سه‌ربارى خۆپیشاندانه فراوان‌و به‌رده‌وامه‌كانى ئۆپۆزسیۆنى توركیا به‌تایبه‌ت له‌دواى ده‌ستگیركردنى سه‌رۆكى گه‌وره شاره‌وانى ئیستانبوڵ، سه‌رۆكی توركیا په‌یامێكى بڵاوكرده‌وه‌و ده‌ڵێت:"كۆتایی به‌سه‌رده‌می هاتنه‌سه‌ر شه‌قام هات‌و وڵات ناچێته به‌ره‌ی گه‌نده‌ڵان"، ڕاشیده‌گه‌یه‌نێت، "جه‌هه‌په ده‌یه‌وێت پشێوی له‌توركیا بنێته‌وه".
ئاوێنە: ڕه‌جه‌ب ته‌یب ئه‌ردۆغان سه‌رۆكی توركیا شه‌وى ڕابردوو له‌دوای به‌ربانگكردنه‌وه، په‌یامێكى بڵاوكرده‌وه‌و وتى:"شاره‌وانییه‌كانی توركیا ناچنه ڕیزی گه‌نده‌ڵان‌و سته‌مكاران، به‌ڵكو خزمه‌ت به‌گه‌ل‌و هاوڵاتییانیان ده‌كه‌ن".
ئه‌ردۆغان به‌زمانێكى زبڕ له‌به‌رامبه‌ر ئۆپۆزسیۆن قسه‌یكردو وتى:"ئۆپۆزسیۆن هه‌رچییه‌ك ده‌كات با بیكات، به‌ڵام ده‌سته‌به‌رداری ژیری‌و ئارامی‌و خۆگرتن نابین، كۆتاییش به‌سه‌رده‌می هاتنه شه‌قام هات‌و ئه‌و چه‌ند ڕۆژه‌ی له‌مانگی ڕه‌مه‌زان ماوه، ده‌یكه‌نه ده‌رفه‌تێك بۆ به‌هێزكردنی به‌ره‌ی ناوخۆیی گه‌لی توركیا، مشتێک دزو گەندەڵ جەهەپەیان کۆنترۆڵکردوە".
سه‌رۆكى توركیا هه‌ر له‌و په‌یامه‌یدا ئه‌وه‌شى وت:"ئۆپۆزسیۆن به‌تایبه‌تی پارتی گه‌لی كۆماری (جه‌هه‌په) ده‌یه‌وێت پشێوی له‌توركیا بنێته‌وه".
ڕۆژى 19ى ئه‌م مانگه، هێزێکی ئەمنیی تورکیا هەڵیکوتایه‌سەر ماڵی ئەکرەم ئیمامئۆغڵو سەرۆکی گەورەشارەوانیی ئیستانبوڵ‌و دەستگیریان کرد، دەستگیرکردنیشی کاردانەوەیەکی گەورەی لێکەوتەوە، هاوڵاتییان بۆ پشتگیریکردن لەئیمامئۆغڵو ڕژانە سەر شەقامەکان‌و خۆپیشاندانی بەرفراوانیان ده‌ستپێكردو تائێستاش درێژه‌یان هه‌یه.