پێشەکی دەمەوێ بڵێم لەم دۆخەی ئێستادا من هیچ هیوایەکم نیە هەڵبژاردن گۆڕانکارییەکی گەورە دروست بکاو هاوکێشەی سیاسی لە هەرێمدا بگۆڕێت. بۆیە هیچ قسەیەک لەسەر ئەگەرو دەرهاویشتەکانی پرۆسەکە ناکەم. ئەوەی مەبەستی منە، قسەکردنە لەسەر بەرهەمی ئەو شەڕو ململانێیەی لەسەر یاسای هەڵبژاردن و چۆنیەتی بەڕێوەبردنی پرۆسەکە لە ئارادا بوو.

هەموومان لەبیرمانە چەند کێشەیەک لەبەردەم ئەنجامدانی هەڵبژاردنی هەرێمدا هەبوو. لەوانە: کۆتایی هاتنی وادەی یاسایی کۆمسیۆنی هەرێم، رەخنەی بەشێک لە حیزبەکان لە یاسای هەڵبژاردن و یەک بازنەیی، ناڕەزایی لە "کۆتا"ی کەمینەکان کە بە بۆچوونی هەندێک لە هێزە سیاسییەکان لەلایەن حیزبێکەوە دەستی بەسەرداگیرابوو، گومان لەسەر تۆماری دەنگەران، کۆتایی هاتن یاخود راستتر وایە بڵێم کۆتایی هێنانی دادگای فیدراڵی بە تەمەنی درێژکراوەی ناشەرعی و نایاساییانەی پەرلەمانی کوردستان... هتد.

سەرەتا پارتی دەیوست هەڵبژاردن بەپێی هەمان ئەو پێوەرانەی پێشوو بەڕێوە بچن کە جێگای ناڕەزایی و رەخنەی یەکێتی و بەشێکی تری ناوەندە سیاسییەکان بوون. لە بەرامبەردا یەکێتی بە هیچ شێوەیەک رازی نەبوو و نەیهێشت هەڵبژاردن بکرێت. پاشان کاتێک دادگای فیدراڵی دەستکاری یاسای هەڵبژاردن و کۆتاکانی کرد، ئەمجارە پارتی ناڕازی بوو و نەیهێشت لە وادەی دیاریکراودا هەڵبژاردن بکرێت. بۆیە چەند جارێک وادەکەی گۆڕدرا تا ئەو کاتەی هەندێکی زۆر کەم لە داواکانی پارتی جێبەجێ کران و گوشارێکی بەهێزی عێراقی و نێودەوڵەتیش هەبوو بۆ ئەوەی لەوە زیاتر پرۆسەکە دوانەخریت، ئینجا پارتیش دوابڕیاری خۆی دا.

لێرەدا دەمەوێ کەوانەیەک بکەمەوە: هەر ئەوەندەی کە هەر یەک لە پارتی و یەکێتی دەتوانن هەڵبژاردن پەک بخەن (ئەگەر هەلومەرجەکەیان بە دڵ نەبوو)، باشترین بەڵگەی ئەو راستییەیە کە لەم وڵاتەدا نە دیموکراسی هەیە، نە حوکمی یاسا و دامودەزگا. ئەوەی هەیە ئیرادەو بڕیاری دوو حیزبەکەیە. بۆیە هەر لە سەرەتاوە وتم هیچ هیوایەکم نیە بەوەی هەڵبژاردن گۆڕانکاری راستەقینە بەدیبێنێت.

بەهەرحاڵ، ئەوەی جێگەی سەرنجی ئەم چەند دێڕەیە ئەو پرسیارەیە کە ئاخۆ ئەگەر حیزبەکانی هەرێم، یاخود بە دیاریکراوی پارتی و یەکێتی، تەنها کەمێک نەرمییان بەرامبەر یەکتر بنواندایەو لە ناوەڕاستدا بگەیشتنایە بە تێگەیشتن و رێکەوتنێکی هاوبەش بۆ بەڕێوەبردنی هەڵبژاردن، باشتر نەبوو لەوەی ئێستا بە زەبری بڕیاری (دادگای فیدراڵی!)و گوشارە دەرەکییەکان مل بۆ ئەنجامدانی بدەن؟ ئاخۆ بەو کەلە رەقییە، کێ... چیی دەستکەوت؟ لە کاتێکدا کە سەری زمان و بنی زمانیان ئەوەیە دەبێ پڕیار لەسەر چارەنووسی کوردستان لە دەستی خەڵکی کوردستاندا بێت، ئایا هەر خۆیان بەو "کەلی شەیتان گرتنە" بەرامبەر بە یەکتر، نەبوونە هۆکاری ئەوەی لە بابەتێکی ئاوا گرنگدا بڕیاری هەرێم بچیتە دەست دادگای فیدراڵی؟ ئەو دادگایەی هەرچەندە بە دەنگی پەرلەمانتارەکانی خۆیان لە بەغدا دامەزراوە، بەڵام هەر کاتێک بڕیارەکانی بە دڵی ئەوان نابێت، دەڵێن ناشەرعی و نادەستوورییە! لە راستیشدا گومان و نیشانەی پرسیاری گەورە لەسەری هەیە. هەموویشمان دەزانین بووە بە ئامرازێک بەدەست هێزە عێراقییە باڵادەستەکانەوە بۆ گوشارخستنە سەر هەرێم و نەیارە عێراقییەکانیشیان.

روون و ئاشکرایە کاتێک هێزەکانی هەرێم نەتوانن یا نەیانەوێت پێکەوە لەسەر پرسە چارەنووسسازەکان رێک بکەون و سازش بۆ یەکتری بکەن، دواتر بێ هیچ گومانێک ناچاردەبن یا ناچار دەکرێن ملیان تەسلیمی ئیرادەی هێزەکانی دەرەوەی هەرێم بکەن. بەداخەوە! ئەمە چیرۆکی تراجیدیی مێژووی ئێمەیە. هەر دووبارە دەبێتەوەو هەر پەندیشی لێوەرناگرین.

ئاوێنە پڕۆژەیەکی میدیایی بەهاوبەشی لەگەڵ "قریب" بەڕێوەدەبات

ئاوێنە بۆ ماوەی دوو ساڵی داهاتوو پڕۆژەیەکی میدیایی هاوبەش بەسپۆنسەری "قەریب" بەڕێوەدەبات.

لەم پڕۆژە میدیاییەدا بایەخێکی تایبەت دەدرێت بەگەنجان‌‌و ژنان‌و پەیوەندییەکانی نێوان هەرێم‌و حکومەتی ناوەندی عێراق‌و هەڵبژاردنی کوردستان.

لەچوارچێوەی ئەم پڕۆژەیەدا، ئاوێنە بەشێوەیەکی پیشەیی‌ کار لەسەر ئەو  بابەتانە دەکات‌و چەندین راپۆرت‌و فیچەر پێشکەش بەخوێنەرو بینەرانی دەکات.

"قریب" بەرنامەیەکی هەرێمایەتییە بەسپۆنسەری ئاژانسی فەرەنسی بۆ پەرەپێدان "AFD‌"و لەلایەن ئاژانسی فەرەنسی بۆ گەشەپێدانی میدیایی CFI جێبەجێدەکرێت.