وتەبێژی سەربازی حووسییەكانی یەمەن ڕایگەیاند، بەرەبەیانی ئەمڕۆ لە ڕێگەی مووشەكێكی بالیستی هایپەرسۆنیكەوە فڕۆكەخانەی بن گوریونی ئیسرائیل-یان كردووەتە ئامانج، دەشڵێت: بۆ ماوەی پێنج ڕۆژە بەردەوامن لە ڕووبەڕووبوونەوەی هێرشەكانی ئەمریكا بۆ سەر یەمەن.
ئاوێنە: یەحیا سەریع، وتەبێژی حووسییەكانی یەمەن سەبارەت بە هێرشێكی نوێیان بۆ سەر ئیسرائیل ڕایگەیاند، بەرەبەیانی ئەمڕۆ هێزی مووشەكیی حووسییەكانی یەمەن ئۆپەراسیۆنێكی سەربازیان ئەنجامدا، بە جۆرێك لە ڕێگەی مووشەكێكی بالیستی هایپەرسۆنیكەوە فڕۆكەخانەی بن گوریۆنیان لە ناوچەی یافا كردە ئامانج و بە سەركەوتوویی ئامانجەكەیان پێكا.
ئاماژە بەوەشكراوە، بۆ پێنجەمین ڕۆژی لەسەریەكە بەردەوامن لە ڕووبەڕووبوونەوەی دەستدرێژییەكانی ئەمریكا بۆ سەر یەمەن، كە لە ماوەی چەند كاتژمێری ڕابردوودا دامەزراوە و كەلوپەلی مەدەنیی لە شارە جیاوازەكانی یەمەن كردووەتە ئامانج.
وتیشی، هێزە چەكدارەكان كەشتییە جەنگییەكانی دوژمن-یان لە دەریای سووردا كردووەتە ئامانج، لەوانە كەشتیی فڕۆكە هەڵگری USS Harry Truman .
لە كۆتایدا وتیشی، ئەمریكا شكست دەهێنێت لەوەی ڕێگریمان لێ بكات، كە ئیسرائیل بكەینە ئامانج و چڕكردنەوەی هێرشی ئاسمانی و دەستپێكردنی هێرشی زیاتر نابێتە هۆی ڕاگرتنی یەمەنییەكان لە جێبەجێكردنی ئەركی ئایینی و ئەخلاقی خۆیان بەرامبەر بە گەلی فەڵەستین.