مەسرور بارزانی، سەرۆکی حکومەتی هەرێمی کوردستان سەردانی تورکیا دەکات و لەگەڵ رەجەب تەیب ئەردۆغان سەرۆک کۆماری ئەو وڵاتە لە ئەنقەرە کۆدەبێتەوە.
ئاوێنە: ماڵپەڕی فەرمی سەرۆکایەتیی کۆماری تورکیا رایگەیاند، "کاتژمێر 2:00ی پاشنیوەڕۆی ئەمڕۆ سێشەممە 7ی کانونی دووەمی 2025، رەجەب تەیب ئەردۆغان لە کۆشکی سەرۆکایەتیی کۆمار لە ئەنقەرە پێشوازی لە مەسرور بارزانی، سەرۆکی حکومەتی هەرێمی کوردستان دەکات".
سەرۆکی حکومەتی هەرێمی کوردستان بەر لە دیداری لەگەڵ ئەردۆغان، کاتژمێر 12:00 سەردانی وەزارەتی دەرەوەی تورکیا دەکات، لەبارەی ئەجێندای کۆبوونەوەکان هیچ زانیارییەکی فەرمی بڵاونەکراوەتەوە.
دوایین سەردانی مەسرور بارزانی, سەرۆک وەزیرانی هەرێمی کوردستان رۆژی 20ی حوزەیرانی 2024 بوو کە بە سەردانێکی فەرمی گەیشتبووە ئەنقەرە و لەگەڵ رەجەب تەیب ئەردۆغان و ھاکان فیدان کۆبوەوە.