گەڕی یەكەمی كۆبوونەوەی ئێران و ئەمریكا لە عوممان كۆتایی هات. لەوبارەیەوە وەزارەتی دەرەوەی ئێران ئاشکرایکرد، کۆبوونەوەیان لەگەڵ ئەمریکا لە عوممان کۆتایی هات و هەڵوێستی هەردوولا لەسەر بەرنامەی ئەتۆمی و هەڵگرتنی سزاكان ئاڵوگۆڕ كراوە.
ئاوێنە: بەدر ساعدی، وەزیری دەرەوەی عوممان بە رۆژنامەنوسانی وت "دانوستانەکانی ئەمریکا و ئێران له کەشێکی دۆستانه و بنیاتنەردا بوو بەمەبەستی بنیاتنان و لێكنزیك كردنەوەی بۆچوونی هەردوولا".
لایخۆشیەوە عەباس عێراقچی، وەزیری دەرەوەی ئێران ئاشکرایکرد "خولی یەکەمی دانوستانی ناڕاستەوخۆی نێوان ئەمریکا و وڵاتەکەی لە عوممان کۆتایی هات و هەردوولا هەفتەی داهاتوو درێژە بە دانوستانەکان دەدەنەوە".
عێراقچی وتیشی "هەردوو سەرۆکانی شاندی ئێران و ئەمریکا پێش ئەوەی شوێنی دانوستانەکان جێبهێڵێن چەند خولەکێک بە ڕاستەوخۆ قسەیان لەگەڵ یەکتر کرد".
ناوبراو زیاتری وت "هەردوولا هەڵوێستی حکومەتەکانیان لەبارەی بەرنامەی ئاشتییانەی ئەتۆمی ئێران و هەڵگرتنی سزاکان ئاڵوگۆڕکرد".
جێێی ئاماژەیە، ئەم دانوستانە بەر لە یەك كاتژمێر بە ئامادەیی عەباس عێراقچی، وەزیری دەرەوەی ئێران و ستیۆ ویتكۆف، نوێنەری تایبەتی دۆناڵد ترەمپ، سەرۆكی ئەمریكا بەڕێوەچوو.