سوپای پاسدارانی ئێران رایده‌گه‌یه‌نێت، شه‌وی رابردو هێرشكراوه‌ته سه‌ر ناوچه‌ی سیریك له پارێزگای هورمزگانی ئێران و له‌وه‌ڵامی ئه‌و هێرشه‌دا هێزه‌كانیان سیسته‌می راداری ئه‌مریكایان له به‌حره‌ین كردۆته ئامانج.
ئاوێنه: سوپای پاسدارانی ئێران، به‌ره‌به‌یانی ئه‌مڕۆ هه‌ینی، لە راگه‌یه‌ندراوێكدا وتی، لە وەڵامی هێرشە ئاسمانییەکەی نیوەشەوی ئەمریکا بۆ سەر ناوچه‌ی "سیریک"، سیسته‌می "راداری ئاگادارکردنەوەی پێشوەختە"ی هێزەکانی ئەمریکامان لە بەحرەین "کردوەتە ئامانج و تێکمانشکاندوە."
له راگه‌یه‌ندراوه‌كه‌ی سوپای پاسداراندا هاتوه"ئەمە هۆشدارییەکی توندە بۆ دوژمنی دەستدرێژیکار تا کۆتایی بە گێچەڵە ئاسمانییەکان و قاچاخچێتی نەوت لە گەروی هورمز بهێنێت؛ لە ئەگەری دوبارەبوونەوەی سەرپێچی و دەستدرێژییەکان، هێزی ئاسمانیی سوپا بۆ بەرپەرچدانەوەی بێسنور لە ئامادەباشیی تەواودایە. ئەو کۆمپانیا سەرپێچیکارانەشی کە فریوی دوژمنی دەستدرێژیکار دەخۆن، ڕوبەڕوی سزای زۆر توندتر دەبنەوە."
چه‌ند سه‌عاتێك به‌رله‌وه ئاژانسه ئێرانییه‌كان بڵاویان كردبوه‌وه كه هێرشێكی ئاسمانی كراوه‌ته سه‌ر "سیریك"، سوپای پاسدارانی ئێران وێڕای پشتڕاستكردنه‌وه‌ی هه‌واڵه‌كه له راگه‌یه‌ندراوه‌كه‌یدا وتویه‌تی، لەو هێرشه‌دا بۆ سه‌ر سیریك تاوەرێکی پەیوەندییەکان کراوەتە ئامانج.