عەباس عێراقچی، وەزیری دەرەوەی ئێران ئەمڕۆ یەکشەممە ڕایگەیاند، ڕێککەوتنی ئەتۆمی ساڵی 2015 بەم شێوەی ئێستای ناتوانرێت زیندوبکرێتەوە و جەختی لەوە کردەوە، "دۆخی ئەتۆمی ئێمە بەشێوەیەکی بەرچاو پێشکەوتوە".
ئاوێنە: میدیاکانی ئێران لە زاری عەباس عێراقچی، وەزیری دەرەوەی ئێرانه‌وه بڵاویانكرده‌وه، "تاکتیک و ڕێبازی ئێستامان ئەوەیە کە دانوستانی ناڕاستەوخۆ لەگەڵ ئەمریکادا بکەین".
عەباس عێراقچی جەختی لەوەکردەوە کە بەرنامەی ئەتۆمی ئێران "تەواو ئاشتیانە"یه و لە درێژەی قسەکانیدا وتی، "ئێمە لەوە دڵنیاین و ئامادەین ئەم متمانەیە لەنێو ئەوانی دیکەدا بەهێزتر بکەین".
ئه‌وه‌شی خسته‌ڕو، "ئەولەویەتی ئێمە پوچەڵکردنەوەی کاریگەریی ئەو گەمارۆیانەیە کە دوژمن بۆ گەیشتن بە ئامانجەکانی لە دژی ئێمە بەکاری دەهێنێت، تاران هەمیشە خۆی لە شەڕ بەدور گرتوە و بەدوایدا ناگه‌ڕێت بەڵام ئێمە ئامادەین بۆی و لێی ناترسین".
لەم مانگەدا تاران نامەیەکی فەرمی لە دۆناڵد ترەمپ، سەرۆکی ئەمریکا سەبارەت بە ڕێککەوتنی ئەتۆمی پێگەیشت، بەڵام عەلی خامنەیی، ڕێبەری باڵای ئێران پابەندبونی خۆی بە ڕەتکردنەوەی دانوستان دەربڕی، باسی لە بێهودەیی دانیشتنی لەسەر مێزی وتوێژ لەگەڵ "ئەو کەسەی ڕێککەوتنی ئەتۆمی ساڵی 2015ی دڕاند"ی کرد.
ئەنوەر گەرگاش، ڕاوێژکاری دیپلۆماسی سەرۆکی ئیمارات پەیامەکەی بە عەباس عێراقچی، وەزیری دەرەوەی ئێران لە تاران گەیاند، چەند ڕۆژێک پێشتر تره‌مپ ڕایگەیاندبو، کە نامەیەکی بۆ خامنەیی ناردوە و پێشنیاری دانوستان لەسەر ڕێککەوتنی ئەتۆمی دەکات و لە نێوان بژاردەی سەربازی و ڕێککەوتنێک کە ڕێگری دەکات لە هەڵگرتنی چەکی ئەتۆمی بە تاران.