هیوا ئەحمەد، بەڕێوەبەری نوێی ئاسایشی سلێمانی، ئەمڕۆ چوارشەممە، دوای دەستبەكاربونی، لە پەیامێكدا رایگەیاند، نەكردنەوەی درزو كەلەبەر بۆ خۆدەربازكردن و گەندەڵی، نەك هەر بەشێك دەبێت لەهەوڵەكانیان بەڵكو كار بۆ سڕینەوەیشیان دەكەن. جەختیشی كردەوە كە لەگەڵ نوسەران و ڕۆژنامەوانەکاندا ئاڕاستەیەکى ترى پێکەوەکارکردن دەگرینەبەر.

ئاوێنە: هیوا ئەحمەد، لە پەیامەكەیدا بەڵێنی داوە كە "پاڵپشت بە یاساو هاوڵاتییانمان لەخزمەت سەقامگیریى و ئاسایشدا بین و ڕێگەنەدەین هیچ کەس و گروپێک، ڕاستەوخۆ و ناڕاستەوخۆ دەستدرێژى بکاتە سەر ئارامیى سەرو ماڵ و ژیانى خەڵکى."

هەروەها وتوشیەتی"چاودێریکردنى هەموان وەکو یەک و نەکردنەوەى درزو کەلەبەر بۆ خۆدەربازکردن و گەندەڵى، نەک هەر بەشێک دەبێت لە هەوڵەکانمان، بەڵکو کار بۆ سڕینەوەشیان دەکەین."

جەختیشی كردۆتەوە كە بۆ ئەو مەبەستە، "هەمیشە دەرگامان کراوە دەبێت لەبەردەم هەر کەس و گروپ و لایەنێکدا کە بیانەوێت زانیاریمان پێ بدەن، ڕەخنەمان لێ بگرن و بە بۆچونە ئەرێنیەکانیشیان ئاڕاستەمان بکەن، بەتایبەت لەگەڵ نوسەران و ڕۆژنامەوانەکاندا ئاڕاستەیەکى ترى پێکەوەکارکردن دەگرینەبەر کە لە خزمەت ئاشتەوایى و پاراستنى گیانى ئەو وێنایەدا بێت کە ئامانج لێى گواستنەوەى ڕاستى و زانیارییەکان بێت وەک ئەوەى کە هەیە."

دەقی پەیامەكە...

پەیامى بەڕێوەبەرى نوێى ئاسایشى سلێمانى

بەبۆنەى دەستبەکاربونمان لە بەرپرسیارێتى نوێدا، لەبەردەم خواو خوێنى شەهیدان، هەمو ئەو لایەن و دڵسۆزانەى کە ئێمەیان بۆ ئەم پۆستە دەستنیشان کرد بەڵێن دەدەین:

پاڵپشت بە یاساو هاوڵاتییانمان لەخزمەت سەقامگیریى و ئاسایشدا بین و ڕێگەنەدەین هیچ کەس و گروپێک، ڕاستەوخۆو ناڕاستەوخۆ دەستدرێژى بکاتە سەر ئارامیى سەرو ماڵ و ژیانى خەڵکى.

پەیمان دەدەین زیاتر لە جاران و ئەو تەمەن و ئەزمونەى بەسەرمان بردوەو پلەبەپلە هێناومانە، بەبێ جیاوازى، لە ئاست متمانەى هەمواندا بین هەوڵ بۆ ئەوە دەدەین دامەزاوەی ئاسایش لەخزمەتی هاوڵاتیاندا بێت ببنە گیانى پێکەوەژیان و هاوکارى یەکترى، چاودێریکردنى هەموان وەکو یەک و نەکردنەوەى درزو کەلەبەر بۆ خۆدەربازکردن و گەندەڵى، نەک هەر بەشێک دەبێت لە هەوڵەکانمان، بەڵکو کار بۆ سڕینەوەشیان دەکەین. بۆ هێنانەدى ئەم مەبەستەش:

هەمیشە دەرگامان کراوە دەبێت لەبەردەم هەر کەس و گروپ و لایەنێکدا کە بیانەوێت زانیاریمان پێ بدەن، ڕەخنەمان لێ بگرن و بە بۆچونە ئەرێنیەکانیشیان ئاڕاستەمان بکەن، بەتایبەت لەگەڵ نوسەران و ڕۆژنامەوانەکاندا ئاڕاستەیەکى ترى پێکەوە کارکردن دەگرینەبەر کە لە خزمەت ئاشتەوایى و پاراستنى گیانى ئەو وێنایەدا بێت کە ئامانج لێى گواستنەوەى ڕاستى و زانیارییەکان بێت وەک ئەوەى کە هەیە.

لەکۆتاییدا سوپاسى هەمو ئەوانە دەکەین کە لەبەردەم ئەم پەیامەدا هاوکارو پشتیوانمان دەبن و ڕێگە دەکەنەوە بۆ ئەوەى لەئاست خزمەتکردن و مێژودا هەمومان پێکەوە سەربەرزانە یەکترى تەواو بکەین.

هیوا ئەحمەد محەمەد

٢٠٢١/٢/٣