وەزیری ناوخۆی عێراق رایگەیاند، یەکێک لە تۆمەتبارە سەرەکییەکانی بردنی 2.5 ملیار دۆلارەکەی دەستەی گشتیی باجەکانی لە بانکی رافیدەین دەستگیركردوە لەكاتێكدا كە دەیویست لە فڕۆکەخانەی بەغداوە بە فڕۆکەیەکی تایبەت بچێتە دەرەوەی وڵات.

ئاوێنە: عوسمان ‌غانمی، وەزیری ناوخۆی عێراق، ئەمشەو دوشەممە، لە راگەیەندراوێكدا وتی"عێراق ئەمانەتە لە گەردنمان. رێگە بە دزینی پارەی عێراق نادەین و نەرمی بەرامبەر هیچ كارێك نانوێنین كە زیان بە ئاسایشەکەی بگەیەنێت."

وەزیری ناوخۆی عێراق ئەوەی ئاشکرا کرد، "هێزێکی تایبەتمان لە قارەمانانی وەزارەتی ناوخۆ نارد بۆ دەستگیرکردنی (نور زوهێر جاسم) لە فڕۆکەخانەی نێودەوڵەتیی بەغدا، لەو کاتەی هەوڵیدەدا لەڕێگەی فڕۆکەیەکی تایبەتەوە بچێتە دەرەوەی وڵات."

ئێوارەی ئەمڕۆ مستەفا جەبار سەنەد، ئەندامی لیژنەی دارایی لە پەرلەمانی عێراق لە تویتێكدا رایگەیاندبو"دوای سەعاتێكی ترو بە دیاریکراوی 06:30ی ئێوارە، تۆمەتباری یەکەم بە راکێشانی پارەکانی سپاردەی باجەکان بەناوی نور زوهێر جاسم لەڕێگەی فڕۆکەخانەی نێودەوڵەتیی بەغداوە بەرەو فڕۆکەخانەی ئەتاتورک دەڕوات. تۆمەتبارەکە بە فڕۆکەیەکی تایبەت لە جۆری GLEX بە T7MBH تۆمارکراوە، دەڕوات."