لاهور شێخ جەنگی، سەرۆكی بەرەی گەل، لەبارەی دۆخی سوریاوە لە پەیامێكدا داوادەكات پشتیوانی لە ئەزمونی كوردانی رۆژئاوای كوردستان بكرێت و دەڵێت، دەبێت هەمو هەوڵێکمان بۆ ئەوە بێت ئەزمونی کورد لە رۆژئاوا بپارێزرێ و بەرەوپێش بچێ و پاشەکشە نەکات و دەشڵێت، لە وەها دۆخێکدا دەسەڵاتدارانی نابەرپرسی هەرێم هەست بە هیچ بەرپرسیاريتییەکی نەتەوەیی و نیشتیمانی و ئەخلاقی ناکەن بەرامبەر دۆخەکەو بچوکترین جوڵەی سیاسی و دیبلۆماسییان نییە بەرامبەر خوشک و براکانمان لە رۆژئاوا لە کاتێکدا پێویست بو ئێستا ئامادەی هەمو ئەگەر و گریمانەیەک بن بە پشتیوانی سەربازیشەوە.
ئاوێنە: لاهور شێخ جەنگی، سەرۆكی بەرەی گەل، ئەمڕۆ شەممە، بیستەمین دیالۆگی مەنامە لە بەحرەین، لە پەیامێكدا لەبارەی دۆخی سوریا رایگەیاند"قۆناغێکی سەربازی و سیاسیی نوێ لە سوریا بوە بە ئەمری واقع و گریمانەی گۆڕانکاری ریشەیی لە شام بە تایبەتی رژێمە سیاسییەکەی بەشار ئەسەد لە هەمو کات نزیکترە."
ئاماژەی بەوەشداوە"ئەزمونە درەوشاوە و ئیلهمابەخشەکەی براکانمانە لە رۆژئاوای نیشتیمان کە ئێستا بە هۆی دۆخی سوریاوە کەوتونەتە بەردەم ئاڵنگاری نوێ و پشتیوانیکردن و ئاگاداربون لێیان لە هەمو ئاستەکاندا بە تایبەتی سیاسیی و سەربازی وەک بەشێک لە خەباتی نەتەوەیی پێکەوە گرێدراوی ئێمە ئێجگار گرنگ و ستراتیژییە."
جەختیشی كردۆتەوە كە "دەبێ بە رۆحێکی نەتەوەیی و نیشتیمانی بەرزەوە هەمو هەوڵێکمان بۆ ئەوە بێت ئەزمونی کورد لە رۆژئاوا بپارێزرێ و بەرەوپێش بچێ و پاشەکشە نەکات."
وتوشیەتی"دەبێ بەو ڕادەیەی پشتیوان و هاوکار و هاوسۆزی براکانمانین لە سوریا، بە هەمان رادەش خۆمان بپارێزین لە دەست تێوەردان و بارگاویکردنی ئەزمونی رۆژئاوا بە هیچ جۆرە ئەجندایەکی سیاسیی و ئایدۆلۆژی."
لاهور شێخ جەنگی پێی وایە كە گرنگە "پارتی کرێکارانی کوردستان ئەو راستییە بزانێت کە وەرگرتنی شەرعیەت بۆ دۆزی کورد لە رۆژئاوا و ئایندەی سوریا پێویستی بە سیاسەتێکی واقعیانە هەیە و دەبێ تێگەیشتنی قوڵیان لەوروەوە هەبێت و جیاوازییەکانیان لەگەڵ لایەنەکانی دیکە نەبێتە کێشە بۆ کۆی ئەزمونی رۆژئاوا."
هەروەها وتوشیەتی"لە وەها دۆخێکدا دەسەڵاتدارانی نابەرپرسی هەرێم هەست بە هیچ بەرپرسیاريتییەکی نەتەوەیی و نیشتیمانی و ئەخلاقی ناکەن بەرامبەر دۆخەکە و بچوکترین جوڵەی سیاسیی، دبلۆماسییان نییە بەرامبەر خوشک و براکانمان لە رۆژئاوا لە کاتێکدا پێویست بو ئێستا ئامادەی هەمو ئەگەر و گریمانەیەک بن بە پشتیوانی سەربازیشەوە."
ئاماژەی بەوەشداوە "بە پێچەوانەوە دەسەڵاتدارانی هەرێمی کوردستان نەک ئەوە ناکەن بەڵکو لەناوخۆی هەرێمدا هێشتا نغرۆ و مەستی گەندەڵی و بردنی داهاتی ناوخۆ و قاچاغچێتی نەوتن، موچەی خەڵکیان خستۆتە ناو زەلکاوی پۆخڵەواتی پارە پەرەستییەوە و هەست بە هەستیاری دۆخی ناوچەکە ناکەن و چاویان جگە لە بەرژەوەندی تەسکی حزبی و کەسی هیچیتر نابینێت."
سەرۆكی بەرەی گەل پێشی وایە "بەرپرسیارێتی پارتی دیموکراتی کوردستان وەک هێزێک کە هاوسنوری رۆژئاوایە گەورەیە و ئەرکی گرنگیان لە ئەستۆدایە، دەبێ رۆحی نەتەوەیی و نیشتیمانی زاڵ بکەن بەسەر حزبایەتیی بەرتەسکدا. دواکەوتن و ئیهمالی نواندن لەم تيگەیشتنە و سوربونی دەسەڵاتدارانی هەرێم لە هەردو زۆنی زەرد و سەوز لەو پاشاگەردانی و تاڵانی و خۆخۆرییەی ساڵانێکی زۆرە دەستیانداوەتێ، خیانەتە و تاوانێکی گەورە و کوشندەیە لە کورد و دۆزە ڕەواکەی، لە کوردستان و خەڵکە بەشمەینەتەکەی."
لە كۆتاییشدا وتویەتی"پێویست بو گۆڕانکارییەکانی رۆژهەڵاتی ناوەڕاست و گەڕانەوەی ترامپ بۆ سەرۆکایەتی ئەمریکا وامان لێبکات خۆمان ئامادە بکەین بۆ ئەوەی دۆزی کورد بە فروانترین ئاست بخەینەوە سەر شانۆی سیاسیی جیهان، لە وەها دۆخێکدا دەسەڵاتدارانی هەرێم لەسەر پارە و پۆست خەریکی هەلا هەلاکردنی هەمو جۆرە ئینتیما و سۆزێکی نەتەوەین و باکیان بە هیچ شتێک نییە."
دەقی پەیامەكە:
بەناوی خوای بەخشندەی میهرەبان.
وەک هەموو لایەک ئاگادارن، لە چوارچێوەی پەرەسەندنە خێراکانی دۆخی سیاسیی رۆژهەڵاتی ناوەراستدا، قۆناغێکی سەربازی و سیاسیی نوێ لە سوریا بووە بە ئەمری واقع و گریمانەی گۆڕانکاری ریشەیی لە شام بە تایبەتی رژێمە سیاسییەکەی بەشار ئەسەد لە هەموو کات نزیکترە.
دۆخی دەوڵەتی سوریا لە چەند ئاستێکی جیاواز و کاریگەردا پەیوەستە بە ئێمەوە وەک نەتەوەی کورد و خەڵکی کوردستان. سوریا لە ڕوی جوگرافییەوە ولاتێکی گرنگی ناوچەکەیە و ئەمن و ئاسایشی ئەو ولاتە بەتوندی بە ستراوەتەوە بە وڵاتانی دراوسێیەوە بەتایبەتی عێراق. بە هۆی ئەوەی وڵاتێکە سنوری لەگەڵ عێراق هەیە و مێژوی سیاسیی کۆن و نوێ ئەو وڵاتە جۆرێک لە نزیکی و لێکچونی لەگەڵ رژێمە سیاسییەکانی عێراق هەبووە، جگە لەوەی سوریا هاوشێوەی عێراق بەشێکە لەو میحوەربەندییە هەرێمایەتییەی ناوچەی رۆژهەڵاتی ناوەراستی دابەش کردوە بۆ دوو ئاراستەی نفوزی سیاسیی و سەربازی لە نێوان ئێران و ئیسرائیل لە لایەک و لە نێوان زلهێزانی دنیاش لە لایەکی ترەوە.
لە هەموو ئەوانەی سەرەوە گرنگتر بۆ ئێمە وەک نەتەوەی کورد، ئەزمونە درەوشاوە و ئیلهمابەخشەکەی براکانمانە لە رۆژئاوای نیشتیمان کە ئێستا بە هۆی دۆخی سوریاوە کەوتونەتە بەردەم ئاڵنگاری نوێ و پشتیوانیکردن و ئاگاداربوون لێیان لە هەموو ئاستەکاندا بە تایبەتی سیاسیی و سەربازی وەک بەشێک لە خەباتی نەتەوەیی پێکەوە گرێدراوی ئێمە ئێجگار گرنگ و ستراتیژییە و دەبێ بە رۆحێکی نەتەوەیی و نیشتیمانی بەرزەوە هەموو هەوڵێکمان بۆ ئەوە بێت ئەزمونی کورد لە رۆژئاوا بپارێزرێ و بەرەوپێش بچێ و پاشەکشە نەکات. زۆر گرنگە ئەو شەرعیەتەی بە خوێن و فرمێسک و قوربانیدان دەستکەوتوە و کانتۆنەکانی لێهاتونەتە بوون و دەستورێکی نیشتیمانی پڕ شکۆیان بۆ خۆیان و گەلانی ناوچەکە نوسیوەتەوە، لەهەر گۆڕانکارییەکی رژێمی سیاسیی سوریادا پارێزگاری لێبکرێ زیاتر بەرەوپێشەوە ببرێت.
لێرەدا دەمەوێت ئاماژە بە خاڵێکی جەوهەری گرنگ و ستراتیژی بکەم ، جیاوازییەکی زۆر گەورە هەیە لە نێوان «پشتیوانی و هاوسۆزی» لەگەڵ «دەست تێوەردانی نەرێنی»، دەبێ بەو ڕادەیەی پشتیوان و هاوکار و هاوسۆزی براکانمانین لە سوریا، بە هەمان رادەش خۆمان بپارێزین لە دەست تێوەردان و بارگاویکردنی ئەزمونی رۆژئاوا بە هیچ جۆرە ئەجندایەکی سیاسیی و ئایدۆلۆژی، لەو روەوە گرنگە پارتی کرێکارانی کوردستان ئەو راستییە بزانێت کە وەرگرتنی شەرعیەت بۆ دۆزی کورد لە رۆژئاوا و ئایندەی سوریا دا پێویستی بە سیاسەتێکی واقعیانە هەیە و دەبێ تێگەیشتنی قوڵیان لەوروەوە هەبێت و جیاوازییەکانیان لەگەڵ لایەنەکانی دیکە نەبێتە کێشە بۆ کۆی ئەزمونی رۆژئاوا.
کاتیەتی کورد بەگشتی و بە تایبەتی لە ئێستای سوریادا واقعیانە مامەڵە بکات و بزانێت وەرگرتنی مافە نەتەوەیی و سیاسییەکانی لە سوریای نوێ دا پێویستی بە دوو بنەمای سەرەکی هەیە، «سیاسەتی واقع بینانە» و «وەرگرتنی شەرعیەتی ناوخۆیی و هەرێمایەتی و نێودەوڵەتی»، دەبینین و دەبیستین کەسێکی وەک ئەبو محەمەد جۆلانی بە پاشخانێکی تاریکەوە لەناو رێکخراوە تیرۆرستییەکانی ئەلقاعیدە و جەبهەی نوصرەوە هاتوە لە دەستەی ئازادکردنی شام بە ناوێکی نوێ و زمان و نەفەسێکی جیاواز لە رابردوو بۆ کەناڵی سی ئێن ئێن ی ئەمریکی دەدوێت و باسی دەوڵەتی دامەزراوە دەکات و دەستبەرداری گوتارە توند و رادیکاڵەکەی بووە ، ئەوەش بێگمان تەنها لە پێناوەی وەرگرتنی جۆرێک لە شەرعییەتی ناوخۆیی، هەرێمایەتی و نیودەوڵەتی، لەو سۆنگەیەوە پێویستە کوردیش بە بەرگێکی نەتەوەیی، نیشتیمانیی و فکرێکی نوێی گەورەتر لە ئایدۆلۆژیا و بەرزتر لە حزب، ( هەرحزبێک ) لە مەیدانی گۆڕانکارییەکانی سوریادا بێت و ئەو دەرفەتە مێژوییە لە سوریا بقۆزێتەوە و لەدەستی نەدات چونکە مێژوو هەمیشە شانس و دەرفەتی زێرینی ئاوا دەگمەنی تێدا ناخولقێت.
بە داخەوە لە کاتێکدا ئێمە وەک نەتەوە لە رۆژهەڵاتی ناوەراستدا کەوتوینەتە بەردەم بەرپرسیاریەتێکی مێژوویی بۆ ئاگادار بوون لە وێنە گەورەکەی خۆمان لە رۆژئاوای نیشتیمان لە وەها دۆخێکدا دەسەڵاتدارانی نابەرپرسی هەرێم هەست بە هیچ بەرپرسیاريتییەکی نەتەوەیی و نیشتیمانی و ئەخلاقی ناکەن بەرامبەر دۆخەکە و بچوکترین جوڵەی سیاسیی، دبلۆماسییان نییە بەرامبەر خوشک و براکانمان لە رۆژئاوا لە کاتێکدا پێویست بوو ئێستا ئامادەی هەموو ئەگەر و گریمانەیەک بن بە پشتیوانی سەربازیشەوە، چونکە وەک وتم لە بارودۆخێکی نێودەوڵەتی گەرمدا وەک ئەوەی ئێستا لە سوریا دەگوزەرێت وێنە گەورەکەی کورد وەک نەتەوەیەکی بێ کیان لە هەموو کات رونتر دەکەوێتە بەرچاوی دنیا، بە پێچەوانەوە دەسەڵاتدارانی هەرێمی کوردستان نەک ئەوە ناکەن بەڵکو لەناوخۆی هەرێمدا هێشتا نغرۆ و مەستی گەندەڵی و بردنی داهاتی ناوخۆ و قاچاغچێتی نەوتن، مووچەی خەڵکیان خستۆتە ناو زەلکاوی پۆخڵەواتی پارە پەرەستییەوە و هەست بە هەستیاری دۆخی ناوچەکە ناکەن و چاویان جگە لە بەرژەوەندی تەسکی حزبی و کەسی هیچیتر نابینێت.
لە کاتێکدا پێویست بوو لە ئێستادا نەک بۆ ناوخۆی هەرێم بەڵکو بەرووی گۆرانکارییە هەرێمایەتییەکانیشدا ئامادەییان هەبێت و بەرچاوڕوویان رون بێت، لە وەها دۆخێکدا لە هەموو کات زیاتر خەریکی ململانیی حزبی بچوکن کە ئامانجەکەشیان تەنها پارە و پۆستە و هیچی تر.
ئەم دێرانەی سەرەوە بانگهێشت و هۆشداری پێشوەختەن بۆ هەموو لایەک کە ئەرکی هەمومان بەرامبەر دۆخی سوریا و گۆڕانکارییەکانی گرنگ و گەورەن و دەبێ لێی تێبگەین. لەوچوارچيوەیەدا بەرپرسیارێتی پارتی دیموکراتی کوردستان وەک هێزێک کە هاوسنوری رۆژئاوایە گەورەیە و ئەرکی گرنگیان لە ئەستۆدایە، دەبێ رۆحی نەتەوەیی و نیشتیمانی زاڵ بکەن بەسەر حزبایەتیی بەرتەسکدا. دواکەوتن و ئیهمالی نواندن لەم تيگەیشتنە و سوربونی دەسەڵاتدارانی هەرێم لە هەردوو زۆنی زەرد و سەوز لەو پاشاگەردانی و تاڵانی و خۆخۆرییەی ساڵانێکی زۆرە دەستیانداوەتێ، خیانەتە و تاوانێکی گەورە و کوشندەیە لە کورد و دۆزە ڕەواکەی، لە کوردستان و خەڵکە بەشمەینەتەکەی.
پێویست بوو گۆڕانکارییەکانی رۆژهەڵاتی ناوەڕاست و گەڕانەوەی ترامپ بۆ سەرۆکایەتی ئەمریکا وامان لێبکات خۆمان ئامادە بکەین بۆ ئەوەی دۆزی کورد بە فروانترین ئاست بخەینەوە سەر شانۆی سیاسیی جیهان، لە وەها دۆخێکدا دەسەڵاتدارانی هەرێم لەسەر پارە و پۆست خەریکی هەلا هەلاکردنی هەموو جۆرە ئینتیما و سۆزێکی نەتەوەین و باکیان بە هیچ شتێک نییە.
خوای گەورە خەڵکی هەرێمی کوردستان و عێراق، خوشک و براکانمان لە رۆژئاوا و هاوڵاتیانی سوریا و ناوچەکە لە هەموو پێشهاتێکی خراپ و نەخوازراو بپارێزێ.
لاهور شێخ جەنگی
بیستەمین دیالۆگی مەنامە / بەحرەین.
٧ ی دێسەمبەری ٢٠٢٤