ئیمانوێل ماکرۆن، سەرۆکی فەرەنسا ڕایگەیاند، هێرشەكانی ئیسرائیل بۆ سەر لوبنان جێگەی قبوڵکردن نییە و پێشێلكردنی ڕێككەوتنی ئاگربەستە، دەشڵێت، "بەردەوام دەبین لە پشتوانیكردنی لوبنان و لەگەڵ دۆناڵد ترەمپ، سەرۆکی ئەمریکا سەبارەت بە پەرەسەندنی شەڕ لەو وڵاتە قسە دەكەم".
ئاوێنە: ئیمانوێل ماکرۆن، ئەمڕۆ هەینی لە کاتی پێشوازی لە جۆزێف عەون، سەرۆکی لوبنان لە کۆنگرەیەکی ڕۆژنامەوانیدا ڕایگەیاند، فرەنسا بەردەوام دەبێت لە هەوڵەکانی لەگەڵ ئەمریکا بۆ جێبەجێکردنی ڕێککەوتنی ئاگربەست لە لوبنان، هەروەها لەگەڵ دۆناڵد ترەمپ، سەرۆکی ئەمریکا سەبارەت بە پەرەسەندنی شەڕ لە لوبنان قسە دەکات.
ئاماژەی بەوەشكرد، ئیسرائیل ڕێزی لە ڕێککەوتنی ئاگربەست لەگەڵ لوبنان نەگرتوە، هێرشەكانی ئەم دواییەی ئیسرائیل بۆ سەر خاکی لوبنان بە قبوڵنەکراو و پێشێلکردنی ڕێککەوتن دەزانن.
سەرۆکی فرەنسا دوپاتیکردەوە، لوبنان لەسەر "رێگای دروستە"، هیوای خۆی بۆ سەقامگیرتربونی ڕۆژهەڵاتی ناوەڕاست دەربڕی و جەختی لە پشتوانی وڵاتەكەی بۆ سەروەری لوبنان لە باشور و سنورەکانی لەگەڵ سوریا كردەوە و دواشیكرد ئیسرائیل لە پێنج خاڵی چاودێری لە باشوری لوبنان بکشێتەوە.
ئەوەشیخستەڕو، پاریس بەردەوام دەبێت لە هاوکاریکردنی حکومەتی لوبنان سەبارەت بە هەوڵەکان بۆ چاکسازی لە کەرتی دادوەری، وزە، ئاوەدانکردنەوە و بوژاندنەوەی ئابوری، بەو هیوایەی کە ئەوە یارمەتیدەر بێت بۆ پتەوکردنی سەقامگیریی وڵات.
وتیشی، "ئێمە بەردەوام دەبین لە کارکردن لەگەڵ سەرۆک عەون بۆ دەستەبەرکردنی سەرکەوتنی خولی سەرۆکایەتییەکەی و بەردەوام دەبین لە بەهێزکردنی ئابوری لوبنان لەبەر ڕۆشنایی ئەو ئالەنگارییە بەرچاوانەی ڕوبەڕوی دەبێتەوە".
لایخۆیەوە سەرۆكی لوبنان، بە توندی سەركۆنەی هێرشەکانی ئیسرائیلی بۆ سەر خاکی وڵاتەكەی کرد و داوای لە کۆمەڵگەی نێودەوڵەتی کرد پشتیوانی چڕبکاتەوە بۆ گەڕاندنەوەی سەقامگیری لە لوبنان و جێبەجێکردنی بڕیارنامە نێودەوڵەتییەکانی پەیوەست بە دۆخی ناوچەکە.
ناوبراو هێرشەکانی سەر گەڕەکی باشوری بەیروتی بە ناڕەوا زانی و جەختی لەوە کردەوە کە لە ئێستادا سوپا لێکۆڵینەوە لە ناسنامەی ئەو کەسانە دەکات کە موشەکەکانیان ئاراستەی ئیسرائیل كردوە.