شارەزایەكی بواری كەشناسی، زانیاریی لەبارەی ئەو شەپۆلی باران و خۆڵبارینە ئاشكرا دەكات كە چاوەڕوان دەكرێت لە رۆژانی كۆتایی ئەم هەفتەیە ناوچە جیاجیاكانی هەرێمی كوردستان بگرێتەوەو دەشڵێت، بەهۆی خۆڵبارینەوە، بارانەكە قوڕاوی دەبێت و شەپۆلەكەش پێشنیوەڕۆی رۆژی شەممە، كۆتایی دێت.
ئاوێنە: ئاراس جەبار، شارەزای بواری كەشناسی، ئەمشەو چوارشەممە، لە راگەیەندراوێكدا وتی، سبەی پێنجشەممە کەش و ھەوا سەقامگیر ئەبێت و بەھۆی دەستپێکی ھاتنی بارستە ھەوایەکی شێدار و گەرمی دەریای سور بۆ سەر ناوچەکانمان پلەکانی گەرما بەڕاورد بە ئەمڕۆ 2 پلە بەرزدەبنەوەو ھەست بەگەرمی کەشەکە دەکرێت.
ئەوەشی خستۆتەڕو، لەکاتەکانی سبەی ئێوارە و شەودا ئاسمانی ھەرێم بە زۆری دەگۆڕێت بۆ ھەوری تەواو لەگەڵ دەستپێکردنی تاوە باران و ھەورە بروسکەی کورتخایەن لەناوچەکانی رۆژئاوای عێراق و پارێزگای دھۆک و نەینەوا.
ئاماژەی بەوەشداوە، بۆ رۆژی ھەینی ئاسمانی ھەرێم بە درێژایی کاتەکان بە ھەوری تەواو ئەمێنێتەوە لەگەڵ چالاکبونی بەھێزی بای باشور و باشوری رۆژھەڵات لە ناوچەکانی باشور و ناوەڕاستی عێراق بەخێرایی 30 تا 70کم و لەناوچەکانی ھەرێمی کوردستانیش بەخێرایی 20 تا 45کم لە کاتژمێرێکدا چالاک ئەبێت.
ئەو شارەزایە وتوشیەتی، بەھۆی ئەم بایەوە لەباشوری عێراقەوە خۆڵبارینێکی چر دروست ئەبێت و پێشبینی ئەکرێت لەنیوەڕۆی رۆژی ھەینییەوە ھەرێمی کوردستان بەچڕی بگرێتەوە بەتایبەت لەناوچەکانی گەرمیان و کەرکوک و ھەولێر ئاستی خۆڵبارینەکە چرتر ئەبێت و مەودای بینین کەمدەکاتەوە.
ئاماژەی بەوەشداوە، رۆژی ھەینی کاتەکانی بەیانی تا ئێوارە ھەندێک کاتێک بارانێکی کەم بۆ مامناوەند لە ھەندێ شوێندا ئەبارێت و لە ئێوارەوە بۆ بەرەبەیانی رۆژی شەممە کاریگەری نزمەپاڵەپەستۆکەی دەریای ناوەراست دەستپێدەکات و تاوە بارانی مامناوەند ناوبەناو بە ھەورە بروسکەوە زۆربەی ناوچەکانی پارێزگای سلێمانی و ھەڵەبجە و دھۆک و ھەولێر و ئیدارەی راپەرین و سۆران دەگرێتەوە و لەناوچە شاخاوییەکانی دھۆک و ھەولێر ئەگەری تاوە بارانی بەخوڕو بەلێزمەش ئەبێت، لە سنوری پارێزگای کەرکوک و ئیدارەی گەرمیانیش ئەگەری نمە باران و ھەندێ شوێنیش تاوە بارانی مامناوەندی کورتخایەن چالاک ئەبێت.
ئەوەشی وتوە، بەھۆی خۆڵبارینەکەشەوە بارانبارینەکە قوڕاوی ئەبێت و پێشنیوەڕۆی رۆژی شەممە کاریگەری شەپۆلی باران و خۆڵبارینەکەش کۆتایی دێت و کەش سەقامگیر ئەبێتەوە لەگەڵ نزمبونەوەی کەمی پلەی گەرمی بەرێژەی 2 پلە.
هەروەها وتوشیەتی، سەبارەت بە بەفریش تەنیا لە ناوچە شاخاوییە سنورییە بەرزەکان بەفر بارین ئەبێت لەبەرزی 1500 مەترەوە.