سوپای ئیسرائیل رایگەیاند، هێزەكانیان لەنێو باكوری كەرتی غەززەن و باڵی سەربازیی بزوتنەوەی حەماسیش دەڵێت، روبەڕوی هێزەكانی ئیسرائیل بونەتەوە.

ئاوێنە: دانیال هاگاری، وتەبێژی سوپای ئیسرائیل، ئەمڕۆ شەممە، رایگەیاند، هێزەكانیان هێشتا لەنێو باكوری غەززەدان ئەوەش دوای ئەوەی لە شەوی رابردوەوە دەستیان بە چونە ناو غەززە كردوە لەڕوی زەمینییەوە.

دانیار هاگاری راشیگەیاندوە، رێگەدەدەن بەو بارهەڵگرانەی كە خۆراك و ئاو و دەرمانیان پێیە بچنە نێو باشوری غەززە.

وپای ئیسرائیل شەوی رابردو چڕترین بۆردومانی غەززەی كردوە، سوپاكە رایگەیاند، تەنها شەوی رابردو 150 پێگەیان لەنێو غەززە بۆردومان كردون.هاوكات كەتیبەكانی قەسام، باڵی سەربازی بزوتنەوەی حەماس، رایگەیاندوە، روبەڕوی هێرشەكەی ئیسرائیل بونەتەوەو شكستیان بە هێرشە زەمیینەكە هێناوە.

ئەوەش لەكاتێكدایە كە شەوی رابردو ئیسرائیل چڕترین بۆردومانی غەززە كردو بەپێی وەزارەتی تەندروستی كەرتی غەززە، ژمارەی كوژراوانی فەلەستینی لە غەززە گەیشتۆتە 7 هەزارو 703 كەس كە 3 هەزارو 195 كەسیان منداڵ بون و هەروەها ژمارەی برینداران گەیشتۆتە 18 هەزارو 500 كەس.