له‌یه‌كێك له‌قه‌زاكانى سنورى پارێزگاى دیوانیه، شه‌ڕو پێكدادان له‌نێوان ژماره‌یه‌ك ئامۆزا ڕویدا، قائیمقامى قه‌زاى ناوه‌ندى ئه‌و پارێزگایه‌ش زانیاریی ئاشكراده‌كات‌و ڕایده‌گه‌یه‌نێت، "به‌هۆى ئه‌و پێكدادانه‌وه پێنج کەس کوژران".
ئاوێنە: کازم عەبدوڵڵا جبوری قائیمقامی قەزای ناوه‌ندیى دیوانییە زانیاریى له‌باره‌ى ڕوداوه‌كه‌ى قەزای شەنافییە لەو پارێزگایه ئاشكراكردو ڕایگه‌یاند، "ڕوداوەکە بەهۆی ناکۆکییەکی کەسی بوە لەنێوان ژمارەیەک ئامۆزا کە لەمیوانخانەیەک کۆبونەتەوە لەناوچەی هەرد لەدەوروبەری قەزاکە".
به‌وته‌ى جبورى، "سەرەتا دەمەقاڵێ دروستبوە، دواتر یەکێک لەئامۆزاكان چەکی بەکارهێناوەو دوو کەسی کوشتوە، دوای ئەوەش، ئامۆزاكانى دیكه وەک وەڵامدانەوە ئه‌وانیش چەکیان بەکارهێناوەو سه‌ره‌نجام بوەتە هۆی کوژرانی سێ کەسى دیكه‌و برینداربونی کەسێکیش".
جبووری ئه‌وه‌شى وت:"هێزە ئەمنییەکان دواى ڕوداوه‌كه گەیشتونەتە شوێنی ڕوداوەکەو شوێنەکەیان گەمارۆداوە، توانیویانه تۆمەتبارەکانیان دەستگیربكه‌ن‌و ڕەوانەی لایەنی پەیوەندیداریان کردون، هەروەها دەستیان بەسەر ژمارەیەک چەکی بەکارهاتوشدا گرتوە".
به‌گوێره‌ى سه‌رچاوه‌كان، دۆسیەی شەڕو ناکۆکییە عەشایەرییەکان لەپارێزگاکانی ناوەڕاست‌و باشوری عێراق، یەکێکە لەگرنگترین ئەو بابەتانەی محەممەد شیاع سودانی سەرۆک وەزیرانی عێراق، هاوشانی دۆسیەی خزمەتگوزارییەکان، گرنگیی پێدەدات، چونکە بەردەوام قوربانی‌و بریندار بەهۆی ئەو شەڕانەوە تۆماردەکرێن کە هەندێکجار پێویستی بەدەستوەردانی سوپا-ش هه‌یه بۆ کۆتاییپێهێنانیان.
پارێزگاکانی میسان‌و زیقارو بەسرە لەپێشەوەی ئەو پارێزگایانەن کە ڕوبەڕوبونەوەی چەکداریی عەشایەریی لەو جۆرەیان تێیاندا ڕودەدات، لەهەندێکیاندا چەکی مامناوەندو تەنانەت گولەهاوەنیش بەکاردەهێنرێت.