیاو ئەڵمانیاش هەیە! بەڵام کوردستان لە ئەمریکا، بەریتانیاو ئەڵمانیا نییە. پرسی کورد: پرسی تایبەتمەندی خاکە. پرسی نیشتیمانە؛ نەک کۆمەڵگە!!
ئینجا ئەگەر پەکەکە گرێدراوی ئامانجەکانی ئیمپریالیزمەکانی داگیرکەری خاکی کوردستان نین: بۆچی پەکەکە گرنگی بە "زمانی کوردی"ی نادەن و زۆرینەی باکوری کوردستان زمانی کوردییان لەبیرچوەتەوە؟
لێرەدا گرنگە بزانین، کە: داگیرکەرانی کوردستان مێژویەکی دەوڵەمەندیان هەیە لە دروستکردن و بەکارهێنانی ڕەوتی کوردی ساختە دژی جوڵانەوەی نەتەوەیی کورد، بەتایبەت لە ڕێی بەکارهێنانی سۆزی ئاینیی و دروستکردنی ڕەوتی چەپی-ساختەی کورد دژی بەرژەوەندییە نەتەوەیی و نیشتیمانییەکانی کوردو کوردستان. وەک جیاکردنەوەی باڵی مەکتەبی سیاسیی پارتیی. هەروەها وەک چۆن لە ساڵانی هەشتاکان، بەهۆی ئەوەی حافیز ئەسەد پشتیوانی ڕژێمی ئێران بو، هاوکاری تاڵەبانیی دەکرد کە پشتیوانی کۆمەڵەی ئاغاکانی دیبوکری (ئاغا عەبدوڵای موهتەدی و ئاغا عومەری ئیلخانیزادە) بکەن دژی بیری مۆدێرنی ناسیۆنالیزمی کوردیی قاسملو. ئەوەبو، ئەو ساڵانە، کۆمەڵەی ئاغا عەبدوڵای موهتەدی، لە ژێر فەرمان و ئایدۆلۆژیای فارسیست-مارکسیستی مەنسور حیکمەت دا، بە هاوکاری حافیز ئەسەدی خومەینیست و بەڕێڕەوی تاڵەبانیی، لە ژێر ناوی چەپبون و پێشکەوتنخوازیی و نەمانی باوی دەوڵەت-نەتەوەدا، دژی ڕەوتی ناسیۆنالیزمی کوردی لە خۆرهەڵاتی کوردستان وەستانەوەو چەندان ساڵ شەڕیان دژیان ئەنجام دا. بۆ ئەوەی تەرکیزی ڕەوتی ناسیۆنالیزمی خۆرهەڵاتی کوردستان لەسەر داگیرکەر نەمێنێ و، سەرقاڵ بێ بە شەڕی کۆمەڵەی دروستکراوی تاڵەبانیی-حافیز ئەسەدەوە! واتە: ئەم ڕەوتە چەپە-ساختانەی کورد کە حافیز ئەسەدی بەعسیست دروستی دەکردن لە پێناو ئەو ستراتیژە دابو کە ناسیۆنالیزمی کوردی لە ئامانجی دروستکردنی دەوڵەتی نەتەوەیی کوردی لابدەن بۆ ئامانجی فەنتازی برایەتیی گەلان کە تێیدا کورد لە ژێری عەرەب، فارس و تورک دا بێ!
ڕونە، زۆرێک لە سەرکردە، نوسەر و فەیسبوکەوانی کورد کە چەپی-فەیکن: وەک حوجەتولئیسلام مەلابەختیار، یان ئیسلامیی سیاسیین: وەک سەلاحی بەهادین و قەرداش عەلی قەراخی و موجاهیدی ڕزگارکەری غەززە لە ناو ڤێلاکانی هەولێرەوە ئاغای عەلی باپیر، یاخود سەر بە میت و ئیتلاعات و یەکێتیین [بە بەیاننامەکەی بافڵ بۆ ڕێکەوتنەکەی عەبدی-جۆلانیی]شەوە هەر هەمویان وەسفی پەیامەکەی ئۆجەلان و ڕێکەوتنەکەی عەبدی-جۆلانییان کردوە.
ئەزانم ئەم دێڕەم قورسە. بەڵام نایشارمەوە تێفکرینم ئەمەیە: ئەوەی ئێستا پەکەکە-هەسەدە [ئۆجەلان-عەبدی]دەیکەن: [نیشتیمانپەروەریی] نییە. ئەگەر تەنانەت هەر هەمو کورد بۆچونیان دژی ئەم تێفکرینەی من بێ: داهاتو دەیسەلمێنێ کە هەر هەمویان هەڵەن. چونکە پێوەرەکانی ناسیۆنالیزمی کوردی لە پەیامەکەی ئۆجەلان و ڕێکەوتنەکەی عەبدی-جۆلانیی دا بونی نییەو ڕەنگی نەداوەتەوە.
ئەمەی ئەردۆگان لە ڕێی بەکارهێنانی ئۆجەلانەوە بە پەکەکەو مەزڵوم عەبدی کرد: بە ئامانجی لەدەستدانی دەرفەتە زێڕینەکەی گۆڕانکارییەکانی ناوچەکەیە لە دەست کورد. تائێستا هەم لە باکور و هەم لە خۆراوای کوردستانیش، تەنیا ئەردۆگان براوەیە لە بەکارهێنانی ئاپۆ-عەبدی. لە داهاتو ڕونتریش دەبێتەوە. هەروەک چۆن خەزعەلی پاسدارێکی ئێرانە: جۆلانییش جەندرمەیەکی تورکەو، بێ پرسکردن بە دەوڵەتی تورک هەنگاو نانێت! تورکیا لە ڕێی قەتەر و جۆلانیی ئیشی خۆیان بە مەزڵوم عەبدی شوێنکەوتەی پەیامەکەی ئۆجەلان کردو، [کەناڵی ڕوداوی] خەتی تورک-فارسیش بەردەوام پڕوپاگەندە بۆ ڕێکەوتنەکە دەکات!!! بۆیەشە تۆی خوێنەر بۆچونت هەرچۆنە؛ گرنگ نییە بەلامەوه. گرنگ ئەوەیە: تەنیا نوسەری کوردم کە خاوەن بۆچونی لۆژیکیانەو ئازایانەی خۆمم و پێموایە: ئۆجەلان و عەبدی ئێستا لەسەر سکەی نانیشتیمانین! ئەو کەس و لایەنەش کە ئەمەیان بەسەر عەبدی هێناوە: ئۆجەلان و پەکەکەن! واتە عەبدی فەرمان لە پەکەکە وەردەگرێت. بەڵام کورد زەرەرمەند دەبێت، چونکە خۆراوای کوردستانیشیان، وەک باکور، فرۆشت. [کات]ی پێویستە هەتا لای خەڵکی کوردستان ئەم تێفکرینانەم ڕونتر دەسەلمێن!
بەدرێژایی دەیان ساڵی ڕابردو، کە پەکەکە زاراوەی "کوردستان"یان لە فەرهەنگیان شۆردۆتەوەو، دروشمی عاشقانەی یۆتۆپی داگیرکەرانیان هەڵگرتوە لە ژێر ناوی: "برایەتیی گەلان": هەمان ئەو بۆچونەیە کە بەڵگەنامەیەکی بەریتانیی ئاشکرای دەکات کە لە دیدارێکی تەلەفزیۆنیی نێوان عەفلەق و ئیبراهیم ئەحمەد لە شەستەکان دا، موشیل عەفلەق باسی برایەتیی گەلان دەکات کە کورد پشتیوانی ناسیۆنالیستەکانی عەرەب ببێت و ئیبراهیم ئەحمەدیش [بەڵێ]ی بۆ دەکات. ئەوکات باڵی مەکتەب سیاسیی پارتیی لە مەلامستەفا جیابوبونەوەو، وەک ئێستای پەکەکە، خۆیان بە چەپی پێشکەوتوخوازی دژە زایۆنیزم و دژە دەوڵەت-نەتەوەو پشتیوانی ناسیۆنالیزمی عەرەب [بەعسیزم و ناسریزم] دەزانیی.
ئەمەی ئێستا لە ڕێکەوتنی نێوان جۆلانیی-عەبدی ئیمزاکراوە، ئەگەر عەبدی ڕێگا بدات جێبەجێ ببێت: عەبدی لە مێژوی کورددا، لە حەسەن خەیری بەگی دەرسیم، نانیشتیمانیبوونەکەی خراپتر دەبێ. ڕێک لە مێژودا دەبێتە هاوئاستی ئەوانەی ڕێکەوتنامەی شانزەی ئۆکتۆبەریان کرد.
ئەیڵێمەوە: با تەنانەت گریمان هەمو کورد وەسفی ئاپۆ-عەبدی بکەن. لەملاشەوە من تەنیا بم و ئەمە تێفکرینم بێ و بۆچونەکەم جیاواز بێ: داهاتو دەیسەلمێنێ بۆچونی زۆرینە دروست دەبێ یان هی من!! هیوادارم عەبدی لەکردەوەدا ئەو ڕێکەوتنامەیە جێبەجێ نەکات و، قەوارەی خۆسەر تەنیا لەلایەن شەڕڤانانی کوردەوە بپارێزرێ و، بە سوپای عەرەبی نەفرۆشن!!
پەکەکە-هەسەدە دەستیان کردۆتە بیانو هێنانەوەو پڕوپاگەندەی درۆ بۆ خاکفرۆشییەکەیان، گوایە ئەمریکییەکان بە هەسەدەیان وتوە بەزویی لە خۆراوای کوردستان دەکشێنەوە. [کات] ڕونتری دەکاتەوە کە ئەم پڕوپاگەندەیەشیان ڕاستە یاخود نا؟ بەڵام گریمان ئەمریکا پشتی تورکیا نادات لە زەوی: بەڵام ئایا تۆ شۆڕشگێڕیت یان نیشتیمانفرۆشیت؟ ئایا ئێوە بەکرێگیراوی ئەمریکان کە ئەمریکا هەرچی وت و هەرچی پێکردن: بیکەن، یان شۆڕشگێڕی نەتەوەکەی خۆتانن، کەوابو چەپە-ساختەکانی کورد: داردەستی چەندسەرەن! ئایا ئەمریکا مادەی سەدوچلی جێبەجێ کرد هەتاکو گەرەنتی هەبێت کە مافی نەتەوەیی خۆراوای کوردستان دێنێتە دی؟ یاخود ئەمە بیانو هێنانەوەتانە و لە بنەڕەت دا پەیامەکەی ئاپۆ -کە فەرمانی ئەردۆگانە- جێ بە جێ دەکەن؟ لەکاتێکا ئەمریکا نەیشاردۆتەوە کە هەمیشە بە دوای بەرژەوەندییە نیشتیمانییەکانی خۆیەتیی و بەس. ئەمریکا ئێستا حساب بۆ بەرژەوەندییەکانی ئەوروپا بە فەرەنساو بەریتانیاشەوە ناکات: ئێستا حساب بۆ مافی خۆراوای کوردستان دەکا: هەڕگ وەسەری چەپی-ساختەی نیشتیمانفرۆشیی کورد!
چەپەکانی هەمو نەتەوەکانی دنیا، لە چەپی ڕوسەوە تا هی فەرەنسیی و ئەڵمانیی ئەوپەڕی نیشتیمانپەروەر بون و هەن. کەچی ڕێک بەپێچەوانەوە، زۆربەی ڕەوتە چەپە-ساختەکانی کورد، هەر لە باڵی مەکتەبی سیاسیی پارتیی بە فۆرمی یەکێتیی-بونیشیانەوە تا کۆمەڵەکانی ئێران و پەکەکە: هەر هەمو سەرکردەکانیان کەسانی فشەکەر، پڕوپاگەندەچیی، بێپرەنسیپ، زارخراپ، ستەمکار بۆ کوشتنی ڕۆڵەکانی کورد، نیشتیمانفرۆش و ترسنۆک بەرانبەر بە داگیرکەران بون و هەن! ئەمەش سەلمێنەری ئەوەیە: داگیرکەرانی کوردستان دروستیان کردون و، بەردەوام هەڵیان دەسوڕێنن!
مەگەر بە قسەی جەلال تاڵەبانیی و نەوشیروان، جۆرج بۆش تەلەفونی بۆ مەسعود نەکردبو کە پێشمەرگە هەڵوەشێنێ و تێکەڵاوی سوپای عێراقی بکات: کەچی مەسعود ڕازی نەبوبو؟ ئەی ئێوەی چەپی-ساختەی فشەکەری کورد بۆچی لە محمد جۆلانی ترسان و ڕازی بون؟ یان حەقیقەتەکە ئەوەیە: جێبەجێکاری پەیامەکەی ئۆجەلانن کە چەکدابنێنن کە فەرمانی ئەردۆگانە!؟
ئەوەی لە ١٩٦٣ بەریتانیا و جەمال عەبدولناسر بۆ دابەشکردنی ناسیۆنالیزمی کورد گرتیانەبەر کە پشتیوانی باڵی چەپی بزوتنەوەی کورد بن دژی دروستبونی دەوڵەتی کوردی، تا ئێستاش درێژەی هەیە. هەر باڵە چەپە-ساختەکە کە پەکەکەو هەسەدەن بە ڕێڕەوی یەکێتیی و کەناڵی ڕوداو دا تا دەگاتە کۆمەڵەکانی ئێران ڕۆڵی پارێزگاری لە مانەوەی قەوارە دروستکراوەکانی ئەنقەرە، تاران، بەغداو دیمەشق دەبینن.
بەداخەوە، ئەوەی لە بابەتەکانی پێشوم لە ئاوێنە بڵاومکردەوە، بە دروستی هاتەدیی و، پێشتر پیلانەکەی ئەردۆگانم خوێندەوە. ڕێک پیلانەکەی ئەردۆگان بۆ بەکارهێنانی ئۆجەلان بو بەتایبەت بۆ خۆراوای کوردستان!
ڕێکەوتنێک کە دەستەواژەی [کۆنفیدراڵیی، فیدراڵیی، یان ئۆتۆنۆمیی و خۆسەری]ی بۆ تایبەتمەندێتیی خاک و جوگرافیای [خۆراوای کوردستان] لەخۆنەگرێت، مانای فرۆشتنی خاکی خۆراوای کوردستانە. چونکە پرسی کورد: پرسی خاکی کوردستانە. مانای ئەوەیە: پەکەکە هەستاون فەرمانیان بە مەزڵوم عەبدی کردوە بۆ ئەم هەڕاجفرۆشکردنەی خاکی خۆراوای کوردستان! ئائەمەیە کە لە ٢٠١٤ ەوە لە دەیان بابەتم دا هاوار دەکەم کە ترسناکە پەکەکە بە ئایدۆلۆژیاو عیشقی "برایەتیی گەلان" مامەڵە بە خۆراواو باکوری کوردستانەوە بکا. ئەوەتا عاقیبەت بە داگیرکەرانی فرۆشت!
ڕێکەوتنێک هێزەکانت تێکەڵ سوپای عەرەبیی سوریی بکەیت! ڕێکەوتنێک کە لە ژێر ئیمزای سەرۆک کۆمارەکەی دا دەستەواژەی [سەرۆک کۆماری "عەرەبیی" سوری]ی بێ!!
وەک وتم: بەداخەوە، ئەوەی لە بابەتەکانی پێشوم پێشبینیم بۆی کرد؛ هاتەدی! پارتیی و یەکێتیی وا دەزانن کاتێک کە پەکەکە-هەسەدە خۆراواوباکوری کوردستان دەفرۆشن بۆ ئەوانیش تاسەر ئارام دەبێ؟ ئایا ئەردۆگان و ئێران بە تەمان چی تر بەوانەی قەندیل بکەن و کێ بەرەو باشوری کوردستان بنێرن؟ من ماوەیەک خۆم بێدەنگ دەکەم: ئادەی با ئەو هەمو ڕاوێژکار و پڕۆفیسۆرانەی یەکێتیی و پارتیی بتوانن خوێندنەوەی دروست بۆ داهاتو بکەن!؟
داوای لێبوردن لە خوێنەران دەکەم لە هەڵەی ڕێزمانی نوسینەکەم. بە خوا سەرقاڵم و مەجالی پیاچونەوەم بەم بابەتەم نییە. بەڵام لە نیشتیمانپەروەربونم وتم: با وەک بەڵگە ئەمەش بمێنێتەوە کە تێفرکرینم لەسەر ئەم پرسە چییە! تا چەند مانگێکی تر با منی ناسیۆنالیستی بێلایەن بێدەنگ بم.
شەریف عەلی