سوپای پاسدارانی ئێران رایده‌گه‌یه‌نێت، ئه‌مڕۆ هه‌ینی، له گه‌روی هورمز مینی ده‌ریایی به كه‌شتییه‌كی هه‌ڵگری غازی شلدا ته‌قیوه‌ته‌وه‌و به‌هۆیه‌وه ته‌قینه‌وه‌یه‌كی گه‌وره له كه‌شتییه‌كه‌دا رویداوه.
ئاوێنه: هێزی دەریایی سوپای پاسدارانی ئێران، له راگه‌یه‌ندراوێكدا وتی، چەند کاتژمێرێک پێش ئێستا کەشتییەکی هەڵگری غازی شل (LPG) لە ڕۆژهەڵاتی گەروی هورمز، بە بێگوێدانە هۆشدارییە دوبارەکان، هەوڵی دا بەڕێگایەکی لاواز و نەگونجاو و مەترسیداری باشوری گەروەکەدا تێپەڕێت، به‌ڵام لە ئەنجامی به‌ركه‌وتنی به مینێکی دەریایی، توشی تەقینەوەیەکی زۆر بەهێز بو.
هێزی ده‌ریایی سوپای پاسداران وتوشیه‌تی "ئەم کەشتییە پەندی لە چارەنوسی ئه‌و كه‌شتییه نه‌وتهه‌ڵگرانه وه‌رنه‌گرتوه‌و كه پێشتر ته‌قیونه‌ته‌وه‌و پشتیوانیی فڕۆکە جەنگییەکانی ئەمریکای بۆ تێپەڕبون هەڵبژاردوه."
هۆشداریشی داوه كه "هەر جۆرە ئامڕازێكی دەریایی کە هەوڵ بدات ڕێساکانی ئێران له گەروی هورمز پێشێل بکات و بە بێگوێدانە هۆشدارییەکانی ناوەندی کۆنتڕۆڵی هاتوچۆی گەروی هورمزی سەر بە هێزی دەریایی سوپا، بچێتە نێو رێڕه‌وه رێگه‌پێنه‌دراو و مەترسیدارەکانەوە، توشی هەمان چارەنوسی کەشتییەكانی پێشو ده‌بێت."