عەباس عراقچی، وەزیری دەرەوەی ئێران رایگەیاند، نامەكەی دۆناڵد ترەمپ، سەرۆكی ئەمریكا بۆ عەلی خامەنەیی، رێبەری باڵای وڵاتەكەیان، زیاتر هەڕەشەی لەخۆگرتوە تاوەكو دەرفەت بۆ دانوستان. دەشڵێت، هەردو دیوی نامەكە لەبەرچاو دەگرن و لە چەند رۆژی داهاتودا وەڵامی دەدەنەوە.
ئاوێنە: عەباس عراقچی، وەزیری دەرەوەی ئێران لە لێدوانێكدا بۆ تەلەفزیۆنی رەسمی وڵاتەكەی وتی، ئێمە بەڵێن دەدەین وەك داڕێژەرانی سیاسەتی دەرەوەی ئێران، درێغی نەكەین لە هیچ هەوڵێك بۆ خزمەتكردنی خەڵك و هیچ دەرفەتێكیش لەدەست نەدەین.
وتوشیەتی، ئێمە لە بارودۆخی گوشار و هەڕەشە و زیادكردنی سزاكاندا، بەهیچ شێوەیەك دانوستانی راستەوخۆ ناكەین. لە چەند رۆژی داهاتودا وەڵامی نامەكەی ترەمپ دەدەینەوەو لەڕێگەیەكی گونجاوەوە بۆی دەنێرین.
وەزیری دەرەوەی ئێران وتوشیەتی، نامەكەی ترەمپ لەگەڵ ئەوەی بانگەشەی ئەوە دەكات كە دەرفەت هەن، بەڵام زیاتر لایەنی هەڕەشەی لەخۆگرتوە. ئێمە هەردو دیوی دەرفەت و هەڕەشەی نامەكە لەبەرچاو دەگرین.
دوێنێ چوارشەممە، پێگەی ئەكسیۆسی ئەمریكی، لە زاری پەرسێكی ئەمریكی و دو سەرچاوەی ئاگادارەوە بڵاویكردەوە، نامەكەی ترەمپ بۆ خامەنەیی "توند بوە" و ترەمپ لەنامەكەدا وتویەتی، دانوستانی كراوەی ناوێت و مۆڵەتی دو مانگی بە تاران داوە بۆ گەیشتن بە رێككەوتن.
دو هەفتە لەمەوبەر دۆناڵد ترەمپ ئاشكرایكرد كە نامەیەكی بۆ رێبەری ئێران ناردوەو پێشنیاری ئەنجامدانی دانوستانی راستەوخۆی كردوە.
چەند رۆژێك لەمەوبەر نێردەی ترەمپ لە كۆبونەوەیەكدا لە ئەبوزەبی، نامەكەی سەرۆكی ئەمریكای گەیاندە محەمەد بن زاید، سەرۆكی دەوڵەتی ئیمارات و رۆژێك دواتر، ئەنوەر قەرقاش، نوێنەری محەمەد بن زاید سەردانی تارانی كردو نامەكەی رادەستی عەباس عیراقچی، وەزیری دەرەوەی ئێران كرد.
هەفتەی رابردو عەلی خامەنەیی، رێبەری باڵای ئێران، نامەكەی ترەمپ و پێشنیارەكەی بۆ دانوستان بە "چەواشەكردنی رای گشتی" ناوبرد بە ئامانجی دروستكردنی تێڕوانینێك كە گوایە ئێران دانوستان رەتدەكاتەوە.
خامەنەیی ئاماژەی بەوەشدا كە دانوستان لەگەڵ ئەمریكا رەتدەكاتەوە، بەڵام چەند سەعاتێك لەدوای ئەو لێدوانانەی خامەنەیی، نوێنەرایەتی ئێران لە نەتەوە یەكگرتوەكان لە راگەیەندراوێكدا وتی، ئەگەر ئامانج لە دانوستانەكان بۆ رەواندنەوەی ئەو نیگەرانییانە بێت كە لەبارەی دەستڕاگەیشتنی ئێران بە چەكی ئەتۆمی هەن، ئەوا دانوستانی لەم جۆرە جێگەی دیراسەكردنە، بەڵام ئەگەر ئامانج بۆ هەڵوەشاندنەوەی بەرنامە ئەتۆمییە ئاشتیخوازانەكەی ئێران بێت، بەهیچ شێوەیەك دانوستانی لەو شێوەیە ناكرێت.