دۆناڵد ترەمپ، سەرۆكی ئەمریكا هۆشداری دەداتە ئێران كە دەستبەجێ پشتیوانییەكانی بۆ حوسییەكانی یەمەن رابگرێت و دەشڵێت، حوسییەكان بەتەواوەتی لەناودەبەین.
ئاوێنە: دۆناڵد ترەمپ، سەرۆكی ئەمریكا، ئەمڕۆ چوارشەممە، لە پەیامێكدا لە هەژماری خۆی لە تۆڕی كۆمەڵایەتی تروس سۆشیاڵ رایگەیاند، بەگوێرەی زانیارییە ئێران هاوكاریی خۆی بۆ حوسییەكان لەڕوی كەرەستەی سەربازی و پشتیوانییەوە هەندێك كەمكردۆتەوە، بەڵام هێشتا بڕێكی زۆر هاوكارییان بۆ دەنێرێت.
وتوشیەتی، دەبێت ئێران دەستبەجێ پشتیوانییەكانی رابگرێت و لێگەڕێت حوسییەكان خۆیان شەڕ بكەن، لە هەردو بارەكەدا حوسییەكان دەدۆڕێن، بەڵام لە حاڵەتی راگرتنی پشتیوانییەكانی ئێراندا خێراتر دەدۆڕێن.
حەختیشی كردۆتەوە كە گورزی گەورەیان لە حوسییەكان داوە، دەبینن چۆن پێ بەپێ دۆخییان خراپتر دەبێت، بەتەواوەتی لەناودەبرێن.