دوای "جر الحبل"ی چەند ساڵێک نێوان بەغدا و هەولێر دەربارەی بودجە و موچە و گەمە قێزەوەنەکانی دەسەڵاتی شۆڤینزمی نەتەوەیی و مەزهەبی " ئەخیرەن" عەرابی ئەم دەسەڵاتە دەڵێت " بەردەوام دەبین لە دانی موچەی هەرێم".
ئەم زاتە شیعە سودانیە ئێستاشی لەگەڵدا بێت خۆی غافڵ دەکات لەوەی لەو ساتەوەی دەسەڵاتدارە جیاکانی بەغدا بە هەمو جۆرێک هەوڵی لەناوبردنی کوردیان لە عێراق داوە: وەک " سیاسة الارض المحروقة، مجازر حرق الاکراد، التطهیر العرقي، تغییر دیموغرافیا کردستان، سلسلة مجازر الانفال، هجمات الاسلحة الکیماویة الوحشیة، الاحتلال القسري لجزء حیوي من جنوب کوردستان و ...الخ، زۆربەی ئەم تاوانانە بە داهاتی نەوتی کوردستان ئەنجام دراون. تۆ بڵێی ویژدانی ئەم مەلا ئەفەندیە بچێک جوڵابێت و رەحمێکمان پێدەکات.
Jonathan C. Randal دۆستی کورد و رۆژنامەگەری ناوداری ئەمریکا لە کتێبێکیدا بەناونیشانی:
After Such Knowledge, What Forgiveness? My Encounters With Kurdistan باس لە مێژوی کورد و دەردەسەری و نەهاماتیەکانیان دەکات.
لە سەردەمی دانوستاندن بۆ دارشتنی دەستوری هەمیشەیی عێراق بە رێگەی دکتۆر بەرهەم ساڵح و هۆشیار زێباری پەیامێک بۆ مام جلال و مسعود بارزانی کە لە بەغدا بون دەنێرێت، تێیدا دەڵێت: پێم سەیرە ئێوە دانوستان لە گەڵ بەغدا دەکان بۆ شۆرکردنەوەی مافەکانتان لە لایەن دەسەڵاتدارانی نوێی عێراق....تاد. (کۆتایی).
سەرکردەکانی کورد گوێیان نەگرت، چ کارەساتێکە بەرپرسە باڵاکانی کورد ئێستا بەخشینی کیسەیەک دۆلاری موچە بەسەرکەوتن ناوزەد دەکەن. باش تێدەگەم موچە بۆ گوزەرانی هاوڵاتیانی هەرێم پرسێکی زۆر گرنگە، تێش دەگەم بۆچی دەسەڵاتداران ریگای بەغدایان کردۆتە " صراة المستقیم" ی هات و نەهات، و بۆ وا کەساس لەبەر دەم قاپی ئیمامەکانی بەغدا چۆکیان داوە ؟ چونکە دەرک دەکەن بەوەی بەشێکی گرنگی هۆکاری ئەم دۆخەن، بۆیە بە پینەوپەرۆکردن ئاهێک بە روخساریان دەبەخشن.
هیچکات دەسەڵاتی شۆڤینزمی مەزهەبی و نەتەوەیی بەغدام بە راستگۆ و باوەرپێکراو نەزانیوە، ئەمە بۆ زۆرینەی هاوڵاتیانی هەرێم یەکلابۆتەوە، کێشەی بنەرەتی ئەوەیە ئایا دەسەڵاتدارانی هەرێم لەو ئاستەدان ئەوە بسەلمێنن.
باش دەرک دەکەم بەوەی هەرێم و دەسەڵاتەکەشی داخراو و لە هەمو لایەکەوە گەمارۆ دراون، پرسی موچەش " عەصا سحریەکەی " بەغدایە بۆ قایمکردنی داخراوەیی و گەمارۆدانەکە، هاوکاتیش بۆکلۆرکردنی کیانی هەرێم و ناچارکردنی دەسەڵاتەکەی بە ریتم و ئاوازی ئەوان سیاسەت بەرێبکەن. ئەوەندەی لاوازی و هەڵەکانی هەرێم و هێزە ئۆپزسیۆنەکانی عێراق خزمەتی دەسەڵاتی بەغدایان کردوە سەرجەم میلیشیاکانیان و سوپای عێراق و بەرەی شیعەی پەرتەوازە نەیان کردوە.
حزوری ئەمریکا تا ئەم چرکەیەش رێگرە لە کارکردن بۆ جێبەجێکردنی نیەتە شەیتانیەکانی بەغدا، هیچ دور نیە سەرۆکی ئێستای ئەمریکا لە شەو و رۆژێکدا بریاری کشانەوەی هێزەکانی لە عێراق بدات. کورد لە باشور چەند جارێک لەو جۆرە کارانەی ئەمریکا باجێکی ئێجگار قورسی داوە، تایبەت شکستی شۆرشی ئەیلول و سەردەمی رێکەوتنی ستراتیژی نێوان ئیدارەی ئۆباما لەگەڵ عێراق بۆ کشانەوەی هێزەکانی ئەمریکا لە عێراق. (کاک نەوشیروان لەسەر ئەم تەوەرە شێکردنەوەیەکی چر و پری بڵاوکردۆتەوە).
تاکە رێگا بۆ پاراستنی ئەم کیانە گەرانەوەیە بۆ ئیرادەی میللەت، گەرانەوەیەکی فرە ئاراستە و جدی و بنیاتکەر.
ئەزمونەکان پێمان دەڵێن: ساویلکە مەبن، دنیا هەر وا نامێنێت و چاوروان بن.