ئا: ئاوێنە
ماوەی دوو رۆژە وەزارەتەکانی دەرەوەی ئیسرائیل و تورکیا لەسۆشیال میدیا لەدی یەکتر دەنوسن‌و بەریەککەوتنیان هەیە، وەزیری دەرەوەی ئیسرائیل دەڵیت "ئەردۆغان دیکتاتۆرێکی دژە جولەکەیە".
ماوەی دوو رۆژە وەزارەتەکانی دەرەوەی ئیسرائیل و تورکیا رەخنە لەیەکتر دەگرن لەسۆشیال میدیای خۆیاندا، کە لەڕۆژی شەممە ٢٩ی ئازارەوە پۆستێکی وەزارەتی دەرەوەی تورکیا دەستیپێکرد، کە ئیدانەی هێرشە ئاسمانییەکانی ئیسرائیلی بۆ سەر لوبنان کردو ڕاگەیاند "ئەم هێرشانە نیشانەی بێبایەخکردنی یاسا نێودەوڵەتییەکانە لەلایەن ئیسرائیلەوە‌و بەردەوامیش بوونی مەترسی لەسەر ئاسایش و سەقامگیری ناوچەکە دروست دەکات".
وەزارەتی دەرەوەی ئیسرائیل بەئاماژەدان بەم پۆستە لەئەکاونتی ئێکس لەهەمان ڕۆژدا ڕایگەیاند "لەکاتێکدا ئەردۆغان بەتوندوتیژی هاوڵاتیانی خۆی سەرکوت دەکات و نەیارانی سیاسیی خۆی بەکۆمەڵ دەستگیر دەکات، هاوکات بە خۆبەزلزانانە بانگەشەی بەهادانان بۆ کۆمەڵگەی نێودەوڵەتی دەکات. لەکاتێکدا لەتورکیای ئەردۆغاندا نەدادپەروەری و نە یاسا و ئازادی بوونی نییە".
ئەردۆغان لەوتارەکەیدا دوای نوێژی جەژن لە ٣٠ی ئازاردا، وتی "ئێمە دەبینین و دەزانین چی لە فەلەستین ڕوودەدات. خودا بەتووڕەیی خۆی ئیسرائیلی زایۆنی لە ناو ببات‌و نەفرەتی خوای لێبێت".
دوابەدوای ئەمە، گیدیۆن سار، وەزیری دەرەوەی ئیسرائیل لەهەژماری ئێکس پۆستێکی بە زمانی تورکی بڵاوکردەوەو ڕایگەیاند "دیکتاتۆر ئەردۆغان ڕووخساری دژە جوولەکەبوونی خۆی نیشانداوەو هەڕەشەیە هەم بۆ گەلەکەی خۆی و هەم بۆ ناوچەکە".
وەزارەتی دەرەوەی تورکیا لەوەڵامدا ڕایگەیاند "ئامانجی ئیسرائیل لەخستنەڕووی ئەو جۆرە تۆمەتانە دژی تورکیە پەردەپۆشکردنی ئەو تاوانانە بووە کە ناتانیاهۆ و هاوکارەکانی لەجینۆساید کردنی غەزەدا ئەنجامیانداوە".
وەزارەتی دەرەوەی ئیسرائیل بەئاماژەدان بەم پۆستەی وەزارەتی دەرەوەی تورکیا لەئەکاونتی ئێکسەوە لە ئێوارەی ٣٠ی ئازاردا رایگەیاند "رێگەیەک هەیە بۆ ڕوونکردنەوەی قسەکانی دیکتاتۆر: بڵێن ئەردۆغان دژە جوولەکە نییە. هەموو کەس دەزانێت ئەردۆغان چی بەسەر گەلان‌و گەلانی ناوچەکەدا هێناوە لەقوبرسەوە تا سوریا. هەمووان دەبینن چی بەسەر گەلەکەی خۆی‌و (پیکاچۆ)دا هێناوە".