زیندانییکردنی هاوڵاتییانی کورد بە تۆمەتی جیاواز لەلایەن هێزە ئەمنییەكانی ئێرانەوە درێژەی هەیە و لەو چوارچێوەیەشدا، هاوڵاتییەکی کوردی خەڵکی سنە لە پاش دەستگیركردنی سزای زیندانیی کردنی بەسەردا سەپێندرا.
ئاوێنە: ماڵپەری دەنگی دەستگیرکراوەکانی ڕۆژهەڵاتی کوردستان و ئێران لەبارەی سزادانی هاوڵاتییەکی کورد لەلایەن هێزە ئەمنییەكانی ئێرانەوە بەمجۆرە زانیارییان خستووەتەڕوو، هاوڵاتییەکی کورد بە ناوی بنیامین ڕەحیم پوور تەمەن ٣٥ ساڵی خەڵکی سنە لەلایەن دادگای شۆڕشی سنە سزای یەک ساڵ زیندانییکردنی بەسەردا سەپێندرا.
ئاماژە بەوەشکراوە، ئەو هاوڵاتییە بە تۆمەتی “پرۆپاگەندە دژی دەوڵەت و پشتیوانی کردن لە گرووپە ئۆپۆزسیۆنەکان” سزا دراوە.
جێگای ئاماژەیە، بنیامین ڕەحیم پوور ژیانی هاوبەشی پێكهێناوە و باوکی دوو منداڵە، لە ڕۆژی ٢٢ـی کانوونی دووەمی ئەمساڵ لەلایەن هێزەکانی ئیتلاعاتی ئێران بە بێ هیچ فەرمانێکی دادوەر لە شوێنی کارەکەی دەستگیر کرا و لە دوای بەسەربردنی ١٠ ڕۆژ لە ژووری تاکەکەسیدا بە دانانی بارمتە و بە شێوەی کاتی ئازاد کرا.