جێگری سەرۆکی ژوری بازرگانیی هەولێر، ڕایگەیاند: ئەمساڵ تا ئێستا بە بەهای دو ملیارو 400 ملیۆن دۆلار ئاڵوگۆڕی بازرگانیی لەگەڵ ئێراندا کراوە، چاوەروان دەکرێت لەمساڵدا قەبارەی ئاڵوگۆڕی بازرگانیی نێوانمان بەرزبونەوەیەکی بەرچاو بەخۆیەوە ببینێت.

ئاوێنە: کامەران سەڵاح، جێگری سەرۆکی ژوری بازرگانیی هەولێر، ئەمڕۆ پێنجشەممە، بە میدیای پارتی وت"هەرێمی کوردستان بوژانەوەیەکی زۆری بەخۆیەوە بینیوە، بواری کشتوکاڵ زۆر بەرەو پێش چوە، زۆرێک لە بەرهەمە ناوخۆییەکانمان هەناردەی دەرەوەی وڵات دەکەین."

جێگری سەرۆکی ژوری بازرگانیی هەولێر، باسی لەوە کرد: پەیوەندییە بازرگانییەکانی نێوان هەرێمی کوردستان و ئێران بەهێزتر دەبن و چاوەروان دەکرێت لەمساڵدا قەبارەی ئاڵوگۆڕی بازرگانیی نێوان ئەو دو لایەنە بەرزبونەوەیەکی بەرچاو بەخۆیەوە ببینێت.

هاوکات وتیشی: ئەم ساڵ تا ئێستا بە بەهای دو ملیار و 400 ملیۆن دۆلار ئاڵوگۆڕی بازرگانیی لەگەڵ ئێراندا کراوە.